1 Koʼág̃a oĩ Shemlón-pe peteĩ tenda lamanita-kuéra rajy oñembyatyhápe opurahéi, ha ojeroky, ha ovyʼa hag̃ua.

2 Ha ojehu peteĩ ára oñembyaty mbovymi ijapytepekuéragui opurahéi ha ojeroky hag̃ua.

3 Ha koʼág̃a umi rréi Noé sacerdote, otĩgui ohojey hag̃ua Nefi retãme, heẽ, ha avei okyhyjégui umi tavayguakuéra ojukataha chupekuéra, noñanimái ohojey hikuái hembireko ha itaʼyrakuéra rendápe.

4 Ha opytávo pe taveʼỹme, ha ojuhúvo lamanita-kuéra rajýpe, okañy hikuái ha omaʼẽñemi hesekuéra;

5 Ha oñembyaty jave mbovymínte ijapytepekuéragui ojeroky hag̃ua, haʼekuéra osẽ iñemihágui, ha ojagarra chupekuéra ha ogueraha pe taveʼỹme; heẽ, veinticuatro Lamanita rajykuérape ogueraha hikuái taveʼỹme.

6 Ha ojehu lamanita-kuéra ohechakuaámarõ itajyrakuéra okañyha, ipochy Limhi tavayguakuéra ndive, oimoʼãgui hikuái haʼehague Limhi tavayguakuéra.

7 Upévare haʼekuéra omondo ijehersitokuéra; heẽ, jepe pe rréi oho itavayguakuéra renondépe; ha haʼekuéra ojupi Nefi retãme ohundi hag̃ua Limhi tavayguakuérape.

8 Ha koʼág̃a Limhi ohecha chupekuéra pe tórre guive, jepe opa iñembosakoʼikuéra ñorairõrã haʼe ohecha; upévare haʼe ombyaty itavayguakuérape ha ohaʼarõ chupekuéra kañyhápe umi ñu ha kaʼaguýpe.

9 Ha ojehu lamanita-kuéra ojupi vove, Limhi tavayguakuéra oñepyrũ hoʼa hiʼarikuéra iñemihágui, ha oñepyrũ ojuka chupekuéra.

10 Ha ojehu pe ñorairõ ipohyieterei, oñorairõgui hikuái leõicha imondapyrére.

11 Ha ojehu Limhi tavayguakuéra oñepyrũ ogueraha lamanita-kuérape henonderã; jepe ndahetái hikuái umi lamanita-kuéraicha. Ha katu haʼekuéra oñorairõ hekovére, ha hembirekokuéra, ha itaʼyrakuérare; upévare haʼekuéra oñehaʼãmbaite ha oñorairõ dragõicha.

12 Ha ojehu haʼekuéra ojuhu lamanita-kuéra rréipe heʼõnguekuéra apytépe; upevére haʼe nomanói gueteri, ojekutu ha ojehejávo yvýpe, pyaʼetereígui itavayguakuéra ñekañy.

13 Ha ojagarra chupe hikuái ha ojokua ojeikutu haguépe, ha ogueru chupe Limhi renondépe, ha heʼi hikuái: Péina ápe, koʼápe oĩ lamanita-kuéra rréi; ojekutúvo hoʼákuri heʼõnguekuéra apytépe, ha haʼekuéra oheja chupe; ha péina ápe, ore rogueru nerenondépe; ha koʼág̃a eheja torojuka chupe.

14 Ha katu Limhi heʼi chupekuéra: Ndapejukamoʼãi chupe, ha katu peguerúta koʼápe che ahecha hag̃ua. Ha ogueru chupe hikuái. Ha Limhi heʼi chupe: Mbaʼére piko peju ñorairõme che tavayguakuéra rehe? Péina ápe, che tavayguakuéra niko nomondorói pe ñeʼẽmeʼẽ che ajapovaʼekue peẽme; upévare, mbaʼére piko peẽ pemondorovaʼerã pe ñeʼẽmeʼẽ pejapovaʼekue che tavayguakuérape?

