1 Ac inge nga, Moroni, suhmuhslah kahs puh luhn pahpah tuhmuhk Mormon, ma el sramsramkihn ke luhlahlfongi, finsrak, ac luhngse muhtahl; tuh ke ohiyac se inge el tuh sramsram nuh sin mwet uh, ke el lotwelos ke iwen lohlngohk ma elos tuh muhsaheack nuh ke acn in alu.

2 Ac inge nga, Mormon, sramsram nuh suwos, mwet lili sacohk luhk; ac ma ke luhng kuhlwacng luhn God suc Pahpah, ac Leum lasr Jisus Kraist, ac luhngse muhtahl Lal, ke srihpen mwe sang ke pahng se Lal nuh sihk uh, tuh nga fihliyucklac in sramsram nuh suwos ke pacl se inge.

3 Ohinge, nga kena sramsram nuh suwos suc wi alu uh, suc mwet mislac ma fahsr tukun Kraist, ac suc eis finsrak ma fal ma kowos kuh in ilyak nuh ke nien monglac luhn Leum, ke pacl se inge fahlac ne ke na kowos fah monglac Yohrohl inkuhsrao.

4 Ac inge mwet lili wiyuck, nga nuhnuhnkuh ma inge keiwos ke srihpen moul mislac lowos yurun tuhlihk nuhtin mwet.

5 Tuh nga esam kahs luhn God ma fahk ke orekma lalos kowos fah etwaclos; tuh fin orekma lalos wo, na elos oacyacpac wo.

6 Tuh liye, God El tuh fahk muh sie mwet koluk el tiac kuh in oruh ma wo; tuh el fin sang sie mwe sang, kuh pruhe nuh sin God, sahyacn na el fin oruh ma inge ke inse pwacye ma inge tiacna ahkwoyacl.

7 Tuh liye, tiac oacwaclah nuh sel in suwohswohs.

8 Tuh liye, fin sie mwet koluk el sang sie mwe sang, el oruh ma inge ke inse toasr; ohinge oacwaclah nuh sel oacna in muh el tuh eis mwe sang uh; ohinge el oacwaclah muh mwet koluk se ye muhtuhn God.

9 Ac oacyacpac tuh oacwaclah muh ma koluk se nuh sin sie mwet, el fin ac pruhe ac tiac ke inse pwacye; ahok, ac tiac ahkwoyacl, tuh God El tiac eis kuhtwena kain mwet uh.

10 Ohinge, sie mwet koluk el tiac kuh in oruh ma wo; el tiac pac kuh in sang sie mwe sang wo.

11 Tuh liye, sie unohn mwen tiac kuh in use kof wo; unohn wo uh tiac pac kuh in use kof mwen; ohinge, sie mwet kuhlwacnsap luhn devil el tiac kuh in fahsr tukun Kraist; ac el fin fahsr tukun Kraist el tiac kuh in sie mwet kuhlwacnsap luhn devil.

12 Ohinge, ma nuhkwewa ma wo uh tuhkuh sin God; ac ma koluk uh tuhkuh sin devil; tuh devil el sie mwet lokoalok luhn God, ac acnwuck laenuhl pacl nuhkwewa, ac suli ac ahkluhngye in oruh ma koluk, ac in oruh ma koluk pacl nuhkwewa.

13 Tuhsruhk liye, ma luhn God uh suli ac ahkluhngye in oruh ma wo pacl nuhkwewa; ohinge ma nuhkwewa ma suli ac ahkluhngye in oruh ma wo, ac in luhngse God, ac in kuhlwacnsapwacl uh ma mokleyuck sin God.

14 Ohinge, liyacacng na, mwet lili sacohk wiyuck, tuh kowos in tiac nuhnuhnkuh muh ma koluk uh ma sin God, kuh ma suc wo ac ma sin God uh in muh ma sin devil.

15 Tuh liye, mwet lili wiyuck, ituckwot nuh suwos in nuhnuhnkuh, tuh kowos in kuh in etuh ma wo liki ma koluk; ac ohiyac in nuhnuhnkuh uh kahlwem, tuh kowos in kuh in etuh ke sie etwacack suwohs, oacna ke kahlwem luhn lwen uh siena liki lohsr luhn fong uh.

