Puk lal Omni

1 Liye, tukun ma inge nga, Omni, sapkihnyuck sin pahpah tuhmuhk, Jarom, tuh nga in sihm ke plwet inge, in karuhnguhnwacng tahk in sucu lasr—

2 Ohinge, ke pacl luhk, nga ke tuh kowos in etuh lah nga mweun yohk ke katlas in karuhnguhnwacng mwet luhk, mwet Nephi, in tiac puhtatyang nuh in poun mwet lokoalok lalos, mwet Laman. Tuh liye, nga sifacna sie mwet koluk, ac nga tiac karuhnguhnwacng ohiyac luhn acn ac masap luhn Leum ma nga enenuh ngwacn oruh.

3 Ac tukun ma inge yac lofoko ac itnguhul ac ohnkohsr somlah, ac puhluhn pacl na loeloes se lasr in muhta mihs; ac puhluhn pacl na loeloes se in mweun upac ac ahkmas. Ahok, in ahkuhtweyac, yac lofoko ac alngucul ac luo somlah, ac nga karuhnguhnwacng plwet inge fal nuh ke masap luhn pahpah tuhmuhk; ac nga sang nuh sin wen nuhtihk Amaron. Ac nga ahksahfye.

4 Ac inge nga, Amaron, sihmihs oacna sie ma nga sihmihs, suc puh, lun puk luhn pahpah tuhmuhk.

5 Liye, tukun ma inge yac tolfoko ac longoul somlah, ohiyac koluk yohk luhn mwet Nephi kuhnausyucklac.

6 Tuh Leum El ac tiac lwelah, tukun El kohlohloslac liki acn Jerusalem ac liyaclosyang ac karuhnguhnuhlosyang liki poun mwet lokoalok lalos, ahok, El ac tiac lwelah tuh kahs fah tiac ahkpwacyeiyeyuck, suc El sramsram nuh sin pahpah tuhmwacsr, fahk lah: Kowos fin tiac liyacacng masap luhk kowos fah tiac kapkapwack fin acn uh.

7 Ohinge, Leum El forfor nuh yohrohlos ke nuhnuhnkuh yohk; ne ohinge, El sruokyac moul luhn mwet suwohswohs tuh elos in tiac misac, tuhsruhk usacloslac liki poun mwet lokoalok lalos.

8 Ac tukun ma inge nga sang plwet ah nuh sin tamuhlwel luhk Chemish.

9 Inge nga, Chemish, sihmihs ma puh suc nga suhmuhslah, ke pac na puk se wi tamuhlwel luhk; tuh liye, nga liye ma sahflah suc el suhmuhslah, tuh el suhmuhslah ke pahol sifacna; ac el suhmuhslah ke lwen se el tuh use nuh sihk ah. Ac tukun ohiyac se inge kuht karihngihn ma sihmlac, in fal nuh ke masap luhn pahpah tuhmwacsr. Ac nga ahksahfye.

10 Liye, nga, Abinadom, pa wen nahtuhl Chemish. Liye, tukun ma inge nga liye mweun ac fohs yohk inmahsrlon mwet luhk, mwet Nephi, ac mwet Laman; ac nga, ke katlas nuhtihk sifacna, eislah moul luhn mwet Laman pucspucs nuh ke loangwelah luhn mwet wiyuck.

11 Ac liye, ma sihmlac ke mwet inge taflweyucklac ke plwet ma oan sin tohkohsra, wiwi fihl nuh ke fihl; ac nga etuh wacngihn fwackyuck sahyacn na ma suc sihmlac, kuh pahluh; ohinge, ma suc fal sihmlac tari. Ac nga ahksahfye.

12 Liye, nga pa Amaleki, wen nahtuhl Abinadom. Liye, nga fah sramsram nuh sum kuhtuh kacl Mosiah, suc tuh oreklac in tohkohsrah fin acn Zarahemla; tuh liye, el sensenkihnyuck sin Leum lah el enenuh in kahinglac liki acn Nephi, ac elos nuhkwewa suc lohng puhsren Leum fah oacyacpac som liki acn uh weluhl, nuh innimac—

13 Ac tukun ma inge el oruh fal oacna ke Leum El sapkihn nuh sel. Ac elos som liki acn ah nuh innimac, puhkantwen mwet lohng puhsren Leum; ac elos kolyucklac ke luti ac pahluh pucspucs. Ac elos lutiyuck pacl nuhkwewa ke kahs luhn God; ac elos kolyucklac ke kuh luhn pahol, nuh innimac ne ke na elos tuhkuh nuh ke acn se ma pahngpahng acn Zarahemla.

14 Ac elos konwacack un mwet se, suc pahngpahng mwet Zarahemla. Inge, oasr engan yohk inmahsrlon mwet Zarahemla; ac oacyacpac Zarahemla el engan na upac, ke srihpen Leum El suhpwaclah mwet lal Mosiah wi plwet in prahs ma nein ma sihmlac luhn mwet Jew.

15 Liye, tukun ma inge Mosiah el konwacack lah mwet Zarahemla elos tuhkuh Jerusalem me ke pacl se Zedekiah, tohkohsrah luhn Judah, el utucklac srohoh nuh Babylon.

