1 Ma o lenei sa oo ina matua faateteleina sauaga na faia i le ekalesia e tagata sa lē talitonu, sa amata ona muimui le ekalesia, ma faaseā atu i o latou ta’ita’i, e uiga i le mataupu; ma sa latou faaseā atu ia Alema. Ma sa tuu atu e Alema le mataupu i luma o lo latou tupu, o Mosaea. Ma sa soalaupule faatasi Mosaea ma ana faitaulaga.

2 Ma sa oo ina auina atu e le tupu o Mosaea se folafolaga i le nuu faataamilo atoa, ia lē tatau ona sauaina e soo se tasi ua lē talitonu, soo se tasi o i latou o e ua auai i le ekalesia a le Atua.

3 Ma sa i ai se poloaiga patino i aulotu uma lava, ia lē tatau ona i ai ni sauaga i totonu o i latou, ma ia i ai le tutusa i totonu o tagata uma;

4 Ia leai se faamaualuga po o se faasausili e tatau ona latou tuu e faalavelave i lo latou filemu; ma ia tatau i tagata taitoatasi ona manatu maualuga i lē la te tuaoi e pei o ia lava, ma galulue i o latou lava lima e tausia ai i latou.

5 Ioe, ma e tatau i o latou faitaulaga ma a’oa’o uma ona galulue i o latou lava lima mo lo latou tausiga, i tulaga uma lava, vaganā ai i ma’i, po o i le mativa tele; ma o le faia o nei mea, sa latou mau tele ai i le alofa tunoa o le Atua.

6 Ma sa amata ona toe i ai o le filemu tele i le nuu; ma sa amata ona faatoateleina lava o tagata, ma amata ona taapeape solo atu i luga o le fogaeleele, ioe, i le itu i matu ma le itu i saute, i le itu i sasa’e ma le itu i sisifo, ma fausia aai ma nuu tetele i itu uma o le laueleele.

7 Ma sa asiasi mai le Alii ia te i latou ma faamanuia i latou, ma sa oo ina avea i latou ma se nuu tele ma le mau’oa.

8 O lenei sa faitauina atalii o Mosaea i totonu o e sa lē talitonu; ma sa faitauina foi i totonu o i latou se tasi o atalii o Alema, sa ta’ua o ia o Alema, i le igoa o lona tamā; ae ui i lea, sa avea o ia ma tagata sili ona amioleaga ma le ifo i tupua. Ma o ia o se tagata sa mau upu, ma sa tautala atu e ia le taufaasee tele i tagata; o lea na ta’ita’i atu ai e ia le toatele o tagata e fai e tusa ma ana amioletonu.

9 Ma sa avea o ia ma faalavelave tele i le alualu i luma o le ekalesia a le Atua; i le faagaoi ese o loto o tagata; ma tutupu mai ai finauga e tele i totonu o le nuu; ma tatala atu ai se avanoa i le fili o le Atua e faatino ai lona mana i luga o i latou.

10 Ma o lenei sa oo ina a o alu atu o ia i lea mea ma lea mea e lepeti le ekalesia a le Atua, ona sa alu atu o ia faalilolilo faatasi ma atalii o Mosaea e saili e lepeti le ekalesia, ma ta’ita’i ese tagata o le Alii, e lē tusa ai ma poloaiga a le Atua, po o a le tupu foi—

11 Ma e pei ona ou fai atu ia te outou, a’o latou o atu i lea mea ma lea mea ma le fouvale faasaga i le Atua, faauta, ua afio ifo le agelu a le Alii ia te i latou; ma sa afio ifo o ia e peiseai o i totonu o se ao; ma sa fetalai mai o ia e pei o se leo o se faititili, sa lūlūina ai le eleele sa latou tutū ai;

12 Ma o le tele na’uā o lo latou meia, sa latou pa’u’ū ai i le eleele, ma sa lē malamalama i upu na fetalai mai ai o ia ia te i latou.

13 Ae ui i lea sa toe fetalai mai o ia, e faapea: Alema e, tulai ma tu mai, auā aisea ua e sauaina ai le ekalesia a le Atua? Auā ua fetalai mai le Alii: O la’u ekalesia lenei, ma o le a Ou faatumauina; ma e leai se mea na te faatoilaloina, vagana ai o le solitulafono o lo’u nuu.