16 Tuh liye, Nguhn luhn Kraist ituckyang nuh sin mwet nuhkwewa, tuh elan kuh in etuh ma wo liki ma koluk; ohinge, nga ahkkahlwemye nuh suwos ohiyac in nuhnuhnkuh; tuh ma nuhkwewa ma suli in oruh ma wo, ac in mokle in luhlahlfongi ke Kraist, ma inge suhpweyuckme ke kuh ac mwe sang luhn Kraist; ohinge tuh kowos in kuh in etuh ke sie etwacack suwohs lah ma sin God.

17 Tuhsruhk kuhtwena ma ma mokle mwet uh in oruh ma koluk, ac in tiac luhlahlfongi ke Kraist, ac lahfwekuhnuhl, ac in tiac kuhlwacnsapuh God, na kowos in kuh in etuh ke sie etwacack suwohs lah ma inge ma sin devil; tuh devil el orekma ke ohiyac se inge, tuh el tiac mokle kuhtwena mwet in oruh ma wo, moh, tiac siefanna; tiac pac lipufacn lal; tiac pac elos suc muhta ye kuh lal.

18 Ac inge, mwet lili luhk, nga liye tuh kowos etuh kahlwem se ma kowos kuh in nuhnuhnkuh kac, kahlwem se inge pa kahlwem luhn Kraist, liye tuh kowos in tiac tahfonglac ke nuhnuhnkuh; tuh ke nuhnuhnkuh se ingacn pacna kowos fah oacyacpac nuhnuhnkweyuck.

19 Ohinge, nga kwacfe suwos, mwet lili, tuh kowos in oaru in suk ke kahlwem luhn Kraist tuh kowos in kuh in etuh ma wo liki ma koluk; ac kowos fin sruokyac na ma wo nuhkwewa, ac tiac sruhnga, pwacyena kowos fah sie tuhlihk nuhtin Kraist.

20 Ac inge, mwet lili luhk, ac kuh fuhkah tuh kowos in kuh in sruokyac ma wo nuhkwewa?

21 Ac inge nga tuhkuh nuh ke luhlahlfongi se ingacn, ma nga tuh fahk muh nga ac sramsramkihn; ac nga fah fahk nuh suwos ohiyac se ma kowos ac kuh in sruokyac ma wo nuhkwewa.

22 Tuh liye, God El etuh ma nuhkwewa, ke srihpen El ma omeet me ac ne tok ma pahtpaht, liye, El suhpwaclah lipufacn in luti nuh sin tuhlihk nuhtin mwet, in oruh in kahlwem ke tuhkuh luhn Kraist; ac ke Kraist ma wo nuhkwewa tuhkuh.

23 A God El oacyacpac fahk nuh sin mwet pahluh, ke oaluhl sifacna, lah Kraist El ac tuhkuh.

24 Ac liye, oasr inkacnek pucspucs ma El ahkkahlwemye ma uh nuh sin tuhlihk nuhtin mwet, ma wo; ac ma wo nuhkwewa ma wo uh tuhkuh sin Kraist; fin tiac mwet uh ac puhtatlac, ac wacngihn ma wo kuh in tuhkuh nuh yohrohlos.

25 Ohinge, ke luti luhn lipufacn, ac ke kahs nuhkwewa ma fahlac liki oalin God, mwet uh muhtwacwacack in luhlahlfongi Kraist; ac ohinge ke luhlahlfongi, elos tuh sruokyac ma wo nuhkwewa; ac ohinge ne ke na tuhkuh luhn Kraist.

26 Ac tukun El tuhkuh mwet uh oacyacpac moliyucklac ke luhlahlfongi ke Inel; ac ke luhlahlfongi, elos eklac wen nuhtin God. Ac pwacyena ke Kraist El moul El fahklah kahs inge nuh sin pahpah tuhmwacsr, fahk: Kuhtwena ma kowos ac fah siyuck sin Pahpah ke Inek, suc ma wo, luhlahlfongi tuh kowos ac fah eis, liye, ma inge fah oreklac nuh suwos.

