1 Wen sacohk nuhtihk, nga sifilpac sihm nuh sum tuh kom in kuh in etuh lah nga srwackna moul; tuhsruhk nga sihm kuhtuh ke ma ahksuhpwacr.

2 Tuh liye, nga mweun upac nuh sin mwet Laman, ac kuht tiacna kuhtanglah; ac Archeantus el misac ke katlas, ac oacyacpac Luram ac Emron; ahok, ac puhslac mwet wo lasr misac.

3 Ac inge liye, wen nuhtihk, nga fosrngah tuh mwet Laman ac fah kuhnahoslah mwet inge; tuh elos tiacna auliyak, ac Setuhn el puhrakuhlosyak pacl nuhkwewa in kasrkuhsrak sin sie sin sie.

4 Liye, nga orekma nuh selos pacl nuhkwewa; ac ke nga sramsram kohsroh ke kahs luhn God elos rarrar ac kasrkuhsrak lainyuc; ac ke nga tiac orekmakihn kahs kohsroh elos ahkkwekweye insiaclos in lain ma inge; ohinge, nga fosrngah tuh Nguhn luhn Leum tui tilac weluhlos.

5 Tuh elos arulacna kasrkuhsrak oruh nuh sihk oacna in muh wacngihn sahngweng lalos ke misac; ac wacngihnlac luhngse lalos, nuh sin sie sin sie; ac elos pwacr in ahksohrohrye srah ac fohlohksahk pacl nuhkwewa.

6 Ac inge, wen kuloh nuhtihk, finne kwekwe insiaclos, lwelah kuht in oaru in orekma; tuh kuht fin tui ke orekma uh, kuht ac utucklac nuh ye kalyeiyuck; tuh oasr orekma se lasr in oruh ke kuht muhta ke mahno luhn infohk uh, tuh kuht in kuh in kuhtanglah mwet lokoalok luhn suwohswohs nuhkwewa, ac in monglac nguhnasr ke tohkohsrahi luhn God.

7 Ac inge nga sihm kuhtuh ke kweok luhn mwet inge. Tuh in fal nuh ke etwacack ma nga eis sel Amoron, liye, mwet Laman elos sruokyac mwet srohoh pucspucs, ma elos eislah liki tower lal Sherrizah; ac oasr mukul, muhtwacn, ac tuhlihk.

8 Ac mukul tuhmwacn ac pahpah tuhmwacn muhtwacn ac tuhlihk ah elos tuh acnwucki; ac elos kihte muhtwacn ah ke ikoacn mukul tuhmwaclos, ac tuhlihk ah ke ikoacn pahpah tuhmwaclos; ac wacngihn kof, sahyacn na kihtinmac, ma elos sang nuh selos.

9 Ac finne ke ma sruhngwacyuck na yohk se luhn mwet Laman inge, ma inge tiacna upac liki ma luhn mwet lasr fin acn Moriantum. Tuh liye, acn pucspucs nuhtin mwet Laman elos uslah srohoh; ac tukun elos eislah luhkwelos ma yohk srihpac ac sacohk emet liki ma nuhkwewa, suc pa nwacsnwacs ac wo—

10 Ac tukun elos oraclah ma se inge, elos uniltahluh ke ohiyac na ahkmas upac, ahkkweokye mahnolos ne ke na elos misac; ac tukun elos oraclah ma se inge, elos kanglah ikoaclos oacna kosro lwemnak suhlallacl, ke srihpen kwekwe luhn insiaclos; ac elos oruh ma inge in sie mwe akucl luhn puhlaik.

11 O wen kuloh nuhtihk, fuhkah tuh kain mwet inge, ma wacngihn kasrpac—

12 (Ac lusen yac na puh somlah, ac elos tuh sie un mwet oasr kasrpac ac engan)

13 Tuhsruhk O wen nuhtihk, fuhkah tuh kain mwet inge, suc engan la oasr ke ma sruhngwacyuck pucspucs—

14 Kuht ac muhngnguh fuhkah tuh God Elan kutongyac pahol in nuhnuhnkuh lain kuht?

15 Liye, insiuck tuhng: We nuh sin mwet inge. Illac tuhkuh ke nuhnuhnkuh, O God, ac okanlah orekma koluk, ac ma koluk, ac ma sruhngwacyuck lalos liki ye motom!

