Ŋwed Omni

1 Sese, edikem ete ami, Omni, ke mma ŋkɔbɔ uyo nto ete mi, Jarom, ete yak ami ŋwet ekpri ke mme usan emi, man etim mbuk emana nnyin enim—

2 Ke ntre, ke eyo mi, ami moyom nte mbufo efiɔk ete ke ami mma ŋwana eti eti ye ofut man ntim ikɔt mi, mme Nephite, nnim, man ididuɔ iduk ke mme ubɔk asua mmɔ, mme Lamanite. Edi sese, ami ke idem mi ami ndi idiɔk owo, ndien ami nnimke mme ewuhɔ ye ibet Jehovah nte akpanade nte ami nnam.

3 Ndien edikem ete isua ikie iba ye ata ye duop ye itiokiet ama ebe efep, ndien nnyin ima inyene ediwak ini emem; ndien nnyin ima inyene ediwak ini ɔkpɔsɔŋ ekɔŋ ye uduɔk iyip. Iŋ, ndien ke akpatre, isua ikie iba ye anaŋ ye iba ama ebe efep, ndien ami nnim mme usan emi nte asaŋade ye ibet mme ete mi; ndien ami nyak mmɔ nnɔ eyen mi Amaron. Ndien ami ntre.

4 Ndien idahaemi ami, Amaron, ŋwet mme ŋkpɔ ekededi eke ami ŋwetde, emi edide ekpri, ke ŋwed ete mi.

5 Sese, edikem ete isua ikie ita ye edip ama ebe efep, ndien ema esobo idiɔk ubak mme Nephite emi okponde akan.

6 Koro Jehovah idiyakke, ke ini enye ama akada mmɔ ɔwɔrɔ ke isɔŋ Jerusalem ndien ekpeme onyuŋ etim mmɔ enim iyakke eduɔ eduk mme ubɔk asua mmɔ, iŋ, enye idiyakke ete ukusɔŋɔ mme ikɔ, emi enye eketiŋde ɔnɔ mme ete nnyin, ete ke: Adaŋa nte mbufo midinimke ibet mi mbufo idiforoke ke isɔŋ.

7 Ke ntre, Jehovah ama ese mmɔ ye akwa ubiere ikpe; edi, enye ama anyaŋa mme nnen nnen owo man mmɔ ekutak, edi anam mmɔ ebɔhɔ ewɔrɔ ke mme ubɔk mme asua mmɔ.

8 Ndien edikem ete ami nyak mme usan nnɔ eyen eka mi Chemish.

9 Ndien ami, Chemish, ŋwet mkpri ŋkpɔ emi ami ŋwetde, ke ukem usan ye eyen eka mi; koro sese, ami mma ŋkut akpatre emi enye ekewetde, nte ke enye ekewet enye ye ubɔk esie; ndien ke enye ekewet enye ke usen emi enye akayakde mmɔ ɔnɔ mi. Ke usuŋ ntem ke nnyin ikiwet mme ŋwed emi, koro edi nte asaŋade ye ibet mme ete nnyin. Ndien ami ntre.

10 Sese, ami, Abinadom, ndi eyen eren Chemish. Sese, edikem ete ami mma ŋkut ediwak ekɔŋ ye eneni ke ufɔt ikɔt mi, mme Nephite, ye mme Lamanite; ndien ami, ye ofut mi, mma nda ediwak uwem mme Lamanite man mkpeme nditɔ eka mi.

11 Ndien sese, emiŋ ŋwed mbon emi ke mme usan emi mme ndidem enyenede, nte asaŋade ye mme emana; ndien ami mfiɔkke mbaŋa eriyarare ndomo kiet ibɔhɔke enye emi ewetde, ye prophecy; ke ntre, enye emi ekemde ke ewet. Ndien ami ntre.

12 Sese, ami ndi Amaleki, eyen Abinadom. Sese, ami nyetiŋ nnɔ mbufo ekpri mbaŋa Mosiah, emi ekenamde edidem ke isɔŋ Zarahemla; koro sese, ke ntak emi Jehovah akasiande enye ete enye efehe ɔwɔrɔ ke isɔŋ Nephi, ndien nte ekewawak emi edikpaŋde utɔŋ inɔ uyo Jehovah ewɔrɔ nko ke isɔŋ oro ye enye, eka wilderness

13 Ndien edikem ete enye anam nte Jehovah ɔkɔnɔde enye uyo. Ndien mmɔ ewɔrɔ ke isɔŋ oro eka wilderness nte ekpewawak emi edikpaŋde utɔŋ inɔ uyo Jehovah; ndien edi ediwak ukwɔrɔ ikɔ ye nditiŋ nte prophet ekeda mmɔ usuŋ. Ndien ikɔ Abasi eteme mmɔ kpukpru ini; ndien edi odudu ubɔk esie akada mmɔ usuŋ, ke wilderness tutu mmɔ esuhɔre edi ke isɔŋ emi ekotde isɔŋ Zarahemla.

14 Ndien mmɔ ekut mme owo, emi ekekotde mbon Zarahemla. Ndien akwa idaresit ama odu ke ufɔt mbon Zarahemla; ndien ŋko Zarahemla ama adaresit ata eti eti; koro Jehovah ama ɔnɔ ikɔt Mosiah ye mme usan brass edi emi ekesinede ŋwet mme Jew.

15 Sese, edikem ete Mosiah ɔfiɔk ete ke mbon Zarahemla ekewɔrɔ ke Jerusalem ke ini emi ekemende Zedekiah, edidem Judah, ewɔrɔ nte owo ŋkpɔkɔbi eka Babylon.