16 Ac elos fuhfahsryucsr ke innimac, ac kolyuck ke poun Leum tuhpallah kof yohk, nuh ke acn ma Mosiah el konwaclosyak we; ac elos muhta we ke pacl sac fahlac.

17 Ac ke pacl se Mosiah el konwaclosyak ah, elos arulacna puhseni. Ne ohinge, puhkantwen mweun ac fohs yohk lalos, ac acnwucki ke katlas ke pacl nuh ke pacl; ac kahs lalos eklac sielacna; ac wacngihn ma sihmlac elos us weluhlos; ac elos lahfwekihn El suc oracloslac; ac Mosiah, kuh tiac pac mwet lal Mosiah, kuh in kahlwem selos.

18 Tuhsruhk tukun ma inge Mosiah el oruh tuh elos in lutiyuck ke kahs lal. Ac tukun ma inge tukun elos lutiyuck ke kahs lal Mosiah, Zarahemla el oruh sie tahk sucu ke pahpah tuhmwacl kwewa, in fal nuh ke esam lal; ac sihmlac ma inge, tuhsruhk tiac oan lun plwet inge.

19 Ac tukun ma inge mwet lal Zarahemla, ac lal Mosiah, toweni ma sefanna; ac Mosiah el srihsrngiyucki in tohkohsrah lalos.

20 Ac tukun ma inge ke pacl lal Mosiah, oasr sie yot luhlahp utuckuh nuh yohrohl ma oasr sihm kac; ac el luhngas sihm kac ah ke mwe sang ac kuh luhn God.

21 Ac ma inge sang sie sramsram kacl Coriantumr, ac acnwucklac luhn mwet lal. Ac Coriantumr el konweyuckyak sin mwet lal Zarahemla; ac el muhta weluhlos ke lusen mahlwem yuc.

22 Sramsram sac sruhmuhn kahs puh ke pahpah tuhmwacl. Ac pahpah tuhmwacl ac ninac kiyacl emet tuhkuh ke taor, ke pacl se Leum El ahkfohsyeack kahs luhn mwet ah; ac kasrkuhsrak luhn Leum puhtati nuh faclos fal nuh ke nuhnuhnkuh Lal, suc suwos; ac sri kaclos oaclihk acn ma oan nuh acir.

23 Liye, nga, Amaleki, tuh isuslac ke pacl lal Mosiah; ac nga moul liye misac lal; ac Benjamin, wen nahtuhl, kol aholuhl.

24 Ac liye, nga liye, ke pacl lal tohkohsrah Benjamin, sie mweun na upac ac yohk ahkmas inmahsrlon mwet Nephi ac mwet Laman. Tuhsruhk liye, mwet Nephi wo kuhtuh nuh se luhkwelos; ahok, na oruh tohkohsrah Benjamin el ukwaclosyak liki acn Zarahemla.

25 Ac tukun ma inge nga muhtwacwacack in mahtohoh; ac, wacngihn tuhlihk nuhtihk, ac etwacl tohkohsrah Benjamin lah el sie mwet suwohs ye muhtuhn Leum, ohinge, nga fah sang plwet inge nuh sel, kwacfe mwet nuhkwewa in tuhkuh nuh yurun God, El suc Muhtahl luhn Israel, ac luhlahlfongi ke pahluh, ac ke fwackyuck, ac ke luti luhn lipufacn, ac ke mwe sang luhn sramsram ke lohoh, ac ke mwe sang luhn luhngaslah kahs, ac ke ma nuhkwewa ma wo; tuh wacngihn ma suc wo fin tiac tuhkuh yurun Leum: ac tuh ma suc koluk tuhkuh yurun devil.

26 Ac inge, mwet sacohk wiyuck, nga ke tuh kowos in tuhkuh nuh yurun Kraist, suc El pa Muhtahl luhn Israel, ac ipeis ke molwelah Lal, ac kuh luhn iwaclah Lal. Ahok, tuhkuh nuh Yohrohl, ac sang nguhnum nohfohn in sie mwe kihsac nuh Sel, ac kalweni in lalo ac pruhe, ac muhtweng ne ke sahflah; ac ke Leum El moul kom fah moliyucklac.

27 Ac inge ngwac sramsram kuhtuh ke sie pihsac suc som nuh innimac in fohlohk nuh ke acn Nephi; tuh oasr sie pihsac na yohk suc kena sruokyac acn wihlwihl selos.

28 Ohinge, elos som nuh innimac. Ac mwet kol lalos el sie mukul kuh ac fokoko, ac lihkkeke, ohinge el oraclah sie fohs inmahsrlolos; ac elos nuhkwewa acnwucklac, sahyacn luhmngaul, ke innimac, ac elos sifil fohlohk nuh ke acn Zarahemla.

29 Ac tukun ma inge elos oacyacpac us kuhtuh pac ke sie pihsac fal, ac sifilpac eis fuhfahsryucsr lalos nuh innimac.

30 Ac nga, Amaleki, oasr sie tamuhlwel wiyuck, suc oacyacpac weluhlos som; ac nga sonna sifil etuh kaclos. Ac nga apkuhran in toplac lun kuclyuck luhk; ac plwet inge nwacnwaclah. Ac nga ahksahfye sramsram luhk.