16 Ac sifilpac, wen nuhtihk, puhkantwen katinmas ac acn nahtuhlos suc muhta na fin acn Sherrizah; ac ipin mwe kahsruh ma mwet Laman elos tiac uslah, liye, un mwet mweun lal Zenephi elos uslah, ac fuhlweloslac in forfor nuh ke oacna sie acn ma elos kuh in sokwack mongo; ac muhtwacn mahtuh pucspucs elos muhlallah pe inkacnek uh ac misac.

17 Ac un mwet mweun ma wiyuc uh elos muhnahslah; ac un mwet mweun luhn mwet Laman elos oasr inmahsrlok ac Sherrizah; ac elos suc kahinglac nuh yurun un mwet mweun lal Aaron ah elos puhtatyang nuh ye ahkkohs upac lalos.

18 O koluklacna luhn mwet luhk! Wacngihn akwuck ac wacngihn pahkotwen yohrohlos. Liye, nga sie mwet, ac nga fokoko oacna sie mwet, ac nga tiacna kuh in sifilpac sapsap.

19 Ac elos upaclah ke orekma koluk lalos; ac elos oacna sie ke ahkkohs, tiac molwelah kuhtwena mwet, mwet mahtuh ac mwet fuhsr; ac elos pwacr ke ma nuhkwewa sahyacn ma wo; ac kweok luhn muhtwacn lasr ac tuhlihk nahtuhsr fin acn nuhkwewa inge ahluhkwelah ma nuhkwewa; ahok, lohoh tiac kuh in fahk, tiac pac kuh in sihmihsyucklac.

20 Ac inge, wen nuhtihk, nga tiac sifilpac sruhmuhn ma koluk sikyak inge. Liye, kom etuh koluk luhn mwet inge; kom etuh lah wacngihnlac ohiyac wo lalos, ac ahluhkwelah ma puhlakihnyuck; ac ma koluk lalos ahluhkwelah ma koluk luhn mwet Laman.

21 Liye, wen nuhtihk, nga tiac kuh in fahkuhlos wo nuh sin God tuh nga fosrngah muh El ac sruhngluhlos.

22 Tuhsruhk liye, wen nuhtihk, nga fahk wo keim nuh sin God, ac nga luhlahlfongi ke Kraist tuh kom ac fah moliyucklac; ac nga pruhe nuh sin God tuh Elan fuhlweoht moul lom an, in liye fohlohk luhn mwet inge nuh Yohrohl, kuh kuhnausyucklac lalos; tuh nga etuh lah elos enenuh in misac fin elos tiac auliyak ac fohlohk nuh Yohrohl.

23 Ac elos fin misac ac oacna nuh sin mwet Jared, ke srihpen kwekweiyacn insiaclos, in suk srah ac fohlohksahk.

24 Ac elos fin misac, kuht etuh lah puhs sin mwet wiyacsr tuh som welah mwet Laman, ac mwet pucspucs oacyacpac fah som weluhloslyang; ohinge, suhmuhslah ke kuhtuh ma puh, kom fin painmoullac ac nga misac ac tiac liye kom; tuhsruhk nga luhlahlfongi muh nga kuh in liye kom ke pacl na sa; tuh oasr ma sihmlac muhtahl sihk ma nga ac usot nuh sum.

25 Wen nuhtihk, luhlahlfongi ke Kraist; ac nimet lwelah ma nga sihmihs nuh sum uh in ahksuhpwacrye kom, in ahktoasrye kom nuh ke misac; tuhsruhk lwelah tuh Kraist Elan sruhkkomyak, ac lwelah tuh kweok ac misac Lal, ac ahkkahlwemye luhn mahnol nuh sin pahpah tuhmwacsr, ac pahkotwen ac mongfihsrwacsr Lal, ac finsrak ke wolacna Lal ac ke moul ma pahtpaht, in oan na ke nuhnak lom an ne tok ma pahtpaht.

26 Ac lwelah tuh luhng kuhlwacng luhn God suc Pahpah, suc tron lal oasr lucng inkuhsrao, ac Leum lasr Jisus Kraist, suc muhta ke lacpo lacyot ke kuh Lal, ne ke na ma nuhkwewa fah oan ye kuh Lal, in, ac wi kom ne tok ma pahtpaht. Amen.