1 Pea ko ʻeni naʻe hoko ʻo pehē ʻi he ʻosi hono fai ʻe he ngaahi foha ʻo Mōsaiá ʻa e ngaahi meʻá ni kotoa pē, naʻa nau ʻave mo kinautolu ʻa e tokosiʻi ʻo foki ki heʻenau tamai, ko e tuʻí, pea naʻa nau kole kiate ia ke ne fakangofua ʻa kinautolu ke nau ʻalu hake ki he fonua ko Nīfaí, fakataha mo kinautolú ni kuo nau filí, ke nau malanga ʻaki ʻa e ngaahi meʻa ʻa ia kuo nau fanongo ki aí, pea ke nau fakahā ʻa e folofola ʻa e ʻOtuá ki honau kāinga, ko e kau Leimaná—

2 Koeʻuhí ke nau lava ʻapē ʻo fakatafoki ʻa kinautolu ki he ʻiloʻi ʻo e ʻEiki ko honau ʻOtuá, mo fakamahino kiate kinautolu ʻa e ngaahi angahala ʻa ʻenau ngaahi tamaí; pea ke nau lava ʻapē ke fakatafoki ʻa kinautolu mei heʻenau fehiʻa ki he kau Nīfaí, koeʻuhi ke ʻomi ʻa kinautolu ke nau fiefia ʻi he ʻEiki ko honau ʻOtuá, koeʻuhi ke nau nofo feʻofoʻofani ʻiate kinautolu, pea ke ʻoua naʻa toe ʻi ai ha ngaahi fakakikihi ʻi he fonua kotoa ʻa ia kuo foaki ʻe he ʻEiki ko honau ʻOtuá kiate kinautolú.

3 Ko ʻeni naʻa nau fakaʻamu ke fakahā ʻa e fakamoʻuí ki he kakai fulipē, he naʻe ʻikai te nau faʻa kātakiʻi ke malaʻia ha laumālie ʻo ha taha; ʻio, naʻe hanga ʻe he fakakaukau pē ki he tō ʻa e laumālié ki he mamahi taʻetukú ʻo fakatupu ʻenau tete mo tetetete.

4 Pea naʻe ngāue pehē ʻa e Laumālie ʻo e ʻEikí ʻiate kinautolu, he ko kinautolu ʻa e fakalielia taha ʻi he kau fai angahalá. Pea naʻe finangalo ʻa e ʻEikí ʻi heʻene ʻaloʻofa taʻe-fakangatangatá ke fakahaofi ʻa kinautolu; ka neongo iá naʻa nau kātakiʻi ʻa e fuʻu mamahi lahi ʻo e laumālié koeʻuhi ko ʻenau ngaahi angahalá, ʻo nau mamahi lahi mo manavahē telia naʻa ʻiloange kuo kapusi atu ʻa kinautolu ʻo taʻengata.

5 Pea naʻe hoko ʻo pehē naʻa nau kole ki heʻenau tamaí ʻi he ngaahi ʻaho lahi ke nau ʻalu atu ki he fonua ko Nīfaí.

6 Pea naʻe ʻalu ʻa e tuʻi ko Mōsaiá ʻo ne fehuʻi ki he ʻEikí pe ʻe lelei ke ne tukuange hono ngaahi fohá ke nau ʻalu atu ʻi he lotolotonga ʻo e kau Leimaná ʻo malangaʻaki ʻa e folofolá.

7 Pea naʻe folofola mai ʻa e ʻEikí kia Mōsaia: Tuku ke nau ʻalu atu, he ʻe tui ʻa e tokolahi ki heʻenau ngaahi leá, pea te nau maʻu ʻa e moʻui taʻengatá; pea te u fakahaofi ho ngaahi fohá mei he nima ʻo e kau Leimaná.

8 Pea naʻe hoko ʻo pehē naʻe tuku ʻe Mōsaia ke nau ʻalu ʻo fai ʻo hangē ko ʻenau kolé.

9 Pea naʻa nau fai ʻenau fonongá ki he feituʻu maomaonganoá ke ʻalu atu ʻo malanga ʻaki ʻa e folofolá ʻi he lotolotonga ʻo e kau Leimaná; pea te u fai ha fakamatala ki heʻenau ngaahi ngāué ʻamui.

10 Ko ʻeni naʻe ʻikai maʻu ʻe Mōsaia ha tokotaha ke tuku ki ai ʻa e puleʻangá, he naʻe ʻikai ke ʻi ai ha taha ʻo hono ngaahi fohá te ne fie tali ʻa e puleʻangá.