27 Ohinge, mwet lili sacohk luhk, yac ma usrnguck uh tui ke srihpen Kraist El sowack nuh inkuhsrao, ac muhta ke lacpo lacyot luhn God, in eis sin Pahpah ke suwohs Lal ke pahkotwen Lal nuh sin tuhlihk nuhtin mwet?

28 Tuh El tohpohklah sahflahiyacn masap uh, ac El eisaclos nuhkwewa suc luhlahlfongel; ac elos suc luhlahlfongel fah fungyang nuh ke ma wo nuhkwewa; ohinge El iwaclah ip yohk luhn tuhlihk nuhtin mwet; ac El muhta ne tok ma pahtpaht inkuhsrao.

29 Ac ke srihpen El tuh oraclah ma se inge, mwet lili sacohk luhk, yac ma usrnguck uh tui? Liye nga fahk nuh suwos, Moh; lipufacn uh tiac pac tui in luti nuh sin tuhlihk nuhtin mwet.

30 Tuh liye, elos muhta ye kuh Lal, in luti fal nuh ke kahs luhn masap Lal, ahkkahlwemyaclos sifacna nuh selos suc fokoko luhlahlfongi la ac kuh nuhnkwac ke ohiyac suwohswohs nuhkwewa.

31 Ac kunohkohn in luti lalos pa in pahngon mwet uh in auliyak, ac in ahksuwohsye ac in oruh orekma ke wuhlweacng luhn Pahpah, ma El tuh oraclah nuh sin tuhlihk nuhtin mwet, in ahkoelah inkacnek uh inmahsrlon tuhlihk nuhtin mwet, ke fahkwelihk kahs luhn Kraist nuh sin mwet suleyucklac luhn Leum, tuh elos in kuh in fahkwack luhlahlfongi Kacl.

32 Ac ke elos oruh ohinge, Leum God El ahkoelah inkacnek ma mwet luhlah sin mwet uh ac kuh in luhlahlfongi Kraist, tuh in oasr acn luhn Nguhn Muhtahl ke insiaclos, in fal nuh ke kuh Lal; ac tukun ohiyac se inge sikyak Pahpah, wuhlweacng ma El tuh oraclah nuh sin tuhlihk nuhtin mwet.

33 Ac Kraist El tuh fahk: Kowos fin luhlahlfongiyuc ac fah oasr kuh yuruwos in oruh oacna sie ma wo Sihk.

34 Ac El tuh fahk: Auliyak kowos nuhkwewa fin facluh, ac tuhkuh nuh Yuruk, ac pacptaislac ke Inek, ac luhlahlfongiyuc, tuh kowos in kuh in moliyucklac.

35 Ac inge, mwet lili sacohk luhk, fin pwacye lah ma inge pwacye ma nga sramsramkihn nuh suwos uh, ac God Elac ahkkahlwemye nuh suwos, ke kuh ac wolacna yohk ke lwen sahflah, lah ma inge pwacye, ac fin ma inge pwacye yac pacl luhn ma usrnguck uh tui?

36 Kuh yac lipufacn uh tui in sikyak nuh sin tuhlihk nuhtin mwet? Kuh yac El sruokyacna kuh luhn Nguhn Muhtahl luhkwelos? Kuh yac El, fin wacngihn sahflahiyacn pacl uh, kuh facluh fah tu na, kuh ac fah oasr siefanna mwet fin facluh in moliyucklac?

37 Liye nga fahk nuh suwos, Moh; tuh luhlahlfongi pa oruh ma usrnguck uh in oreklac; ac luhlahlfongi pa oruh lipufacn uh sikyak ac luti nuh sin mwet uh; ohinge, fin ma inge tui we nuh sin tuhlihk nuhtin mwet, tuh ma ke srihpen suhlahlahlfongi, ma nuhkwewa ac wacngihn srihpac.

