1 Mo nao, king Benjamin i bin ting se i bin gat nid, afta we hem i stop blong toktok long ol pipol, se bae hem i tekem ol nem blong olgeta we oli bin mekem wan kavenan wetem God blong oli obei ol komanmen blong hem.

2 Mo i bin hapen se i no bin gat wan sol, be ol smol pikinini nomo, we i no bin mekem kavenan mo i no bin tekem long olgeta nem blong Kraes.

3 Mo bakegen, i bin hapen se taem we king Benjamin i bin endem evri samting ia, mo i bin konsekretem boe blong hem, Mosaea, blong kam wan man blong rul mo wan king ova long ol pipol blong hem, mo i bin givim long hem evri wok long saed blong kingdom, mo tu, i bin jusum ol pris blong tijim ol pipol, we tru long samting ia oli save harem mo save ol komanmen blong God, mo blong mekem olgeta blong tingbaot strong promes we oli bin mekem, hem i bin sendembak grup blong pipol ia mo oli bin gobak, evriwan folem famli blong olgeta, long haos blong olgeta bakegen.

4 Mo Mosaea i bin stat blong rul long ples blong papa blong hem. Mo hem i bin stat blong rul long taem we hem i gat teti yia, mekem wan totol, raonabaot fo handred mo seventi sikis yia stat long taem we Lihae i bin lego Jerusalem.

5 Mo king Benjamin i bin laef tri yia, afta hem i ded.

6 Mo i bin hapen se king Mosaea i bin wokbaot folem ol wei blong Lod, mo i bin folem ol jajmen mo ol loa blong Lod, mo i bin obei ol komanmen blong hem long evri samting we hem i bin talem long hem.

7 Mo king Mosaea i bin mekem se ol pipol blong hem oli wok long graon. Mo tu, hemwan, i bin wok long graon, blong mekem se tru long wei ia, hem i no save kam wan hevi samting long ol pipol blong hem, blong mekem se hem i save mekem folem olsem we papa blong hem i bin mekem long saed blong evri samting. Mo i no bin gat rao long medel blong ol pipol blong hem blong wan taem blong tri ia.