1 Shizhéʼé Mormon binaaltsoos, shí Moroni shichʼįʼ áyiilaa; dóó éí Diyin God binaʼanishjįʼ ashiʼdooltʼeʼ. Dóó díí bikʼijįʼ shichʼįʼ iʼiilaa; kóníigo:

2 Shiyeʼ ayóí ííníshʼníinii, Moroni, tsʼídá yéigo naa shił hózhǫ́ niBóhólníihii Jesus Christ éí naa ákonízin, dóó binaʼanishjí nííkeed, dóó binaanish diyinii binanilnish doo biniiyé.

3 Tsʼídá tʼáá áłahjįʼ sodizin biyiʼjįʼ nináshniih, áko tʼáá áłahjįʼ beʼAwééʼ Diyinii, Jesus, bízhiʼ binahjįʼ Diyin God bichʼįʼ sodiszin, áko éí, biyáʼátʼéehii dóó bidiyingo joobaʼ doo nineelʼáanii binahjįʼ, níiníłką́ąjįʼ tsʼídá yéigo yínídlą́ągo éí nikʼijidlíi doo.

4 Dóó kʼad, shiyeʼ, díí tsʼídá yéigo bąąh shíniʼígíí bee nichʼįʼ hadeesdzih; háálá éí díí saad ahídaahtʼáhígíí ayóó bąąh shíniʼ.

5 Háálá, díí tʼáá aaníí shił bééhózingo, nihaʼáłchíní yázhí tó bee yilzį́hígíí biniinaa éí saad ahídasoohtʼą́.

6 Dóó kʼad, shiyeʼ, díí baa saad hólónígíí éí tʼáá íiyisíí doo ákótʼée da, áko díí ndootʼihígíí éí tʼáá íiyisíí binanilnishgo ádíílííł, áko, háálá díí biniiyé nichʼįʼ iʼiishłaa.

7 Tʼáá nihitah hólónígíí shił bééhoozingo Bóhólníihii baa binabídéełkid. Dóó Bóhólníihii bizaad Iiʼsizį́ Diyinii bibee adziilii binahjįʼ yee shichʼįʼ haadzííʼ, kóníigo:

8 Christ, niNináʼnídláii, niBóhólníihii dóó niDiyin God, éí bizaad yísíníłtsʼą́ą́ʼ. Jó, nihookáaʼgi níyáago éí bąąhági ádaatʼéii niheʼiinaʼ łahgo áńdaahdlééh bidideeshniił biniiyé doo éí yáʼátʼéehgo dahinánígíí kóbidishní biniiyé da; bitah yáʼáhootʼéhígíí éí doo azeeʼííłʼíní bá wókeed da, ndi tʼáá hazhóʼó doo bitah dahatsʼídígíí tʼéiyá; ákohgo, áłchíní éí hadaałtʼé, háálá adoosihígíí éí doo yíighah da; ákohgo Adam asiihgo bá nihootʼánę́ę éí shí shinahjįʼ bá nahjįʼ kólyaa, áko éí doo bídéétʼiʼ da; dóó ąąh nahiníłgizhę́ę bibeehazʼáani ałdóʼ shiiʼ ninítʼiʼ.

9 Dóó kótʼéego éí Iiʼsizį́ Diyinii éí Diyin God bizaad shichʼįʼ ííshjání áyiilaa; ákohgo, shiyeʼ ayóí ííníshʼníinii, díí shił bééhózin éí áłchíní yázhí tó bee yilzį́hígíí, éí Diyin God tʼáá íiyisíí bá nahaltʼiʼígíí átʼé.

10 Jó kónidishní díí éí bee naʼnítin doo—iiná łahgo ánáálnééh dóó tó bee alzį́į́h éí bíighahgo béédááhai dóó bąąhági átʼéii íidoolííł yídáághahígíí bichʼįʼ; aooʼ, amá dóó azhéʼé danilínígíí niheʼiinaʼ łahgo áńdaahdlééh dóó tó bee danihiʼdilzį́į́h, dóó nihaʼáłchíní nahalingo hojoobaʼgo ídaʼdółnééh, bidiníigo bínabiníłtin, dóó baʼáłchíní yił yisdáhidookah.

11 Dóó baʼáłchíní yázhí éí dóó beʼiinaʼ łah áńdeidoodlíił da, dóó ałdóʼ doo tó bee doolzį́įł da. Jó, beehazʼáanii bikʼehgo tó bee alzį́į́h éí hweʼiinaʼ łahgo áńjiilʼįįhgo bąąhági átʼéii haa néidiitʼaah.

