Mōsaia

Ngaahi Folofolá

Tohi ʻa Molomoná

Ngaahi Fakahokohokó
Talateú mo e Kau Fakamoʻoní
1 Nīfai
2 Nīfai
Sēkope
ʻĪnosi
Seilomi
ʻAmenai
Ngaahi Lea ʻa Molomona
Mōsaia
ʻAlamā
Hilamani
3 Nīfai
4 Nīfai
Molomona
ʻEta
Molonai

Mōsaia

Vahe 1
ʻOku akoʻi ʻe he Tuʻi ko Penisimaní ki hono ngaahi fohá ʻa e lea mo e ngaahi kikite ʻa ʻene ngaahi tamaí—Kuo fakatolonga mai ʻenau tui fakalotú mo e sivilaisé koeʻuhi ko e ngaahi lekooti naʻe tauhi ʻi he ngaahi peleti kehekehé—ʻOku fili ʻa Mōsaia ko e tuʻi pea tuku kiate ia ʻa e fatongia ki hono tauhi ʻo e ngaahi lekōtí mo e ngaahi meʻa kehe. Taʻu 130–124 K.M. nai.
Vahe 2
ʻOku folofola ʻa e Tuʻi ko Penisimaní ki hono kakaí—ʻOkú ne fakamatalaʻi kiate kinautolu ʻa e angatonu, taʻe-filifilimānako, mo e fakalaumālie ʻo ʻene pulé—ʻOkú ne naʻinaʻi kiate kinautolu ke nau tauhi ki honau Tuʻi Fakalangí—Ko kinautolu ʻoku angatuʻu ki he ʻOtuá te nau mamahi ʻi he houhaú ʻo hangē ha afi taʻe-faʻa-maté. Taʻu 124 K.M. nai.
Vahe 3
ʻOku hoko atu ʻa e folofola ʻa e Tuʻi ko Penisimaní—ʻE ngāue ʻa e ʻEiki Māfimafí ʻi he lotolotonga ʻo e kakaí ʻi he sino ʻo e kelekele—ʻE tafe mai ʻa e taʻataʻá ʻi he ava kotoa ʻo Hono kilí ʻi Heʻene fai ʻa e fakalelei koeʻuhi ko e ngaahi angahala ʻa e māmaní—Ko Hono huafá pē taha ʻe maʻu ai ʻa e fakamoʻuí—ʻOku lava ʻe he tangatá ʻo liʻaki ʻa e tangata fakakakanó pea hoko ko e Kau Māʻoniʻoni ʻi he Fakaleleí—ʻE tatau hono fakamamahiʻi ʻo e kau fai angahalá ko ha ano ʻo e afi mo e makavela. Taʻu 124 K.M. nai.
Vahe 4
ʻOku hoko atu ʻa e folofola ʻa e Tuʻi ko Penisimaní—ʻOku hoko ʻa e fakamoʻuí tuʻunga ʻi he Fakaleleí—Tui ki he ʻOtuá pea moʻui—Tauhi maʻu ʻa hono fakamolemoleʻi hoʻomou ngaahi angahalá ʻi he tui mālohi—Foaki atu mei hoʻomou koloá ki he masivá—Fai ʻa e meʻa kotoa pē ʻi he poto pea ʻi he founga maau. Taʻu 124 K.M. nai.
Vahe 5
ʻOku hoko ʻa e Kau Māʻoniʻoní ko e ngaahi foha mo e ngaahi ʻofefine ʻo Kalaisi ʻi he tui—ʻOku ui ʻaki leva ʻa kinautolu ʻa e huafa ʻo Kalaisí—ʻOku naʻinaʻi ʻa e Tuʻi ko Penisimaní kiate kinautolu ke nau tuʻu maʻu taʻe-faʻa-ngaue ʻi he ngaahi ngāue leleí. Taʻu 124 K.M. nai.
Vahe 6
ʻOku tohi ʻe he tuʻi ko Penisimaní ʻa e ngaahi hingoa ʻo e kakaí pea fakanofo ha kau taulaʻeiki ke nau akoʻi ʻa kinautolu—ʻOku pule ʻa Mōsaia ko ha tuʻi māʻoniʻoni. Taʻu 124–121 K.M. nai.