15 Ha koʼág̃a pe rréi heʼi: Che amondoro pe ñeʼẽmeʼẽ nde tavayguakuéra oguerahágui che tavayguakuéra rajykuéra; upévare, che pochýpe ajapo che tavayguakuéra ou ñorairõme nde tavayguakuéra rehe.

16 Ha koʼág̃a Limhi nohendúikuri mbaʼeve koʼã mbaʼégui; upévare haʼe heʼi: Che ahekáta che tavayguakuéra apytépe ha oimeraẽva ojapovaʼekue ko mbaʼe omanóta. Upévare haʼe ohekauka itavayguakuéra apytépe.

17 Koʼág̃a Gedeón ohendúvo koʼã mbaʼe, haʼévo haʼe upe rréi tendota, osẽ ha heʼi upe rréipe: Ajerureʼasy ndéve ejejoko hag̃ua, ha ani eheka ko tavayguakuéra apytépe, ha ani emboja koʼã mbaʼe hesekuéra.

18 Nanemanduʼái piko nde ru sacerdote-kuérare, ko tavayguakuéra ohundisevaʼekuépe? Ha noĩri piko haʼekuéra pe taveʼỹme? Ha ndahaʼéi piko haʼekuéra omondavaʼekue lamanita-kuéra rajýpe?

19 Ha koʼág̃a, péina ápe, emombeʼu koʼã mbaʼe upe rréipe, haʼe heʼi hag̃ua itavayguakuérape; ha taipyʼaguapy ñanendive hikuái; péina ápe oñembosakoʼímagui hikuái ou hag̃ua ñorairõrã ñande rehe; ha rehecha avei ñanembovyha.

20 Ha péina ápe, ou hikuái heta ijaty reheve; ha pe rréi nombopyʼaguapýiramo chupekuéra ñanendive ñamanóta.

21 Ha noñekumplíri piko umi Abinadí ñeʼẽ, haʼe oprofetisavaʼekue ñande rehe—ha opa koʼã mbaʼe nañahenduséigui Ñandejára ñeʼẽnguéra, ni ndajahejaséigui ñane rembiapovaikuéra?

22 Ha koʼág̃a ñambopyʼaguapy upe rréipe, ha ñakumpli pe ñeʼẽmeʼẽ jajapovaʼekue chupe; iporãvégui ñaime ñeñapytĩmbýpe ojeipeʼarangue ñandehegui ñande rekove; upévare, ñambopaha hetaite tuguy ñeñohẽ.

23 Ha koʼág̃a Limhi omombeʼu pe rréipe opa mbaʼe itúva, ha umi sacerdote okañyvaʼekue taveʼỹme rehegua, ha omoĩ hesekuéra omondahague itajyrakuéra.

24 Ha ojehu pe rréi oñembopyʼaguapy Limhi tavayguakuéra ndive; ha heʼi chupekuéra: Ñasẽ ñahug̃uaitĩ che tavayguakuérape, armaʼỹre; Ha añeʼẽmeʼẽ peẽme peteĩ ñeʼẽmeʼẽme che tavayguakuéra ndojukamoʼãiha nde tavayguakuérape.

25 Ha ojehu haʼekuéra oho pe rréi rapykuéri, ha osẽ hikuái armaʼỹre ohug̃uaitĩ hag̃ua lamanita-kuérape. Ha ojehu ohug̃uaitĩ hikuái lamanita-kuérape; ha pe lamanita-kuéra rréi ojaivy henondepekuéra, ha ojerure Limhi tavayguakuéra rehe.

26 Ha lamanita-kuéra ohechávo Limhi tavayguakuéra, oĩha armaʼỹre, oiporiahuvereko chupekuéra, ha oñembopyʼaguapy hendivekuéra, ha ohojey irréi ndive pyʼaguapýpe hetãnguérape.