1 Ut anajwan li rey aj Mosiah kixtaqla naq te’ch’utub’aaq chixjunil li tenamit.

2 Anajwan moko ke’wan ta xk’ihaleb’ li ralal xk’ajol laj Nefi, malaj xk’ihaleb’ lix komoneb’ laj Nefi, jo’ chanru xk’ihaleb’ lix tenamit laj Tzarahemla, a’an ralal xk’ajol laj Mulek, ut eb’ li ke’chal chaq rochb’een sa’ li yamyookil ch’och’.

3 Ut moko wankeb’ ta xk’ihal lix tenamit laj Nefi ut lix tenamit laj Tzarahemla jo’ ta xk’ihaleb’ laj Lamanita; relik chi yaal, moko wan ta jo’ ta xyijach lix k’ihaleb’.

4 Ut anajwan chixjunil lix tenamit laj Nefi wankeb’ chi ch’utch’u, ut jo’kaneb’ ajwi’ chixjunil lix tenamit laj Tzarahemla, ut ch’utch’uukeb’ sa’ ka’ ch’uut.

5 Ut kik’ulman naq laj Mosiah kixye, ut kixtaqla xyeeb’al re lix tenamit li esil tz’iib’anb’il xb’aan laj Tzeniff; relik chi yaal, kixye li esil tz’iib’anb’il xb’aan lix tenamit laj Tzeniff, chalen chaq naq ke’el chaq Tzarahemla toj reetal naq ke’sutq’i wi’chik.

6 Ut kixye ajwi’ li aatin tz’iib’anb’il sa’ li resilal laj Alma ut eb’ li ras riitz’in, ut chixjunil lix ch’a’ajkilaleb’, chalen naq ke’el chaq Tzarahemla toj reetal naq ke’sutq’i wi’chik.

7 Ut anajwan, naq laj Mosiah kixk’e xraqik xyeeb’al li aatin sa’ li tz’iib’anb’il hu, eb’ lix tenamit li ke’kana sa’ li ch’och’ ke’chal xsachikeb’ xch’ool ut k’a’jo’eb’ xk’a’uxl.

8 Xb’aan naq moko neke’xnaw ta k’a’ru te’xk’oxla; ut naq ke’rileb’ li ani ke’kole’ chaq chi moosil, ke’nujak rik’in sahil ch’oolejil q’axal nim.

9 Ut jo’kan wi’chik, naq ke’xk’oxlaheb’ li ras riitz’in li ke’kamsiik chaq xb’aaneb’ laj Lamanita, ke’nujak rik’in rahil ch’oolejil, ut ke’el ajwi’ xya’aleb’ ru chi naab’al xb’aan xrahileb’ xch’ool.

10 Ut jo’kan wi’chik, naq ke’xk’oxla xnach’il lix chaab’ilal li Dios, ut lix wankil sa’ xkolb’al laj Alma ut eb’ li ras riitz’in sa’ ruq’eb’ chaq laj Lamanita ut chiru chaq li moosil, ke’xtaqsi lix yaab’eb’ xkux ut ke’b’antioxin chiru li Dios.

11 Ut jo’kan wi’chik, naq ke’xk’oxlaheb’ laj Lamanita, a’aneb’ ras riitz’ineb’, ut li maak ut tz’ajnil li wankeb’ wi’, ke’nujak rik’in rahilal ut yot’e’k chirix lix chaab’ilaleb’ li raam.

12 Ut kik’ulman naq eb’ li ralal xk’ajol laj Amulon ut eb’ lix komon, li ke’xk’am chaq choq’ rixaqileb’ lix rab’ineb’ laj Lamanita, ke’raho’ xch’ool xb’aan xb’aanuhomeb’ lix yuwa’eb’, ut ink’a’ chik ke’raj k’ab’a’iik rik’in lix k’ab’a’eb’ lix yuwa’eb’; jo’kan naq ke’xk’ul sa’ xb’eeneb’ lix k’ab’a’ laj Nefi, re naq ralal xk’ajol laj Nefi taayeemanq reheb’ ut te’k’ehe’q sa’ ajl sa’ xyanqeb’ li ani aj Nefita neke’yehe’ re.