16 Ndien mmɔ ema esaŋa ke wilderness, ndien ubɔk Jehovah akada mmɔ ebe mme akwa mmɔŋ, oduk ke isɔŋ emi Mosiah okokutde mmɔ; ndien mmɔ ekeduŋ do tɔŋɔ ke ini oro ka iso.

17 Ndien ke ini emi Mosiah okokutde mmɔ, mmɔ ema ewak ata eti eti. Edi, mmɔ ema enyene ediwak ekɔŋ ye mme ɔkpɔsɔŋ eneni, ndien ema eduɔ ke ofut ke ini ke ini; ndien usem mmɔ ama akabare abiara; ndien mmɔ ikimenke ŋwed ndomo kiet ye mmɔ; ndien mmɔ ekaŋ ke Andibot mmɔ odu; ndien Mosiah, ye ikɔt Mosiah, ikifiɔke usem mmɔ.

18 Edi edikem ete Mosiah anam ete ekpep mmɔ ke usem esie. Ndien edikem ete ke ini ema ekekpep mmɔ ke usem Mosiah, Zarahemla ɔnɔ mbuk emana mme ete esie, nte enye etide; ndien ewet mmɔ, edi idige ke mme usan emi.

19 Ndien edikem ete mbon Zarahemla, ye eke Mosiah, ema ediana kiet; ndien ema emek Mosiah ete edi edidem mmɔ.

20 Ndien edikem ke eyo Mosiah, ema emen akamba itiat emi emiŋde mme ŋkpɔ ke idem esie esɔk enye; ndien enye ama akabare mme ŋkpɔ emi emiŋde ke enɔ ye odudu Abasi.

21 Ndien mmɔ enɔ mbuk ebaŋa Coriantumr kiet, ye nte ekewotde ikɔt esie. Ndien mbon Zarahemla ekekut Coriantumr; ndien enye oduŋ ye mmɔ ke ufaŋ ɔfiɔŋ usukkiet.

22 Enye ŋko etiŋ mme ikɔ ifaŋ abaŋa mme ete esie. Ndien mme akpa ete ye eka esie ekewɔrɔ ke tower, ke ini emi Jehovah eketimere usem mme owo; ndien ɔkpɔsɔŋ ufen Jehovah odoro mmɔ ke idem nte asaŋade ye mme ubiere ikpe esie, emi edide edinen; ndien ɔkpɔ mmɔ asuana ana ke isɔŋ ke ŋkaŋ edere.

23 Sese, ami, Amaleki, ŋkamana ke eyo Mosiah; ndien ami modu uwem ŋkut mkpa esie; ndien Benjamin, eyen esie, akara ke itie esie.

24 Ndien sese, ami mokut, ke eyo edidem Benjamin, ɔkpɔsɔŋ ekɔŋ ye ata uduɔk-iyip ke ufɔt mme Nephite ye mme Lamanite. Edi sese, mme Nephite ema enyene akamba ufɔn ekan mmɔ; iŋ, tutu ete ke edidem Benjamin ama ebin mmɔ osio ke isɔŋ Zarahemla.

25 Ndien edikem ete ami ntɔŋɔ ndisɔŋ; ndien, ke ntak emi menyeneke ubon, ndien ke ntak emi ŋkɔfiɔkde edidem Benjamin nte edinen owo ke iso Jehovah, ke ntre, ami nyayak mme usan emi nnɔ enye, ndien ami nteme kpukpru owo nte edi etiene Abasi, Edisana Abasi Israel, enyuŋ enim ke nditiŋ nte prophet, ye ke mme eriyarare, ye ke mme angel asaŋa utom, ye ke enɔ nditiŋ mme usem, ye ke enɔ ndikabare mme usem, ye ke kpukpru ŋkpɔ emi efɔnde; koro ŋkpɔ ndomo kiet emi ɔfɔnde iduhe ibɔhɔke oto Jehovah: ndien enye emi ɔdiɔkde oto satan.

26 Ndien idahaemi, nditɔ eka mi, ami nyom nte mbufo edi etiene Christ, emi edide Edisana Owo Israel, enyuŋ ebuana ke erinyaŋa esie, ye odudu erifak esie. Iŋ, etiene enye, enyuŋ ewa ofuri ukpɔŋ mbufo nte uwa enɔ enye, enyuŋ eka iso ke nditre udia ye ke ndibɔŋ akam, enyuŋ eme tutu esim utit; ndien ma uwem Jehovah eyenyaŋa mbufo.

27 Ndien idahaemi ami nyetiŋ ekpri mbaŋa ibat owo emi ekedɔkde eka wilderness man enyɔŋ eka isɔŋ Nephi; koro ediwak ibat owo ema edu emi ekenyenede udɔŋ ndinyene isɔŋ inyene mmɔ.

28 Ke ntre, mmɔ edɔk eka wilderness Ndien ada usuŋ mmɔ ekedi enyene odudu ye ɔkpɔsɔŋ owo, ye ɔsɔŋ-ibuot owo, ke ntre enye anam eneni odu ke ufɔt mmɔ; ndien ema ewot kpukpru mmɔ, ibɔhɔke aba ye duop, ke wilderness, ndien mmɔ efiak enyɔŋ eka isɔŋ Zarahemla.

29 Ndien edikem ete mmɔ nko emen mbon efen emi ibat awakede ekpri, ndien efiak eda isaŋ mmɔ eka wilderness

30 Ndien ami, Amaleki, mma nyene eyen eka, emi ŋko akakade ye mmɔ; ndien ami tɔŋɔ ke ini oro mfiɔkke ŋkpɔ mbaŋa mmɔ. Ndien ami mmɔŋ nsuhɔre nna ke udi mi; ndien mme usan emi eyɔhɔ. Ndien ami mmetre nditiŋ ikɔ mi.