Vahe 7
ʻOku ʻilo ʻe ʻĀmoni ʻa e fonua ko Līhai-Nīfaí, ʻa ia ʻoku tuʻi ki ai ʻa Limihaí—ʻOku nofo pōpula ʻa e kakai ʻo Limihaí ki he kau Leimaná—ʻOku fakamatala ʻa Limihai ki honau hisitōliá—Kuo fakamoʻoniʻi ʻe ha palōfita (ko ʻApinetai) ko Kalaisi ʻa e ʻOtua mo e Tamai ʻa e ngaahi meʻa kotoa pē—Ko kinautolu ʻoku nau tūtuuʻi ʻa e koví ʻoku nau utu ko e ʻahiohio, pea ko kinautolu ʻoku falala ki he ʻEikí ʻe fakahaofi ʻa kinautolu. Taʻu 121 K.M. nai.
Vahe 8
ʻOku akoʻi ʻe ʻĀmoni ʻa e kakai ʻo Limihaí—ʻOku ne ʻilo ki he ngaahi peleti ʻe uofulu mā fā ʻa e kau Sēletí—ʻOku lava ʻo liliu ʻa e ngaahi lekooti fakakuongamuʻá ʻe he kau tangata kikité—ʻOku ʻikai ha meʻafoaki ʻe lahi hake ʻi he hoko ko ha tangata kikité. Taʻu 121 K.M. nai.
Vahe 9
ʻOku taki atu ʻe Sēnifi ha kakai mei Seilahemalá ke maʻu ʻa e fonua ko Līhai-Nīfaí—ʻOku fakangofua kinautolu ʻe he tuʻi ʻo e kau Leimaná ke nau maʻu ʻa e fonuá—ʻOku tau ʻa e kau Leimaná mo e kakai ʻo Sēnifí. Taʻu 200–187 K.M. nai.
Vahe 10
ʻOku hala ʻa e tuʻi ko Leimaná—ʻOku anga-fītaʻa mo fekai ʻa hono kakaí pea nau tui ki he ngaahi talatukufakaholo loi—ʻOku ikunaʻi ʻe Sēnifi mo hono kakai ʻa kinautolu. Taʻu 187–160 K.M. nai.
Vahe 11
ʻOku pule ʻa e Tuʻi ko Noá ʻi he fai angahala—ʻOkú ne manako ʻi he moʻui faikovi mo hono ngaahi uaifí mo e kau sinifú—ʻOku kikite ʻa ʻApinetai ʻe taki pōpula ʻa e kakaí—ʻOku kumi ʻa e Tuʻi ko Noá ke tāmateʻi ia. Taʻu 160–150 K.M. nai.
Vahe 12
ʻOku tuku ʻa ʻApinetai ki he fale fakapōpulá koeʻuhi ko ʻene kikiteʻi hono fakaʻauha ʻo e kakaí mo e pekia ʻa e Tuʻi ko Noá—ʻOku lau ʻe he kau taulaʻeiki loí mei he folofolá mo fakangalingali ʻoku nau tauhi ʻa e fono ʻa Mōsesé—ʻOku kamata ʻe ʻApinetai ke akoʻi kiate kinautolu ʻa e ngaahi Fekau ʻe Hongofulú. Taʻu 148 K.M. nai.
Vahe 13
ʻOku maluʻi ʻa ʻApinetai ʻe ha mālohi fakalangi—ʻOkú ne akoʻi ʻa e ngaahi Fekau ʻe Hongofulú—ʻOku ʻikai maʻu ʻa e fakamoʻuí ʻi he fono ʻa Mōsesé pē—ʻE fai ʻe he ʻOtuá ha fakalelei pea huhuʻi Hono kakaí. Taʻu 148 K.M. nai.
Vahe 14
ʻOku lea ʻa ʻĪsaia ʻo kau ki he Mīsaiá—ʻOku fakamatala ʻa ʻĪsaia ʻo kau ki hono lumaʻi mo e ngaahi faingataʻaʻia ʻa e Mīsaiá—ʻOkú Ne foaki Hono laumālié ko e feilaulau maʻá e angahalá mo fai ʻa e taukapo koeʻuhi ko e kakai ʻoku fai angahalá—Fakafehoanaki mo e ʻĪsaia vahe 53. Taʻu 148 K.M. nai.
