Kahs lal Mormon

1 Ac inge nga, Mormon, ahkolah in sang ma sihmlac suc nga oraclah nuh in poun wen nuhtihk Moroni, liye nga lohoh ke apkuhran in kuhnausyucklac nohfohn mwet luhk, mwet Nephi.

2 Ac yac siofok pucspucs tukun tuhkuh luhn Kraist nga sang ma sihmlac inge nuh in poun wen nuhtihk; ac oasr sihk lah el fah lohoh ke kuhnausyucklac nuhkwewa luhn mwet luhk. Tuhsruhk lwelah God Elan sang tuh elan pain moullac, tuh elan kuh in sihmihs kuhtuh kaclos, ac kuhtuh ke Kraist, tuh sahp ke kuhtuh pacl tok in ma wo nuh selos.

3 Ac inge, ngwac sramsram kuhtuh ke ma suc nga suhmuhslah; tuh tukun nga oraclah sie sramsram fototo ke plwet lal Nephi, ne ke kol luhn tohkohsrah Benjamin se inge, suc Amaleki el sruhmuhn kacl, nga suk ke inmahsrlon ma sihmlac suc utuckuh nuh in pouk, ac nga konwacack plwet inge, suc nein sramsram srihsrihk luhn mwet pahluh, muhtwacwacack kacl Jacob ne ke kol lal tohkohsrah Benjamin se inge, ac oacyacpac ke kahs pucspucs lal Nephi.

4 Ac ma suc oan ke plwet inge nga wokihn, ke srihpen pahluh ke tuhkuh luhn Kraist; ac pahpah tuhmuhk el etuh lah puhkantwen sin pahluh inge ahkpwacyeiyucklac; ahok, ac nga oacyacpac etuh lah ma pucspucs ma palyeiyuck kacsr nuh ke pacl se inge ahkpwacyeiyuck, ac ma pucspucs ma ac sikyak tukun pacl se inge fahlac uh pwacyena lah ac sikyak—

5 Ohinge, nga sulaclah ma inge, in ahksahfye ma sihmlac luhk kac, suc ma luhlah ke ma sihmlac luhk nga fah eis ke plwet lal Nephi; ac nga tiac kuh in sihmihs siofok ip ke ma luhn mwet luhk.

6 Tuh liye, nga fah eis plwet inge, suc nein pahluh ac fwackyuck inge, ac likiyac in wi ma luhlah ke ma sihmlac luhk, tuh ma inge sacohk nuh sihk; ac nga etuh ma inge ac fah sacohk nuh sin mwet wiyuck.

7 Ac nga oruh ma inge ke sie srihpac lahlmwetmwet; tuh ohinge mahmah nuh sihk, fal nuh ke orekma luhn Nguhn luhn Leum suc oasr in nga. Ac inge, nga tiac etuh ma nuhkwewa; tuhsruhk Leum El etuh ma nuhkwewa suc ac fah tuhkuh; ohinge, El orekmakihnyuc in oruh fal nuh ke luhngse Lal.

8 Ac pruhe luhk nuh sin God ke mwet wiyuck, tuh elos in kuh in sifilpac etwacack ke God, ahok, ke molwelah luhn Kraist; tuh elos in kuh in sifilpac sie un mwet engan.

9 Ac inge nga, Mormon, tahfwelah in ahksahfye ma sihmlac luhk, suc nga eis ke plwet lal Nephi; ac nga oraclah fal nuh ke etwacack ac etatwen suc God El use nuh sihk.

10 Ohinge, tukun ma inge tukun Amaleki el uslah plwet inge nuh in pahol tohkohsrah Benjamin, el eis ac likiyac wi plwet sahyac, suc nein ma sihmlac ma utuckuh sin tohkohsrah, ke fihl nuh ke fihl ne ke pacl lal tohkohsrah Benjamin.

11 Ac ma inge utuckuh nuh yohrohl tohkohsrah Benjamin, ke fihl nuh ke fihl ne ke na ma inge puhtatyang oan in pouk. Ac nga, Mormon, pruhe nuh sin God tuh ma inge in karihngihnyuckyang ke pacl se inge fahlac. Ac nga etuh lah ac karihngihnyuckyang; tuh oasr ma yohk sihmihsyucklac kac, ke ma suc mwet luhk ac mwet wiyaclos fah nuhnuhnkweyuck ke lwen yohk ac sahflah sac, fal nuh ke kahs luhn God suc sihmlac.

12 Ac inge, nuh kacl tohkohsrah Benjamin se inge—el luhman fohs kuhtuh nuh inmahsrlon na mwet lal sifacna.

13 Ac tukun ma inge solse luhn mwet Laman oacyacpac tuhkuh liki acn Nephi, in mweun lain mwet lal. Tuhsruhk liye, tohkohsrah Benjamin el oracni nuh sie solse lal, ac el tuyak lainuhlos; ac el acnwuck ke kuhiyacn pahol sifacna, ke katlas nahtuhl Laban.

14 Ac ke kuh luhn Leum elos fohs lain mwet lokoalok lalos, ne ke na elos uniyac tausin pucspucs luhn mwet Laman. Ac tukun ma inge elos fohs lain mwet Laman ne ke na elos luhswaclosyak liki acn ma wihlwihl nuh selos.

15 Ac tukun ma inge tukun oasr Kraist suhtuhuh, ac inwacluhlos kauli, ac elos nuhnuhnkweyuck fal nuh ke ma koluk lalos;

16 Ac tukun oasr mwet pahluh suhtuhuh, ac pahstuh ac mwet luti suhtuhuh inmahsrlon mwet ah, ac elos inge nuhkwewa nuhnuhnkweyuck fal nuh ke ma koluk lalos; ac tukun fohs yohk ac akuhkuhin pucspucs isacloslac nuh yurun mwet Laman, liye, tukun ma inge tohkohsrah Benjamin, ke kahsreyuck luhn mwet pahluh muhtahl suc oasr inmahsrlon mwet lal—

17 Tuh liye, tohkohsrah Benjamin el sie mukul muhtahl, ac el kol mwet lal ke suwohswohs; ac puhkantwen mwet muhtahl fin acn uh, ac elos sramsram ke kahs luhn God ke kuh ac wal; ac elos orekmakihn kahs kohsroh ke srihpen lihkkeke luhn mwet ah—

18 Ohinge, ke kahsruh inge, tohkohsrah Benjamin, ke orekma luhn kuhiyacn mahnol nohfohn ac kuhiyacn nguhnal kwewa, ac oacyacpac mwet pahluh, sifil pac oakiyac mihs nuh fin acn uh.