1 Ut anajwan, kik’ulman naq laj Alma, li ki’eelelik chaq chiruheb’ lix moos li rey aj Noe, kixjal xk’a’uxl chirix lix maak ut lix maa’usilal, ut xko’o sa’ muqmu sa’ xyanqeb’ li tenamit, ut ki’ok chixk’utb’al li raatin laj Abinadi—

2 Relik chi yaal, chirix li k’a’ru toj taachalq, ut chirix ajwi’ lix waklijikeb’ li kamenaq chi yo’yo, ut lix tojb’aleb’ rix li tenamit, li taak’ehe’q chi uxmanq sa’ xk’ab’a’ lix wankil, ut li rahilal tixk’ul, ut lix kamik li Kristo, ut lix waklijik chi yo’yo ut lix taqik sa’ choxa.

3 Ut jo’ k’ihal ke’ajok re rab’inkil li raatin, a’an kixtzoleb’. Ut kixtzoleb’ sa’ muqmu, re naq ink’a’ taanawe’q xb’aan li rey. Ut naab’aleb’ li ke’paab’ank re li raatin.

4 Ut kik’ulman naq jo’ k’ihaleb’ ke’paab’ank re xkoheb’ sa’ jun li na’ajej, Mormon xk’ab’a’, k’eeb’il xk’ab’a’ xb’aan li rey, ut wan sa’ xmaril li ch’och’ b’ar wi’ neke’wan, chi jo’q’ehaq, malaj sa’ tz’aqal xq’ehil, li k’iche’ xul.

5 Anajwan, aran Mormon wan jun yo’leb’aal li saqen ruhil ha’, ut laj Alma aran nawulak, xb’aan naq aran chixk’atq li ha’ wan xpimul li kok’ xtoonal li che’, b’ar wi’ naxmuq rib’ chi kutan chiruheb’ laj sik’onel re li rey.

6 Ut kik’ulman naq jo’ k’ihaleb’ ke’paab’ank re xkoheb’ aran re rab’inkil li raatin.

7 Ut kik’ulman naq chirix k’iila kutan ke’wan naab’al rajlankil, ch’utch’uukeb’ sa’ li na’ajej Mormon, re rab’inkil li raatin laj Alma. Relik chi yaal, chixjunileb’ ke’wan chi ch’utch’u li neke’paab’ank re li raatin, re rab’inkil. Ut a’an kixtzoleb’, ut kixjultika chiruheb’ li jalok k’a’uxlej, ut li tojb’al-ix, ut xpaab’ankil li Qaawa’.

8 Ut kik’ulman naq a’an kixye reheb’: K’ehomaq reetal, wahi’ li ha’ Mormon (xb’aan naq jo’kan nak’ab’a’in) ut anajwan, jo’ wan eerajom ok sa’ lix korral li Dios, ut xtenamit a’an texk’ab’a’iiq, ut wan eech’ool chixk’amb’al eeriiq cherib’il eerib’ re naq taaseeb’o’q;

9 Relik chi yaal, ut wan eech’ool chi yaab’ak rik’ineb’ li neke’yaab’ak; relik chi yaal, ut xk’ojob’ankileb’ xch’ool li neke’ajok k’ojob’aak xch’ool, ut xaqliik jo’ aj yehol nawom chirix li Dios sa’ chixjunil hoonal, ut sa’ chixjunil li k’a’aq re ru, ut sa’ chixjunil li na’ajej texwanq wi’, toj reetal eekamik, re naq taaruuq taatoje’q eerix xb’aan li Dios, ut texk’ehe’q sa’ ajl eerochb’eeneb’ li te’tz’aqonq sa’ li xb’een wakliik chi yo’yo, re taaruuq taawanq eeyu’am chi junelik—

10 Anajwan ninye eere, wi a’in li rajom lee ch’ool, k’a’ b’i’ ru texch’a’ajko’q wi’ naq taakub’eeq eeha’ sa’ lix k’ab’a’ li Qaawa’, re xk’utb’al xyaalal chiru a’an naq okenaqex sa’ jun sumwank rik’in a’an, naq texk’anjelaq chiru ut teepaab’ lix taqlahom, re naq a’an tixhoy lix Musiq’ chi numtajenaq wi’chik sa’ eeb’een?

11 Ut anajwan naq eb’ li tenamit ke’rab’i li aatin a’in ke’xpoqpoqi li ruq’ xb’aan xsahileb’ xch’ool, ut ke’xye: A’in li ratawom li qach’ool.

