Ch’ol 6
Eb’ li jalb’ileb’ xk’a’uxl neke’kub’siik xha’ ut neke’k’ulub’aak xb’aaneb’ li komon—Eb’ li komon sa’ li iglees li neke’xjal xk’a’uxl neke’kuye’ xmaak—Eb’ li ch’utam neke’b’eresiman rik’in xwankil li Santil Musiq’ej. Wan na 401–421 chihab’ xyo’lajik li Kristo.
1 Ut anajwan nin’aatinak chirix li kub’iha’. K’ehomaq reetal, eb’ li xb’eenil, eb’ laj tij, ut eb’ laj tzolonel kub’enaqeb’ xha’, ut moko ke’kub’e ta xha’, ka’ajwi’ wi ke’uuchin re naq k’ulub’ejaqeb’ choq’ re.
2 Chi moko ke’xk’ul anihaq choq’ re li kub’iha’, ka’ajwi’ wi ke’chal chi yot’b’ileb’ xch’ool ut chi tuulaneb’ xmusiq’, ut neke’xk’ut xyaalal chiru li iglees naq jalb’ileb’ xk’a’uxl chi yaal chirix chixjunileb’ lix maak.
3 Ut maajun nak’ule’ choq’ re li kub’iha’, ka’ajwi’ wi ke’xk’ul sa’ xb’eeneb’ lix k’ab’a’ li Kristo, chi k’eek’ookeb’ xch’ool chi k’anjelak chiru toj sa’ roso’jik.
4 Ut chirix naq k’ulb’ileb’ choq’ re li kub’iha’, ut k’anjelanb’ileb’ ut ch’ajob’resinb’ileb’ xb’aan lix wankil li Santil Musiq’ej, ke’k’ehe’ sa’ ajl sa’ xyanq li tenamit re lix iglees li Kristo, ut ke’k’uulaman xk’ab’a’eb’, re naq te’jultikamanq ut te’ch’olaniiq xb’aan lix chaab’il aatin li Dios, re te’kanaaq sa’ li tiikil b’e, re naq rajlal te’yo’leq rik’in tijok, ut te’xkanab’ rib’ ka’ajwi’ chiru lix k’ulub’ejil li Kristo, a’an aj yoob’anel ut aj choyonel re lix paab’aaleb’.
5 Ut li iglees ke’ch’utla chi kok’ aj xsa’, re kuyuk sa’ ut re tijok, ut re raatinankil rib’ chirib’ileb’ rib’ chirix lix chaab’ilal li raameb’.
6 Ut ke’ch’utla chi kok’ aj xsa’ re xk’ulb’al li kaxlan wa ut li viin, re xjultikankil li Qaawa’ Jesus.
7 Ut tz’aqal k’eek’ookeb’ xch’ool chirilb’al naq maak’a’aq li maa’usilal sa’ xyanqeb’; ut ani natawe’ chixb’aanunkil li maa’usilal, ut oxib’ aj yehol nawom re li iglees ke’xjiteb’ chiruheb’ li xb’eenil, ut wi ink’a’ ke’xjal xk’a’uxl, ut ink’a’ ke’xch’olob’ lix maak, kisachman reetalil lix k’ab’a’eb’, ut ink’a’ ke’k’ehe’ sa’ ajl sa’ xyanq lix tenamit li Kristo.
8 A’b’anan jo’ k’ihal sut ke’xjal xk’a’uxl ut ke’xsik’ xkuyb’al, chi anchal li rajomeb’, ke’kuye’ xmaak.
9 Ut b’eresinb’il lix ch’utameb’ xb’aan li iglees, jo’ chanru li naxk’anjela wi’ li Musiq’ej, ut rik’in lix wankil li Santil Musiq’ej; xb’aan naq jo’ chanru naq lix wankil li Santil Musiq’ej kixb’eresiheb’, ma te’jultikanq aatin, malaj te’waklesinq ch’oolej, malaj te’tijoq, malaj te’tz’aamanq, malaj te’b’ichanq, chi jo’kan ajwi’ kib’aanuman.