1 Heẽ, ndeʼíri piko Isaías: Máva piko ogueroviákuri ñane ñemombeʼu, ha mávape piko ojehechauka Ñandejára jyva?

2 Okakuaátagui henondépe peteĩ kaʼavo kyrỹicha, ha peteĩ yvy ikãva rapóicha; ndaipóri hese porãngue ni techapyrã; ha jahecha vove, ndaiporimoʼãi hese porã jaipota hag̃ua chupe.

3 Haʼe ojejahéi ha ojerrechasa yvyporakuérare; kuimbaʼe ohasaʼasýva, ha oikuaáva ñembyasýgui; ha ñamokañývaicha chugui ñande rova; ojejahéi hese, ha ndajahayhúi chupe.

4 Añetehápe haʼe ogueropuʼaka ñane ñembyasykuéra; ha ogueraha ñande jehasaʼasykuéra; upevére jaguereko chupe ohasaʼasývaicha, ojeipyʼajopýva Tupãre ha oikoʼasývaramo.

5 Ha katu ñane rembiapovaikuérare haʼe ojejopy, ha oñeinupã ñande rembiapovaikuérare; ha ñande pyʼaguapy ñeinupã hoʼa hiʼári; ha illagakuérare ñañemonguera.

6 Opavave ñande, ovecháicha, ñasẽ ñande rapégui; ñañemboyke ñande rapére opavave; ha Ñandejára omoĩ hiʼári opa ñane rembiapovaikuéra.

7 Haʼe ojejopy, ha oikoʼasy, ha upevére ndoipeʼái ijuru; haʼe ojegueraha ovecharaʼýicha mymba jejukahápe, ha ovecháicha ijukaharã renondépe opyta kirirĩme, ha péicha haʼe ndoipeʼái ijuru.

8 Kaʼirãi ha huísiogui ojeipeʼa; ha máva piko omombeʼúta iñemoñareʼaty? Ojeipeʼágui oikovevakuéra retãgui; che tavayguakuéra rembiapovaíre haʼe ojeipyʼajopy

9 Iñañáva ndive haʼe omoĩ iñeñotỹha, ha ipirapire hetáva ndive oĩ iñemanóme; ndojapóigui haʼe mbaʼeve ivaíva, ni ndaipóri japu ijurúpe.

10 Upevére ombohasaʼasyse chupe Ñandejára; omoĩ hiʼári ñembyasy; rejapo vove hiʼángagui kuaveʼẽ angaipáre haʼe ohecháta iñemoñare, ombopukúta hiʼarakuéra ha Ñandejára rembipota oñakãrapuʼãta ipópe.

11 Haʼe ohecháta hiʼánga jehasaʼasy, ha henyhẽta; ikuaapy rupi che rembiguái hekojojáva ohustifikáta hetápe; ogueropuʼakátagui hembiapovaikuéra.

12 Upévare ameʼẽta chupe peteĩ pehẽngue umi tuicháva ndive, ha haʼe ombojaʼóta pe mondapyre umi imbaretéva ndive; haʼe oñohẽgui hiʼánga omano meve, ha ojeipapa chupe tembiapovai apohakuéra ndive; ha ogueropuʼaka heta angaipakuéra, ha oñemombyte umi tembiapovai apoha rehe.