Mme Ikɔ Mormon

1 Ndien idahaemi ami, Mormon, nyom ndiyak ŋwed emi ami ŋkewetde nsin ke mme ubɔk eyen mi Moroni, sese ami mokut ekpri ayak ke kpukpru nsobo ikɔt mi, mme Nephite.

2 Ndien edi ediwak isua ikie ke ini Christ ama ekedi ke ami nyak mme ŋwed emi nsin ke mme ubɔk eyen mi; ndien enye ke ami ŋkere nte ke enye eyetie ntiense abaŋa ofuri nsobo ikɔt mi. Edi yak Abasi ayak ete enye ɔbɔhɔ mmɔ, man enye ewet ekpri abaŋa mmɔ, ye ekpri abaŋa Christ, ete ke ekeme ndidi ke usen kiet enye eyenyene ufɔn ɔnɔ mmɔ.

3 Ndien idahaemi, ami ntiŋ ekpri mbaŋa ŋkpɔ emi ami ŋwetde; koro ke ini ami mma ŋkanam ibio nto mme usan ŋwed emi Nephi ekewetde, ɔsuhɔre esim ukara edidem Benjamin emi, emi Amaleki eketiŋde abaŋa, ami nduŋɔre ke otu mme ŋwed emi ekeyakde esin mi ke ubɔk, ndien ami ŋkut mme usan emi, emi ɔdɔŋɔde ekpri mbuk mme prophet, tɔŋɔ ke Jacob suhɔre sim ukara edidem Benjamin emi, nko ye ediwak ikɔ Nephi.

4 Ndien mme ŋkpɔ emi edude ke mme usan emi enemde mi, ke ntak nditiŋ nte mme prophet kabaŋa edidi Christ; ndien mme ete mi efiɔk ete ke ediwak mmɔ esu; iŋ, ndien ami ŋko mɔfiɔk nte ke ediwak emi eketiŋde nte prophet kabaŋa nnyin suhɔre sim usen emi esu, ndien ediwak emi ebede ekpɔŋ mfin emi ke akpanikɔ ena esu—

5 Ke ntre, ami mmek mme ŋkpɔ emi, ndikure ŋwed mi ke mmɔ, emi nsuhɔ ŋwed mi ami nyada nto mme usan ŋwed emi Nephi ekewetde; ndien ami ŋkemeke ndiŋwed ubak ikie eke mme ŋkpɔ ikɔt mi.

6 Edi sese, ami nyada mme usan emi, emi ɔdɔŋɔde nte etiŋde nte mme prophet emi ye mme eriyarare, nyuŋ nsin mmɔ ye nsuhɔ ŋwed mi, koro mmɔ edi se emekde enɔ mi; ndien ami mɔfiɔk ke mmɔ eyedi se emekde enɔ nditɔ eka mi.

7 Ndien ami nnam ŋkpɔ emi nnɔ eti ntak; koro ntem ke enye ɔdɔŋ odu ye ami, nte asaŋade ye mme edinam Spirit Jehovah emi odude ke ami. Ndien idahaemi, ami mfiɔkke kpukpru ŋkpɔ; edi Jehovah ɔfiɔk kpukpru ŋkpɔ emi enade edi; ke ntre, enye ada mi usuŋ ndinam nte asaŋade ye uduak esie.

8 Ndien akam emi ami mbɔŋde nnɔ Abasi abaŋa nditɔ eka mi, man mmɔ ini kiet efen enyene ifiɔk Abasi, iŋ, erifak Christ; man mmɔ ini kiet efen edi mbon inemesit.

9 Ndien idahaemi ami, Mormon, ŋka iso ndiwet ŋwed mi mma, emi ami ndade nto mme usan ŋwed emi Nephi ekewetde; ndien ami nnam enye nte asaŋade ye ifiɔk ye nte aŋwaŋade emi Abasi ɔnɔde mi.

10 Ke ntre, edikem ke ini Amaleki ama akayak mme usan emi esin ke mme ubɔk edidem Benjamin, enye emen mmɔ onyuŋ esin mmɔ ye mme usan eken, emi ekedɔŋɔde mme ŋwed emi ndidem eke eyakde enɔ, tɔŋɔ ke emana ye emana tutu esim eyo edidem Benjamin.

11 Ndien edi edidem Benjamin akayak mmɔ ɔnɔ, tɔŋɔ ke emana ye emana tutu mmɔ eduɔ eduk ke mme ubɔk mi. Ndien ami, Mormon, mbɔŋ akam nnɔ Abasi nte yak etim mmɔ enim tɔŋɔ ke ini emi ka iso. Ndien ami mɔfiɔk nte ke eyetim mmɔ enim; koro ewet ikpɔ ŋkpɔ ke mmɔ, emi edibierede ikpe inɔ ikɔt mi ye nditɔ eka mmɔ ke akwa ye akpatre usen oro, nte asaŋade ye ikɔ Abasi emi ewetde.

12 Ndien idahaemi, kabaŋa edidem Benjamin emi—enye ama enyene mkpri eneni ke ufɔt ikɔt esie.

13 Ndien edikem ŋko ete mbon ekɔŋ mme Lamanite esuhɔre ewɔrɔ ke isɔŋ Nephi, ndiŋwana ekɔŋ ye ikɔt esie. Edi sese, edidem Benjamin obon mbon ekɔŋ esie kiet, ndien enye aŋwana ye mmɔ; ndien enye ama aŋwana ye odudu ubɔk esie, ye ofut Laban

14 Ndien ke odudu Jehovah mmɔ ema eŋwana ye mme asua mmɔ; tutu mmɔ ewot ediwak tɔsin mme Lamanite. Ndien edikem ete mmɔ ema eŋwana ye mme Lamanite tutu mmɔ ebin mmɔ esio ke kpukpru isɔŋ inyene mmɔ.

15 Ndien edikem ete ke ini mme nsu nsu Christ ema ekedu, ndien ekibi mmɔ inua, enyuŋ enɔ mmɔ ufen nte asaŋade ye mme idiɔk ŋkpɔ mmɔ;

16 Ndien ke ini mme nsu nsu prophet ema ekedu, ye mme nsu nsu andikwɔrɔ ye mme andikpep ke ufɔt mme owo, ndien enɔ kpukpru mmɔ ufen nte asaŋade ye mme idiɔk ŋkpɔ mmɔ; ndien ke ini ɔkpɔsɔŋ eneni ye ediwak mfiakedem ema ekedu ke ufɔt mme Lamanite, sese, edikem ete edidem Benjamin, ye uŋwam eke mme edisana prophet emi ekedude ke ufɔt ikɔt esie—

17 Koro sese, edidem Benjamin ekedi edisana owo, ndien enye ama akara ikɔt esie ke nnen nnen usuŋ; ndien ediwak ndisana owo ema edu ke isɔŋ, ndien mmɔ ema etiŋ ikɔ Abasi ye odudu ye unen; ndien mmɔ ema eda ɔkpɔsɔŋ nsɔŋ-ido ke ntak nsɔŋ-ibuot mme owo etiŋ ikɔ—

18 Ke ntre, ye uŋwam mmɔ emi, edidem Benjamin, ke ndinam utom ye ofuri odudu idem esie ye ekikere ofuri ukpɔŋ esie, ŋko ye mme prophet, ama afiak esin emem ke isɔŋ.