Japta 6
Olgeta we oli sakem sin oli kasem baptaes, mo ol memba blong Jos oli kam ol fren blong olgeta—Ol memba blong Jos we oli sakem sin, oli fogivim olgeta—Oli lidim ol miting tru long paoa blong Tabu Spirit. Raonabaot 401–421 A.K.B.
1 Mo nao mi toktok long saed blong baptaes. Luk, ol elda, ol pris, mo ol tija oli bin kasem baptaes; mo oli no kasem baptaes kasem taem we oli karem ol frut i kam we i soem se oli klin inaf blong kasem baptaes.
2 Mo tu, oli no bin tekem eni man blong kasem baptaes, sapos oli no bin kam wetem wan hat we i fulap wetem sore mo wan spirit we i wantem blong sakem sin, mo oli testifae long jos se i tru we oli bin sakem evri sin blong olgeta.
3 Mo oli no tekem wan blong kasem baptaes, sapos oli no tekem long olgeta nem blong Kraes, mo oli gat wan strong tingting blong wok blong hem kasem en.
4 Mo afta we oli tekem olgeta blong kasem baptaes, mo Tabu Spirit i lidim olgeta mo oli kam klin tru long paoa blong hem, oli kaontem olgeta wetem ol pipol blong jos ia blong Kraes; mo oli tekem ol nem blong olgeta, blong oli save tingbaot olgeta mo fidim olgeta wetem gudfala toktok blong God, blong holemtaet olgeta i stap long stret rod, blong holemtaet olgeta blong oli lukaotgud blong stap prea, mo stap dipen nomo long ol gudfala wok blong Kraes, we i bin man we i bin statem mo finisim fet.
5 Mo jos i bin mit tugeta fulap taem, blong livim kakae mo blong prea, mo blong toktok wan wetem narawan long saed blong gudlaef blong sol blong olgeta.
6 Mo oli bin mit tugeta fulap taem blong tekem mo kakae bred mo dring waen, blong tingbaot Lod Jisas.
7 Mo oli bin lukaotgud blong luk se i no mas gat eni rabis fasin long medel blong olgeta; mo eni man we oli faenem se hem i mekem rabis fasin, mo tri witnes blong jos i jajem olgeta long fored blong ol elda, mo sapos oli no sakem sin, mo oli no konfes, oli tekemaot nem blong olgeta, mo oli nomo kaontem olgeta long medel blong ol pipol blong Kraes.
8 Be evri taem we oli sakem sin mo lukaotem blong kasem fogivnes, wetem tru tingting, oli fogivim olgeta.
9 Mo ol miting blong olgeta, jos i bin lidim folem fasin blong ol wok blong Spirit, mo tru long paoa blong Tabu Spirit; from se, olsem we paoa blong Tabu Spirit i lidim olgeta blong prij, o blong askem strong, o blong prea, o blong askem wetem tingting i stap daon, o blong singsing, olsem ia nao oli bin mekem folem.