12 Ndi áłchíní yázhí éí Christ ńléí hodeeyáhą́ądą́ą́ʼ, biníkááʼ góneʼ dahiná; díí doo ákótʼéégóó, éí Diyin God łahgo ánááʼníłígíí nilį́į doo; dóó Diyin God binahatʼaʼ łahgo ánáyoodlíiłii átʼée doo, dóó diné doo tʼáá aheełtʼéego yaa ntsékeesí nilį́į doo; háálá haashį́į́ néelą́ą́ʼ áłchíní yázhí daneezná tʼah doo tó bee dabiʼdilzį́į́hgóó!

13 Ákohgo, áłchíní yázhí doo tó bee dabiʼdilzį́į́hgóó éí doo yisdánáhidookahgóó áko, éí hoolʼáágóó chʼį́įdiitahgóó éí dóó nińtʼiʼjįʼ aheeskai doo ńtʼę́ę́ʼ.

14 Jó shí ándishní, tʼáá háíshį́į́ áłchíní yázhí tó bee daasį́į́h nínígíí éí tsʼídá doo ákótʼéego ání, dóó doo yáʼáhootʼéehgi nahaleʼ da; háálá oodląʼ, chohooʼį́, dóó diyingo ayóó óʼóʼní éí bee ádin; ákohgo ákwíizhnízingo ntsíjíkeesgo ájídingo, eí chʼį́įdiitahgóó jidoogááł.

15 Háálá tsʼídá doo yáʼátʼéehgo ntsáhákeesii átʼé Diyin God éí awééʼ tʼááłáʼígo yisdéidoołtééł tó bee yilzį́ʼígíí binahjįʼ, dóó tʼáadoo tó bee dabiʼdiilzį́ʼę́ę éí ałtso dadínóonééł hwiinidzinígíí.

16 Yíi tʼáá háiida kótʼéego Bóhólníihii bibee oʼoolʼįįł łahgo ánáyoodlíłígíí éí doo yáʼáshǫ́ǫgo ádił hwiidoołʼaał, háálá díí doo hweʼiinaʼ łahgo áńjídléehgo éí Diyin God bitsʼą́ą́dóó nahjįʼ kóhodiʼdoolnííł. Jó, Diyin God díí yichʼįʼ shííłʼaadígíí biniinaa doo násdzidgo yáshtiʼ; dóó diné lá haa dashidoolíił doo nisin da; háálá ayóó óʼóʼníinii hadaałtʼéii éí báhádzidę́ę nahjįʼ kódeileʼ.

17 Dóó diyingo ayóó óʼóʼníinii éí shiiʼ hólǫ́, díí éí ayóó óʼóʼní doo nińtʼiʼii átʼé, ákohgo, áłchíní éí tʼáá ałtso tʼáá shił aheełtʼé; ákohgo, áłchíní yázhí doo bąąh chinii bee ayóí ííníshʼní; dóó éí éí tʼáá ahidaałtʼé dóó yisdánáʼiildéehii éí bikʼéstiʼ.

18 Háálá shił bééhózin Diyin God binahatʼá doo łahgo ííłʼį́į da, dóó doo łahgo ánéidoodlíił da; ndi éí éí hoolʼáajįʼ binahatʼá tʼáá átʼéhę́ęgi átʼé.

19 Áłchíní yázhí iiná łahgo ánéídlééh éí doo yíighah da; ákohgo, doo yáʼátʼéehii átʼéii da Diyin God tʼáá ákogi bibee ajoobaʼ bee bichʼįʼ baa hochʼįʼgo, háálá éí yee dahiná beʼajoobaʼii binahjįʼ.

20 Dóó tʼáá háíshį́į́ áłchíní yázhí éí tó bee daalzį́į́h nínígíí éí Christ bibee ajoobaʼ doo dayoodlą́ą da, dóó bąąhági átʼéii yikʼé nináʼnídláhígíí dóó bee yisdánáʼiiʼnííł bibee adziilii éí tʼáadoo bą́ą́h ílínígo yaa ntsídaakees.