14 Ma lea foi, sa fetalai mai le agelu: Faauta, ua faafofogaina e le Alii talosaga a lona nuu, ma talosaga foi a lana auauna, o Alema, o lē o lou tamā; ona sa tatalo atu o ia ma le faatuatua tele e uiga ia te oe, ina ia mafai ona aumai o oe i le malamalama o le upumoni; o lea, o le pogai lenei ua ou sau ai, e faatalitonu oe i le mana ma le pule a le Atua, ina ia talia talosaga a ana auauna, e tusa ma lo latou faatuatua.

15 Ma o lenei faauta, e mafai ea ona e finauina le mana o le Atua? Auā faauta, pe ua lē lūlūina ea le eleele e lo’u leo? Ma pe lē mafai ea foi ona outou vaai mai ia te a’u i o outou luma? Ma ua auina mai a’u mai le Atua.

16 O lenei ou te fai atu ia te oe: Alu ia, ma ia e manatua le faatagataotauaina o ou tamā i le laueleele o Helama, ma i le laueleele o Nifae; ma manatua mea sili na fai e ia mo i latou; ona sa i ai i latou i le pologa, ma ua lavea’iina i latou e ia. Ma o lenei ou te fai atu ia te oe, Alema, alu ia i lou ala, ma ia lē toe saili e lepeti le ekalesia, ina ia talia a latou talosaga, ma ia lē toe faia lenei mea e tusa pe e te manao ia lafoa’i ese oe lava ia.

17 Ma o lenei o upu mulimuli ia sa fetalai mai e le agelu ia Alema, ma maliu ese atu o ia.

18 Ma o lenei sa oo ina toe pa’u’ū i le eleele Alema ma i latou o e na faatasi ma ia, ona sa tele lava lo latou meia; ona sa latou vaai i se agelu a le Alii i o latou lava mata; ma o lona siufofoga sa pei o se faititili, sa luluina ai le eleele; ma sa latou iloa e leai se mea vaganā ai le mana o le Atua, e mafai ona luluina le eleele, ma faagatete ai e peiseai a vaeluaina, vaganā ai le mana o le Atua.

19 Ma o lenei sa matuā tele lava le meia o Alema, sa oo ina gūgū o ia, sa lē mafai ona tatala lona gutu; ioe, ma sa oo ina vaivai o ia, sa oo ina lē mafai ona faagaoioi e ia ona lima; o lea na avatu ai o ia e i latou o e na faatasi ma ia, ma sii atu ua lē gaoioi, seia oo ina faataatia o ia i luma o lona tamā.

20 Ma sa latou faamatala atu i lona tamā mea uma na oo ia te i latou; ma sa olioli lona tamā, auā sa iloa e ia o le mana lea o le Atua.

21 Ma sa faia e ia ia faapotopoto mai faatasi se motu o tagata, ina ia mafai ona latou molimauina le mea ua faia e le Alii i lona atalii, ma i latou foi o e na faatasi ma ia.

22 Ma sa faia e ia ia faapotopoto faatasi faitaulaga; ma sa amata ona latou anapopogi, ma tatalo atu i le Alii lo latou Atua, ia tatalaina e ia le gutu o Alema, ina ia mafai ona tautala o ia, ma ia mafai foi ona maua e ona lima ma ona vae lo latou malosi—ina ia mafai ona faapupulaina mata o le nuu, e vaai ma latou iloa ai le agalelei ma le mamalu o le Atua.

23 Ma sa oo ina ua mavae ona latou anapopogi ma tatalo mo le va o aso e lua ma po e lua, sa toe maua e lima ma vae o Alema lo latou malosi, ma sa tulai o ia i luga ma amata ona tautala mai ia te i latou, ua fai mai ia faamafanafanaina i latou:

24 Ona, ua fai mai o ia, ua ou salamo i a’u agasala, ma ua togiolaina a’u e le Alii; faauta, ua fanauina a’u i le Agaga.

25 Ma sa fetalai mai le Alii ia te a’u: Aua e te ofo e ao i le fanauga uma a tagata, ioe, o tane ma fafine, o atunuu uma, ituaiga, gagana eseese ma nuu, ona toe fanauina; ioe, fanauina i le Atua, ma suia mai lo latou tulaga faaletino ma le pa’ū, i se tulaga o le amiotonu, ua togiolaina e le Atua, ma avea ma ona atalii ma afafine.