38 Tuh wacngihn kuhtwena mwet kuh in moliyucklac, in fal nuh ke kahs luhn Kraist, sahyacn na elos ac fah luhlahlfongi ke Inel; ohinge, fin ma inge tui, na luhlahlfongi uh oacyacpac tui; ac koluk ohiyacn mwet uh, tuh elos ac oacna in muh wacngihn molwelah oreklac.

39 Tuhsruhk liye, mwet lili sacohk luhk, nga nuhnuhnkuh ma wo keiwos, tuh nga nuhnuhnkuh muh kowos luhlahlfongi Kraist ke srihpen inse puhsisacl lowos; tuh kowos fin tiac luhlahlfongel na kowos tiac fal in oacwaclah inmahsrlon mwet ke alu se inge.

40 Ac sifilpac, mwet lili sacohk luhk, nga kena sramsram nuh suwos ke finsrak. Fuhkah tuh kowos kuh in eis luhlahlfongi, sahyacn na in oasr finsrak lowos?

41 Ac meac se kowos ac finsrakkihn an? Liye nga fahk nuh suwos tuh ac fah oasr finsrak lowos ke iwaclah luhn Kraist ac ke kuh luhn sifilpac moulyak Lal, in moulyak nuh ke moul ma pahtpaht, ac ma inge ke srihpen luhlahlfongi lom Kacl in fal nuh ke olwelah uh.

42 Ohinge, fin oasr luhlahlfongi luhn sie mwet enenuh se na in oasr finsrak lal; tuh fin wacngihn luhlahlfongi tiac kuh in oasr finsrak.

43 Ac sifilpac, liye nga fahk nuh suwos lah tiac kuh in luhlahlfongi ac finsrak yohrohl, sahyacn na el fakpacp, ac inse puhsisacl.

44 Fin ohinge, luhlahlfongi ac finsrak lal an wacngihn srihpac, tuh wacngihn kuhtwena ma inge wo ye muhtuhn God, sahyacn na fakpacp ac inse puhsisacl; ac fin sie mwet el fakpacp ac inse puhsisacl, ac fahkwack ke kuh luhn Nguhn Muhtahl lah Jisus pa Kraist, enenuh na in oasr luhngse muhtahl yohrohl; tuh fin wacngihn luhngse muhtahl yohrohl na el tiac oacwac; ohinge enenuh na in oasr luhngse muhtahl yohrohl.

45 Ac luhngse muhtahl uh mongfihsrwacsr, ac kuhlwacng, ac tiac sok, ac tiac fihlacng, tiac suk kacl sifacna, ac tiac puhrakwack, tiac nuhnkuh ma koluk, ac tiac engan ke ma koluk tuhsruhk engan ke ma pwacye, tu na kuh ke ma nuhkwewa, luhlahlfongi ma nuhkwewa, finsrak ke ma nuhkwewa, muhtweng ke ma nuhkwewa.

46 Ohinge, mwet lili sacohk luhk, fin wacngihn luhngse muhtahl yuruwos, kowos wacngihn, tuh luhngse muhtahl uh tiac wacngihnlac. Ohinge, fungyang nuh ke luhngse muhtahl, suc pa wo emet, tuh ma nuhkwewa ac puhtatlac—

47 Tuhsruhk luhngse muhtahl uh pa luhngse suwohs luhn Kraist, ac ma inge muhtweng ne tok ma pahtpaht; ac kuhtwena mwet suc sukokyak in sruokyac na ma inge ke lwen sahflah, ac fah wo nuh sel.

48 Ohinge, mwet lili sacohk luhk, pruhe nuh sin Pahpah ke kuhiyacn insiowos nohfohn, tuh kowos in kuh in sesseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist; tuh kowos in kuh in wen nuhtin God; tuh ke Elac fah sikme kuht fah oacna El, tuh kuht ac fah liyacl oacna El uh; tuh in oasr finsrak se inge yohrohsr; tuh kuht in kuh in ahknwacsnwacsyeyucklac oacna ke El nwacsnwacs. Amen.