21 Yíi éí ákódajitʼéhígíí, éí doo há yáʼáhootʼéeh da háálá anoonééł, dóó chʼį́įdiitah, dóó hoolʼáágóó tiʼhooʼníihii hakʼi siláa dooleeł. Díí éí tʼáadoo naanishʼíní bee yáshtiʼ; Diyin God áshiłníigo. Díí deísínóołtsʼą́ą́ʼ doo bikʼeh dahonołʼį́, éí doodago éí nihikʼijįʼ ńdoodleeł Christ nihwiiʼaah bikááʼdahʼasdáhídi nihisookaigo.

22 Jó áko háálá tʼáá ałtso áłchíní yázhí éí dahiná Christ binahjįʼ, índa beehazʼáanii bee ádaadinígíí ałdóʼ ákótʼé. Háálá yisdánáʼiildééh éí beehazʼáanii bee ádaadinígíí bikʼéstiʼ; ákohgo, háiida doo bá nihootʼánígíí, índa háiida doo bikʼijįʼ saad siʼánígíí, éí beʼiinaʼ łahgo ánéídléehgo doo bíighah da; dóó éí bichʼįʼgo tó bee alzį́į́h tʼáadoo nilíní da—

23 Ndi díí éí Diyin God bichʼįʼgo tʼóó aa oodloh átʼé, Christ bibee ajoobaʼ, dóó Iiʼsizį́ Diyinii bibee adziilii doo jinízingóó, dóó doo ndaalnishii joodlą́ągo.

24 Jó, shiyeʼ, díí tʼáadoo leʼé éí doo ákótʼée da łeh; háálá iiná łahgo ánálnéehii éí ndabiʼdilkaahii bá dóó beehazʼáanii kʼéʼéltǫʼígíí yiyaadóó bá haʼoodzííʼ.

25 Dóó iiná łahgo ánááʼníłígíí tsʼídá áłtsé bee bééhózinígíí éí tó bee alzį́į́h; dóó Diyin God bibeehazʼáanii ałtso beʼalʼįįhgo índa tó bee alzį́į́h; dóó beehazʼáanii ałtso beʼalʼįįhgo índa bąąhági átʼéii aa náhiditʼááh;

26 Dóó bąąhági átʼéii aa ńdítʼááh éí aa hojoobaʼ dóó ajéí hojoobaʼ íinízin bitsʼą́ą́dóó nihwiileeh; dóó háálá aa hojoobaʼ dóó ajéí hojoobaʼ áhwiinidzin bitsʼą́ą́dóó Iiʼsizį́ Diyinii hoł haleeh, éí Haa Áhályáanii chohooʼį́ dóó ayóó óʼóʼní haałtʼéhígíí hwiiʼ haidiłbį́į́h, éí ayóó óʼóʼníinii éí sodizin bee nízaadgo dinaʼ, níiníłką́ąjįʼ, Jesus yá naazínígíí tʼáá ałtso Diyin God yił kéédahatʼį́ silį́įʼjįʼ.

27 Jó, shiyeʼ, nichʼįʼ ánáádeeshdlííł, doo hah Laman bidineʼé bikʼijįʼ náádadiibáahgo. Jó, Nephi bidineʼé, bee ádaa hodzódlí, éí ábidoołdįįł tʼáá hazhóʼó beʼiinaʼ doo łahgo áńdeidlééhgóó.

28 Éí bá sodílzin, shiyeʼ, áko iiná łahgo áńdoolnííł bichʼįʼ kódoolnííł. Jó ndi, shí éí bá násdzid háálá Iiʼsizíinii éí doo bił dahólǫ́ǫ da silį́į́ʼ; dóó kojí nihił hazʼáníjí éí tsʼídá tʼáá ałtso Diyin God bibee adziilii dóó bibee óhólnííh nahjįʼ kódeiłʼį́; dóó Iiʼsizį́ Diyiniidóʼ doo hólǫ́ǫ da daaní.

29 Dóó tsʼídá tʼóó ahayóí Diyin God binaʼnitin bił béédahózingo éí ałtso yóó, adeideezʼą́, shiyeʼ, áko éí tʼáadoo hodíinaʼí azhdoodįįł, Diyin God yá halneʼii náásgóó ádahodoonííł daanínę́ę, dóó Yisdáʼiiníiłii tʼáá bí náásgóó ádahodoonííł yaa halneʼ ninę́ę éí ałdóʼ bidaʼdoolnííł.

30 Hágoóneeʼ, shiyeʼ, nichʼįʼ anááʼiishdlaago índa, éí doodago nááʼahiidiiltséełgo da índa. Amen.