26 Ma faapea ona avea ai o i latou ma tagata fou; ma vagana ai ua latou faia lenei mea, e leai se ala latou te mafai ai, ona fai mo o latou tofi le malo o le Atua.

27 Ou te fai atu ia te outou, a lē o le tulaga lea, e ao ina lafoa’i ese i latou; ma ua ou iloa lenei mea, ona sa toetoe lava a lafoa’iina ese a’u.

28 Ae ui i lea, ina ua mavae ona ou tauasa mai i puapuaga e tele, ma ou salamo toetoe a ou oti, sa tonu i le finagalo alofa mutimutivale o le Alii, ia se’i ese a’u i fafo mai se mu e faavavau, ma ua fanauina a’u i le Atua.

29 Ua togiolaina lo’u agaga mai le au oona ma pologa o le amioletonu. Sa ou i ai i se lua loloto sili ona pogisa; ae o lenei ua ou vaaia le malamalama ofoofogia o le Atua. Sa puapuagatia lo’u agaga i le mafatia e faavavau, ae ua se’ia ese a’u, ma ua lē toe tigā lo’u agaga.

30 Sa ou teena lo’u Togiola, ma faafitia mea na tautatala mai ai o tatou tamā; ae o lenei, ina ia latou mua’i iloa o le a afio mai o ia, ma e manatua e ia tagata uma na ia foafoaina, o le a faaali mai ai e ia o ia lava i tagata uma.

31 Ioe, o le a tootuli tulivae uma, ma tautino atu laulaufaiva uma i ona luma. Ioe, o le aso gataaga lava, pe a laulaututū tagata uma e faamasino e ia, o le a latou tautino atu ai o ia o le Atua; ona tautino atu ai lea e i latou uma o e sa ola e aunoa ma le Atua i le lalolagi, ua tonu le famasinoga o le faasalaga e faavavau i luga o i latou; ma o le a latou galulu, ma gatete, ma solomuli ifo i luma o lana silafaga ati i mea uma.

32 Ma o lenei sa oo ina amata e Alema mai lea lava taimi ma le aga’i i luma, faapea ma i latou o e na faatasi ma Alema i le taimi na afio ifo ai le agelu ia te i latou, ona a’oa’o atu i le nuu, ma malaga faataamilo i le laueleele atoa, ua folafola atu i tagata uma mea sa latou faalogoina ma vaaia, ma tala’i atu le afioga a le Atua i le puapuaga tele, ona o le sauaina tele e i latou o e sa lē talitonu, ma taia e le toatele o i latou.

33 Ae e ui i nei mea uma, sa latou avatu se faamafanafanaga tele i le ekalesia, sa faamautuina ai lo latou faatuatua, ma apoapoa’iina i latou ma le tali-tigā ma le tautigā tele, ia latou tausi i poloaiga a le Atua.

34 Ma o le to’afā o i latou o atalii ia o Mosaea; ma o o latou igoa o Amona, ma Arona, ma Ominea, ma Himinae; o igoa ia o atalii o Mosaea.

35 Ma sa latou malaga atu i le laueleele atoa o Sara’emila, ma i totonu o tagata uma o e sa i lalo o le puleaga a le tupu o Mosaea, ma taumafai ma le vilivilita’i e toe faalelei manu’a uma sa latou faia i le ekalesia, ma ta’utino atu a latou agasala uma, ma folafola atu mea uma sa latou vaaia, ma faamalamalama atu valoaga ma tusitusiga paia ia te i latou uma, o e sa fia faalogo mai ia te i latou.

36 Ma sa faapea ona avea o i latou ma meafaigaluega i aao o le Atua, i le aumaia o le toatele i le malamalama o le upumoni, ioe, i le malamalama o lo latou Togiola.

37 Ma amuia lava i latou! Ona sa latou folafola atu le filemu; sa latou folafola atu tala e lelei o mea lelei; ma sa latou ta’utino atu i tagata o loo nofotupu le Alii.