Vahe 15
Ko e founga ʻoku hoko ai ʻa Kalaisi ko e Tamaí mo e ʻAló fakatouʻosi—Te Ne fai ʻa e taukapo pea fua ʻa e ngaahi maumau-fono ʻa Hono kakaí—ʻOku nau hoko mo ʻEne kau palōfita māʻoniʻoni kotoa pē ko Hono hako—ʻOkú Ne fakahoko ʻa e Toetuʻú—ʻOku maʻu ʻe he fānau īkí ʻa e moʻui taʻengatá. Taʻu 148 K.M. nai.
Vahe 16
ʻOku huhuʻi ʻe he ʻOtuá ʻa e kakai kotoa pē mei honau tuʻunga mole mo tō ki laló—Ko kinautolu ʻoku anga-fakakakanó te nau ʻi he tuʻunga tatau pē ʻo hangē kuo ʻikai ha huhuʻí—ʻOku fakahoko ʻe Kalaisi ʻa e toetuʻu ki he moʻui ʻoku ʻikai hano ngataʻangá pe ki he malaʻia ʻoku ʻikai hano ngataʻangá. Taʻu 148 K.M. nai.
Vahe 17
ʻOku tui ʻa ʻAlamā peá ne tohi ʻa e ngaahi lea ʻa ʻApinetaí—ʻOku mate ʻa ʻApinetai ʻi he afi—ʻOkú ne kikiteʻi ʻa e ngaahi mahaki mo e mate ʻi he afi ʻa kinautolu naʻa nau fakapoongi iá. Taʻu 148 K.M. nai.
Vahe 18
ʻOku malanga fakafufū holo pē ʻa ʻAlamā—ʻOkú ne fakamatalaʻi ʻa e fuakava ʻo e papitaisó peá ne fai papitaiso ʻi he ngaahi vai ʻo Molomoná—ʻOkú ne fokotuʻu ʻa e siasi ʻo Kalaisí pea fakanofo ha kau taulaʻeiki—ʻOku nau ngāueʻi pē honau tauhí mo akoʻi ʻa e kakaí—ʻOku hola ʻa ʻAlamā mo hono kakaí mei he kau tamaioʻeiki ʻa e tuʻi ko Noá ki he feituʻu maomaonganoá. Taʻu 147–145 K.M. nai.
Vahe 19
ʻOku feinga ʻa Kitione ke fakapoongi ʻa e Tuʻi ko Noá—ʻOku ʻohofi ʻe he kau Leimaná ʻa e fonuá—ʻOku pekia ʻa e tuʻi ko Noá ʻi he afi—ʻOku pule ʻa Limihai ko e tuʻi fakaongoongo. Taʻu 145–121 K.M. nai.
Vahe 20
ʻOku ʻave fakamālohi ʻa e ngaahi ʻofefine ʻe niʻihi ʻo e kau Leimaná ʻe he kau taulaʻeiki ʻa Noa—ʻOku haʻu ʻa e kau Leimaná ʻo tauʻi ʻa Limihai mo hono kakaí—ʻOku tekeʻi ʻa e kau Leimaná mo fakafiemālieʻi ʻa kinautolu. Taʻu 145–123 K.M. nai.
Vahe 21
ʻOku ʻohofi ʻa e kakai ʻo Limihaí mo ikunaʻi ʻe he kau Leimaná—ʻOku fetaulaki ʻa e kakai ʻo Limihaí mo ʻĀmoni pea ʻoku fakaului ʻa kinautolu—ʻOku nau fakahā kia ʻĀmoni ʻa e ngaahi peleti ʻe uofulu mā fā ʻa e kau Sēletí. Taʻu 122–121 K.M. nai.
Vahe 22
ʻOku fakakaukau ʻa e kakaí ki ha founga ke nau hola ai mei he nofo pōpula ki he kau Leimaná—ʻOku fakainu ʻa e kau Leimaná ʻo nau konā—ʻOku hola ʻa e kakaí, ʻo nau foki ki Seilahemala, pea nau nofo fakaongoongo ki he Tuʻi ko Mōsaiá. Taʻu 121–120 K.M. nai.