12 Ut anajwan kik’ulman naq laj Alma kixk’am laj Helam, a’an jun reheb’ li xb’een, ut xko’o ut kixxaqab’ rib’ sa’ li ha’, ut kixjap re, ut kixye: At Qaawa’, hoy laa Musiq’ sa’ xb’een laa moos, re naq a’an tixb’aanu li k’anjel a’in rik’in xsantilal xch’ool.

13 Ut chirix naq kixye li aatin a’in, lix Musiq’ li Qaawa’ kiwan sa’ xb’een, ut a’an kixye: At Helam, ninkub’si aaha’, chi k’eeb’il inwankil xb’aan li Nimajwal Dios, re xch’olob’ankil xyaalal naq okenaqat sa’ jun sumwank naq tatk’anjelaq chiru toj reetal naq kamenaqat jo’ chanru li tz’ejwalej li nakam; ut lix Musiq’ li Qaawa’ chihoymanq sa’ aab’een; ut a’an chixk’ehaq aawe li junelik yu’am, sa’ xk’ab’a’ li tojb’al-ix xb’aan li Kristo, a’an li kixkawresi chaq chalen sa’ xk’ojlajik li ruchich’och’.

14 Ut chirix naq laj Alma kixye li aatin a’in, sa’ wiib’aleb’ laj Alma ut laj Helam ke’muqla sa’ ha’, ut ke’wakli ut ke’chal chaq sa’ li ha’ rik’in saho’k sa’ xch’ooleb’, chi nujenaqeb’ rik’in li Musiq’ej.

15 Ut jo’kan wi’chik, laj Alma kixk’am jun chik chirix, ut xko’o xkab’ sut sa’ li ha’, ut kixkub’si xha’ jo’ chanru li xb’een, ka’ajwi’ naq a’an ink’a’ kixmuq wi’chik rib’ sa’ li ha’.

16 Ut chi jo’ka’in kixkub’si xha’ li junjunq li koxwulaq sa’ li na’ajej Mormon; ut a’aneb’ tana’ wiib’ cient rik’in kaahib’ rajlankileb’ li aamej; relik chi yaal, ut ke’kub’e xha’ sa’ li ha’ Mormon, ut ke’nujak rik’in li rusilal li Dios.

17 Ut a’aneb’ lix iglees li Dios ke’yehe’ re, malaj lix iglees li Kristo, chalen chaq sa’ li q’ehil a’an. Ut kik’ulman naq yalaq ani nakub’e xha’ rik’in lix wankil li Dios, ut chi k’eeb’il wankilal xb’aan, ki’oksiman sa’ lix iglees.

18 Ut kik’ulman naq laj Alma, chi k’eeb’il xwankil xb’aan li Dios, kixk’ojob’eb’ laj tij; ut jun aj tij choq’ re lajetq roxk’aal xkomon li rajlankileb’ kixk’ojob’ a’an re jultikank aatin chiruheb’, ut re xtzolb’aleb’ chirix li k’a’aq re ru chirix li rawa’b’ejihom li Dios.

19 Ut kixtaqlaheb’ naq maak’a’ chik te’xk’ut, ka’ajwi’ li k’a’aq re ru kixk’ut chaq a’an, li yeeb’il chaq rik’in xtz’uumaleb’ re li santil profeet.

20 Relik chi yaal, kixtaqlaheb’ naq maak’a’ chik te’xjultika, ka’ajwi’ li jalb’a-k’a’uxlej ut xpaab’ankil li Qaawa’, li kixtoj rix lix tenamit.

21 Ut kixtaqlaheb’ naq maajun wech’ok-ib’ taawanq li jun rik’in li jun chik; naq te’iloq b’an chi uub’ej chi junajeb’ rilob’aal, chi junajeb’ xpaab’aal ut junajeb’ xkub’iha’, chi kemb’il sa’ komonil lix ch’ooleb’ rik’in junajil ut rik’in rahok li jun choq’ re li jun chik.

22 Ut jo’kan kixtaqlaheb’ chi jultikank aatin. Ut chi jo’kan ke’ok choq’ ralal xk’ajol li Dios.

23 Ut kixtaqlaheb’ naq te’roxloq’i li hilob’aal kutan, ut te’xk’uula xsantilal, ut jo’kan ajwi’ naq sa’ li junjunq kutan te’b’antioxinq chiru li Qaawa’ lix Dios.