11 Ko ia naʻá ne toʻo ʻa e ngaahi lekooti ʻa ia naʻe tongitongi ki he ngaahi peleti ʻo e palasá, kae ʻumaʻā foki ʻa e ngaahi peleti ʻa Nīfaí, pea mo e ngaahi meʻa kotoa pē kuó ne tauhi mo maluʻi ʻo fakatatau ki he ngaahi fekau ʻa e ʻOtuá, hili ʻene liliu mo ne fekau ke tohi ʻa e ngaahi lekooti ʻa ia naʻe ʻi he ngaahi peleti ʻo e koula ʻa ia naʻe ʻiloʻi ʻe he kakai ʻo Limihaí, ʻa ia naʻe tuku kiate ia ʻe Limihaí;

12 Pea naʻá ne fai ʻeni koeʻuhi ko e fuʻu tokanga lahi ʻa hono kakaí; he naʻa nau fuʻu fakaʻamu ʻo fuʻu lahi fau ke ʻilo ʻo kau ki he kakai ʻa ia kuo fakaʻauhá.

13 Pea ko ʻeni naʻá ne liliu ia ʻi hono ngāue ʻaki ʻa e ongo maka ʻa ia naʻe fakamaʻu ki he ongo kauʻi meʻa fuopotopotó.

14 Pea naʻe teuteu ʻa e ongo meʻá ni ko iá talu mei he kamataʻangá, pea tukufakaholo mai mei he toʻu tangata ki he toʻu tangata, ko hono taumuʻá ke liliu ʻaki ʻa e ngaahi leá;

15 Pea kuo tauhi mo maluʻi ia ʻe he toʻukupu ʻo e ʻEikí, koeʻuhi ke ne fakahā ʻaki ki he kakai fulipē ʻa ia te nau maʻu ʻa e fonuá ʻa e ngaahi angahala mo e ngaahi anga-fakalielia ʻa hono kakaí.

16 Pea ʻilonga ia ʻokú ne maʻu ʻa e ongo meʻa ní ʻoku ui ia ko e tangata kikite ʻo hangē ko e founga ʻo e kuonga muʻá.

17 Ko ʻeni ʻi he hili hono liliu ʻe Mōsaia ʻa e ngaahi lekooti ní, vakai, naʻe fakamatala ia ki he kakai ʻa ia naʻe fakaʻauhá, ʻo fai mei he taimi naʻe fakaʻauha ai ʻa kinautolú ʻo aʻu ki he langa ʻo e fuʻu taua ʻi he taimi naʻe veuveuki ai ʻe he ʻEikí ʻa e lea ʻa e kakaí pea fakamovetevete atu ʻa kinautolu ki he funga ʻo e māmaní kotoa pē, ʻio, ʻo fai mei he taimi ko iá ʻo aʻu ki he fakatupu ʻo ʻĀtamá.

18 Ko ʻeni naʻe langaki ʻe he fakamatalá ni ʻa e fuʻu tangi lahi ʻa e kakai ʻo Mōsaiá, ʻio, naʻe fakafonu ʻaki ʻa kinautolu ʻa e loto-mamahi; ka neongo iá naʻe ʻomi ai kiate kinautolu ʻa e ʻilo lahi, ʻa ia naʻa nau fiefia ai.

19 Pea ko e fakamatalá ni ʻe hiki ia ʻamui; he vakai, ʻoku ʻaonga ke ʻilo ʻe he kakai kotoa pē ʻa e ngaahi meʻa kuo hiki ʻi he fakamatala ko iá.

20 Pea ko ʻeni, hangē ko ʻeku pehē kiate kimoutolu, ʻi he hili leva hono fai ʻe he tuʻi ko Mōsaiá ʻa e ngaahi meʻá ni kotoa pē, naʻá ne toʻo ʻa e ngaahi peleti ʻo e palasá, pea mo e ngaahi meʻa kotoa pē kuó ne tauhí, ʻo ne tuku ia kia ʻAlamā, ʻa ia ko e foha ʻo ʻAlamaá; ʻio, ʻa e ngaahi lekōtí kotoa kae ʻumaʻā ʻa e ongo meʻa liliu leá, ʻo ne tuku ia kiate ia, mo fekau kiate ia ke ne tauhi mo maluʻi ia, pea ke ne tauhi ha lekooti ʻo e kakaí, pea tukufakaholo ia mei he toʻu tangata ki he toʻu tangata, ʻo hangē kuo tukufakaholo mai ia talu mei he taimi naʻe ʻalu ai ʻa Līhai mei Selusalemá.