1 Ut anajwan, kik’ulman naq chirix naq laj Abinadi kixye li aatin a’in kixye’ li ruq’ ut kixye: Taachalq xq’ehil naq chixjunileb’ te’ril lix kolb’a-ib’ li Qaawa’; naq li junjunq chi tenamit, junkab’al, aatinob’aal ut teepal te’ril rik’in ruheb’ ut te’xch’olob’ chiru li Dios naq tiik ru lix raqb’a-aatin.

2 Toja’ ut naq te’isiiq chaq laj maak, ut taawanq rajb’al naq te’xq’ich re, ut te’yaab’aq, ut te’ayaynaq, ut te’xk’uxuxi ruch re; ut a’in xb’aan naq ink’a’ ke’raj ab’ink chiru lix yaab’ xkux li Qaawa’; jo’kan naq li Qaawa’ ink’a’ naxtojeb’ rix.

3 Xb’aan naq aj raholeb’ tz’ejwalej ut jo’keb’ laj tza, ut laj tza wan xwankil sa’ xb’eeneb’; relik chi yaal, li najter aj k’anti’ a’an li kib’alaq’ink re li xb’een qana’ qayuwa’, ut xb’aan a’an naq ke’t’ane’, ut xb’aan a’an naq chixjunileb’ li winq ke’ok choq’ aj rahol tz’ejwalej, aj atawinel, jo’keb’ laj tza, chi ak neke’xnaw b’ar wan li us ut li ink’a’ us, a’ut neke’xk’e rib’ rub’el xwankil laj tza.

4 Chi jo’kan chixjunileb’ li winq sachenaqeb’ chaq, ut k’ehomaq reetal, ke’kana raj chi sachenaq chi maak’a’ roso’jik wi ta li Dios ink’a’ kixtoj rix lix tenamit chiru li sachk ut li t’ane’k li wankeb’ wi’.

5 A’b’an chijultiko’q eere naq ani nakana sa’ li tz’ejwalejil na’leb’ li ak re, ut toj naxik sa’ xb’ehil li maak ut li po’resink ch’oolej chiru li Dios, a’an nakana sa’ li t’ane’k wan wi’, ut laj tza wan anchal xwankil sa’ xb’een. Jo’kan naq a’an wan chanchan naq maajun tojb’al-ix ki’uxman, ut wan choq’ aj xik’ ilonel re li Dios, ut jo’kan ajwi’ laj tza aj xik’ ilonel re li Dios.

6 Anajwan ut wi ta li Kristo ink’a’ kichal sa’ li ruchich’och’, ut nin’aatinak chirix li k’a’aq re ru toj taachalq chanchan naq ak chalenaq, ink’a’ raj kiru kiwan li tojb’al-ix.

7 Ut wi ta li Kristo ink’a’ xwakli chaq sa’ xyanqeb’ li kamenaq, malaj ink’a’ kixtoq lix b’ak’leb’ li kamk re naq li muqleb’aal kamenaq moko taawanq ta xq’axom ru, ut re naq maak’a’aq xmay li kamk, ink’a’ raj taaruuq taawanq junaq wakliik chi yo’yo.

8 A’b’an wan jun li wakliik chi yo’yo, jo’kan naq li muqleb’aal kamenaq maak’a’ xq’axom ru, ut lix may li kamk sub’b’il rib’ rik’in li Kristo.

9 A’an lix saqen ut lix yu’am li ruchich’och’; relik chi yaal, jun li saqen li maak’a’ roso’jik, li maajo’q’e naru xq’ojyinob’resinkil; relik chi yaal, ut jo’kan ajwi’ jun li yu’amej li maak’a’ roso’jik, re naq moko taaruuq ta chik taawanq li kamk.

10 A’ li k’a’ru a’in nakam tixk’e chirix li ink’a’ nakam, ut li k’a’ru a’in naq’a tixk’e chirix li ink’a’ naq’a, ut taak’ame’q chi xaqliik chiru lix raqleb’aal aatin li Dios, re taaraqe’q aatin chirix xb’aan a’an, a’ yaal jo’ chanru lix k’anjeleb’, ma useb’, malaj ink’a’ useb’—

11 Wi useb’, re wakliik chi yo’yo sa’ li yu’amej ut sahil ch’oolejil li maak’a’ roso’jik, ut wi ink’a’ useb’, re wakliik chi yo’yo sa’ li tojb’a-maak maak’a’ roso’jik, chi q’axtesinb’ileb’ chiru laj tza, li xk’eheb’ rub’el xwankil, a’ li tojb’a-maak—

12 Rik’in naq xikenaqeb’ jo’ chanru lix tz’ejwalejil ajomeb’ ut atawomeb’ a’an, chi maajun wa ke’xpatz’ xk’ab’a’ li Qaawa’ naq ye’b’il ruq’ li uxtaan chiruheb’; xb’aan naq li ruq’ li uxtaan kiye’e’ chiruheb’, ut ink’a’ ke’raj; ke’tije’ chaq chirix lix maa’usilaleb’, a’b’an ink’a’ ke’raj elk rik’in; ut ke’taqlaak chixjalb’al xk’a’uxleb’ a’b’an ink’a’ ke’raj xjalb’aleb’ xk’a’uxl.

13 Ut anajwan, ma ink’a’ tento raj texsiksotq ut teejal eek’a’uxl chirix lee maak, ut taajultiko’q eere naq ka’ajwi’ rik’in ut sa’ xk’ab’a’ li Kristo taaruuq texkole’q?

14 Jo’kan ut, wi nekek’ut lix chaq’rab’ laj Moises, k’utumaq ajwi’ naq a’an xmuhil li k’a’aq re ru a’an li toj taachalq—

15 K’utumaq chiruheb’ naq li tojb’al-ix nachal sa’ xk’ab’a’ li Kristo li Qaawa’, a’an tz’aqal li Junelik Yuwa’b’ej. Amen.