24 Ut kixtaqlaheb’ ajwi’ naq eb’ laj tij li kixk’ojob’ chaq te’k’anjelaq rik’in tz’aqaleb’ li ruq’ re xk’ulb’al li nak’anjelak reheb’.

25 Ut kiwan jun kutan chiru li junjunq xamaan li kijache’ ru re te’xch’utub’ wi’ rib’ chixtzolb’al li tenamit, ut chixloq’oninkil li Qaawa’ lix Dios, ut jo’kan ajwi’, chi kok’ aj xsa’ jo’ chanru kiruhan chiruheb’, re te’xch’utub’ rib’.

26 Ut eb’ laj tij moko chiru ta li tenamit naq tento te’xk’ul li k’a’ru nak’anjelak reheb’; choq’ reeqaj b’an lix k’anjeleb’ te’xk’ul li rusilal li Dios, re te’nimanq xmetz’ew sa’ li Musiq’ej, chi wankeb’ xnawom chirix li Dios, re naq te’k’utuq rik’in xwankilal li Dios, ut chi k’eeb’il xwankileb’ xb’aan.

27 Ut jo’kan wi’chik laj Alma kixtaqla naq eb’ li ani wankeb’ sa’ li iglees te’xk’e xkomon li k’a’ru reheb’, li junjunq a’ yaal k’a’ru li wan re; wi naab’al wi’chik li k’a’ru re, tento tixk’e wi’chik chi naab’al, ut li ani yal ka’ch’in li k’a’ru re, yal ka’ch’in taapatz’manq; ut re li ani maak’a’ k’a’ru re, taak’eemanq.

28 Ut chi jo’kan tento te’xk’e xkomon li k’a’ru reheb’ yal xb’aan x’anchalileb’ xch’ool, ut xb’aan lix chaab’il ajomeb’ choq’ re li Dios, ut reheb’ laj tij li neke’ajok tenq’aak, relik chi yaal, ut re li junjunq aamej li maak’a’ wan re ut t’ust’u.

29 Ut a’in kixye a’an reheb’, rik’in naq taqlanb’il xb’aan li Dios; ut ke’b’eek chi tiik chiru li Dios, ut ke’k’ehok chirib’ileb’ rib’, li k’a’ru re li yu’am a’in ut re li musiq’ej, a’ yaal jo’ li taak’anjelaq reheb’ ut li ajb’il xb’aaneb’.

30 Ut anajwan kik’ulman naq chixjunil a’in kib’aanuman aran Mormon, relik chi yaal, chire li ha’ Mormon, sa’ li k’iche’ li wan chixk’atq li ha’ Mormon, relik chi yaal, li na’ajej Mormon, li ha’ Mormon, li k’iche’ Mormon, k’a’jo’ xch’ina-usileb’ sa’ rilob’aaleb’ li ke’k’ame’ aran chixnawb’al chirix laj Tojol rixeb’; relik chi yaal, ut q’axal osob’tesinb’ileb’, xb’aan naq eb’ a’an te’b’ichanq chixnimankil ru chi junelik.

31 Ut kib’aanuman li k’a’aq re ru a’in sa’ xnub’aal li ch’och’, re naq ink’a’ taanawe’q xb’aan li rey.

32 A’ut k’ehomaq reetal, kik’ulman naq li rey, chirix xk’eeb’al reetal naq wan k’a’ru yoo chi k’ulmank sa’ xyanqeb’ li tenamit, kixtaqlaheb’ lix moos re xk’aak’alenkileb’. Jo’kan naq sa’ li kutan naq ch’utch’uukeb’ chirab’inkil li raatin li Qaawa’ ke’nawe’k xb’aan li rey.

33 Ut anajwan li rey kixye naq laj Alma yoo chireek’asinkileb’ li tenamit re te’xpo’resi xch’ool rik’in; jo’kan naq kixtaqla lix teep aj pleet chixsachb’aleb’.

34 Ut kik’ulman naq kiyehe’ resil re laj Alma ut eb’ lix tenamit li Qaawa’ naq chalk re li teep aj pleet re li rey; jo’kan naq ke’xchapeb’ lix muheb’aal t’ikr ut lix junkab’aleb’, ut xkoheb’ chiru li yamyookil ch’och’.

35 Ut a’aneb’ na kaahib’ cient rik’in lajeeb’ roxk’aal rajlankileb’ li aamej.