13 Ut anajwan chixjunileb’ lix tenamit laj Tzarahemla k’eeb’ileb’ sa’ ajl rik’ineb’ laj Nefita, ut a’in sa’ xk’ab’a’ naq maa’ani chik aj-e naq’axtesiman xwankilal li rey sa’ xb’een, ka’ajeb’ wi’ li ani ralal xk’ajol laj Nefi.

14 Ut anajwan kik’ulman naq chirix naq laj Mosiah kiraqe’ chi aatinak ut chixyeeb’al reheb’ li tenamit li aatin tz’iib’anb’il, kiraj naq laj Alma taaraatinaheb’ ajwi’ li tenamit.

15 Ut laj Alma kiraatinaheb’, naq wankeb’ chi ch’utch’u sa’ xninqal ch’uut, ut xko’o sa’ li junjunq ch’uut, ut kixjultika chiruheb’ li tenamit li jalb’a-k’a’uxlej, ut xpaab’ankil li Qaawa’.

16 Ut a’an ki’elajin chiruheb’ lix tenamit laj Limhi ut eb’ li ras riitz’in, chixjunileb’ li ke’kole’ chaq chiru moosil, naq taajultiko’q reheb’ naq a’ li Qaawa’ li kikolok chaq reheb’.

17 Ut kik’ulman naq chirix naq laj Alma kixk’ut k’iila na’leb’ chiru li tenamit, ut kixk’e xraqik raatinankileb’, naq li rey aj Limhi kiraj naq taakub’eeq xha’, ut chixjunileb’ lix tenamit ke’raj naq te’kub’eeq ajwi’ xha’.

18 Jo’kan ut, laj Alma xko’o sa’ li ha’ ut kixkub’siheb’ xha’; relik chi yaal, kixkub’siheb’ xha’ jo’ chanru ajwi’ naq kixb’aanu reheb’ lix komon sa’ li ha’ Mormon; relik chi yaal, ut jo’ k’ihaleb’ li kixkub’siheb’ xha’ ke’wan xna’aj sa’ lix iglees li Dios; ut a’in xb’aan naq neke’xpaab’ li raatin laj Alma.

19 Ut kik’ulman naq li rey aj Mosiah kixk’e re laj Alma naq tixxaqab’eb’ li iglees chiru chixjunil li ch’och’ Tzarahemla; ut kixk’e xwankil chixk’ojob’ankileb’ laj tij ut laj tzolonel sa’ xb’een li junjunq chi iglees.

20 Anajwan a’in kib’aanuman xb’aan naq q’axal k’iheb’ li tenamit, jo’kan naq moko ke’ru ta chi jolomiik xb’aan jun aj tzolonel; chi moko ke’ru chixjunileb’ chirab’inkil li raatin li Dios sa’ junaj chi ch’utlajik;

21 Jo’kan naq ke’xch’utub’ rib’ sa’ li junjunq chi ch’uut, a’eb’ iglees neke’yehe’ re; li junjunq chi iglees wankeb’ laj tij ut laj tzolonel reheb’; ut li junjunq chi aj tij naxjultika li aatin jo’ chanru naq q’axtesinb’il re rik’in xtz’uumal re laj Alma.

22 Ut chi jo’kan, us ta k’iila iglees wan, chixjunileb’ junajeb’ chi iglees, relik chi yaal, a’aneb’ lix iglees li Dios; xb’aan naq maak’a’ najultikaman sa’ chixjunileb’ li iglees, ka’ajwi’ li jalb’a-k’a’uxlej ut xpaab’ankil li Dios.

23 Ut anajwan wuqub’ li iglees ke’wan sa’ li ch’och’ Tzarahemla. Ut kik’ulman naq yalaq ani li te’ajoq re xk’ulb’al sa’ xb’eeneb’ lix k’ab’a’ li Kristo, malaj li Dios, ke’xjunaji rib’ rik’ineb’ lix iglees li Dios;

24 Ut a’aneb’ xtenamit li Dios neke’yehe’ re. Ut li Qaawa’ kixhoy lix Musiq’ sa’ xb’eeneb’, ut ke’osob’tesiik, ut ke’usa sa’ li ch’och’.