Vahe 23
ʻOku fakafisi ʻa ʻAlamā ke hoko ko e tuʻi—ʻOkú ne hoko ko e taulaʻeiki lahi—ʻOku valokiʻi ʻe he ʻEikí ʻa Hono kakaí, pea ʻoku ikunaʻi ʻe he kau Leimaná ʻa e fonua ko Heilamí—ʻOku pule fakaongoongo ʻa ʻAmulone, ko e taki ʻo e kau taulaʻeiki ʻa e tuʻi angakovi ko Noá, ki he tuʻi ʻo e kau Leimaná. Taʻu 145–121 K.M. nai.
Vahe 24
ʻOku fakatangaʻi ʻe ʻAmulone ʻa ʻAlamā mo hono kakaí—Kuo pau ke tāmateʻi ʻa kinautolu kapau te nau lotu—ʻOku ngaohi ʻe he ʻEiki ʻa ʻenau ngaahi kavengá ke hangē ʻoku maʻamaʻá—ʻOkú ne fakahaofi ʻa kinautolu mei he nofo pōpulá, pea nau foki ki Seilahemala. Taʻu 145–120 K.M. nai.
Vahe 25
ʻOku hoko ʻa e hako ʻo Mūleki ʻi Seilahemalá ko e kau Nīfai—ʻOku nau ʻilo ki he kakai ʻo ʻAlamaá mo e kakai ʻo Sēnifí—ʻOku papitaiso ʻe ʻAlamā ʻa Limihai mo hono kakaí kotoa—ʻOku tuku ʻe Mōsaia ʻa e mafai kia ʻAlamā ke ne fokotuʻu ʻa e siasi ʻo e ʻOtuá. Taʻu 120 K.M. nai.
Vahe 26
ʻOku tokolahi ha kāingalotu ʻo e siasí kuo tākiekina ki he fai angahalá ʻe he kau taʻetuí—ʻOku talaʻofa kia ʻAlamā te ne maʻu ʻa e moʻui taʻengatá—ʻOku maʻu ʻa e fakamolemolé ʻe kinautolu ʻoku fakatomala mo papitaisó—Ko e kāingalotu ʻo e Siasí ʻoku fai angahala ka ʻoku nau fakatomala mo vete ʻenau angahalá kia ʻAlamā mo e ʻEikí ʻe fakamolemoleʻi ʻa kinautolu; pea ka ʻikai, ʻe ʻikai lau ʻa kinautolu ʻi he kakai ʻo e Siasí. Taʻu 120–100 K.M. nai.
Vahe 27
ʻOku tapui ʻe Mōsaia ʻa e fakatangá pea tuʻutuʻuni ke nau tuʻunga tatau—ʻOku feinga ʻa ʻAlamā ko e siʻi mo e ngaahi foha ʻe toko fā ʻo Mōsaiá ke fakaʻauha ʻa e siasí—ʻOku hā mai ha ʻāngelo ʻo fekau ke taʻofi ʻenau ngaahi ngāue koví—ʻOku taaʻi ʻa ʻAlamā ʻo noa—Kuo pau ke fanauʻi foʻou ʻa e faʻahinga kotoa ʻo e tangatá ka nau maʻu ʻa e fakamoʻuí—ʻOku malanga ʻaki ʻe ʻAlamā mo e ngaahi foha ʻo Mōsaiá ʻa e ngaahi ongoongo fakafiefiá. Taʻu 100–92 K.M. nai.
Vahe 28
ʻOku ʻalu ʻa e ngaahi foha ʻo Mōsaiá ke malanga ki he kau Leimaná—ʻOku ngāue ʻaki ʻe Mōsaia ʻa e ongo maka kikité, ʻo ne liliu ʻa e ngaahi peleti ʻa Sēletí. Taʻu 92 K.M. nai.
Vahe 29
ʻOku fokotuʻu ʻe Mōsaia ke fili ha kau fakamaau kae ʻikai ko ha tuʻi—ʻOku hanga ʻe he ngaahi tuʻi taʻe-māʻoniʻoní ʻo tataki honau kakaí ki he angahalá—ʻOku fili ʻa ʻAlamā ko e siʻí ko e fakamaau lahi ʻi he leʻo ʻo e kakaí—ʻOkú ne toe hoko foki ko e taulaʻeiki lahi ki he Siasí—ʻOku pekia ʻa ʻAlamā ko e lahí mo Mōsaia. Taʻu 92–91 K.M. nai.