Ang Mga Pulong ni Mormon

1 Kag karon ako, si Mormon, nga nakahanda na nga ihatag ang kasulatan nga akon ginahimo sa mga kamot sang akon anak nga si Moroni, tan-awa nasaksihan ko ang halos tanan nga kalaglagan sang akon katawhan, ang mga Nefinhon.

2 Kag madamo nga ginatos ka tuig na pagkatapos sang pagkari ni Cristo sang ihatag ko ining mga kasulatan sa mga kamot sang akon anak; kag nagapati ako nga masaksihan niya ang bug-os nga kalaglagan sang akon katawhan. Apang kabay nga itugot sang Dios nga maluwas sia sa mga ini, agud nga makasulat pa gid sia gawa parte sa ila, kag amo man parte kay Cristo, agud nga basi pa lang sa pila ka adlaw mangin mapuslanon ini sa ila.

3 Kag karon, magahambal ako gawa parte sa sinang akon ginsulat; kay pagkatapos nga makahimo ako sang pinalip-ot nga kasulatan halin sa mga lamina ni Nefi, tubtob sa pagginahum sining haring Benjamin, nga ginhambal ni Amaleki, gintun-an ko ang mga kasulatan nga ginhatag sa akon mga kamot, kag nasalapoan ko ining mga lamina, nga nagaunod sining diutay nga kasaysayan sang mga propeta, halin kay Jacob tubtob sa pagginahum sining haring Benjamin, kag madamo man sang mga pulong ni Nefi.

4 Kag ang mga butang nga yari sa sining mga lamina nakapalipay sa akon tungod sang mga propesiya parte sa pagkari ni Cristo; kag ang akon mga amay nakahibalo nga madamo sa mga ini ang natuman na; huo, kag nakahibalo man ako nga ang tanan nga butang nga ginpropesiya parte sa amon tubtob sa sini nga adlaw natuman na, kag ang tanan nga matabo pa lang lampas sa sini nga adlaw pat-od gid nga matabo—

5 Gani, ginpili ko ining mga butang, agud tapuson ang akon kasulatan sa mga ini, nga ang amo nga nabilin sang akon kasulatan pagakuhaon ko sa mga lamina ni Nefi; kag indi ko masulat ang ika-isa ka gatos nga bahin sang mga butang parte sa akon katawhan.

6 Apang tan-awa, pagakuhaon ko ining mga lamina, nga nagaunod sining mga pagpropesiya kag mga rebelasyon, kag ilakip ang mga ini sa nabilin ko nga kasulatan, kay hamili ang mga ini sa akon; kag nahibal-an ko nga mangin hamili ang mga ini sa akon mga kauturan.

7 Kag ginahimo ko ini para sa isa ka maalamon nga katuyoan; kay gani nagahutik ini sa akon, suno sa mga paghikot sang Espiritu sang Ginuo nga yari sa akon. Kag karon, wala ako nakahibalo sang tanan nga butang; apang ang Ginuo nakahibalo sang tanan nga butang nga magaabot; gani, nagahikot sia sa akon sa paghimo suno sa iya kabubut-on.

8 Kag ang akon pangamuyo sa Dios amo ang parte sa akon mga kauturan, nga kabay nga makadangat sila liwat sa ihibalo parte sa Dios, huo, sa pagtubos ni Cristo; nga kabay nga mangin isa sila liwat ka makalilipay nga katawhan.

9 Kag karon ako, si Mormon, nagapadayon sa pagtapos sang akon kasulatan, nga akon ginkuha sa mga lamina ni Nefi; kag ginahimo ko ini suno sa ihibalo kag sa paghangop nga ginhatag sa akon sang Dios.

10 Gani, natabo ini nga pagkatapos nga ginhatag ni Amaleki ining mga lamina sa mga kamot ni haring Benjamin, ginkuha niya ini kag ginlakip ang mga ini sa iban pa nga mga lamina, nga nagaunod sang mga kasulatan nga ginpasa-pasa halin sa mga hari, sa tanan nga henerasyon tubtob sa mga adlaw ni haring Benjamin.

11 Kag ginpasa-pasa ang mga ini halin kay haring Benjamin, sa tanan nga henerasyon tubtob nga nagtupa ang mga ini sa akon mga kamot. Kag ako, si Mormon, nagapangamuyo sa Dios nga kabay nga maamligan ang mga ini sumugod sa sini nga tion. Kag nakahibalo ako nga pagaamligan ang mga ini; kay may dalagko nga mga butang nga ginsulat sa mga ini, nga suno sa sini ang akon katawhan kag ang ila mga kauturan pagahukman sa dako kag katapusan nga adlaw, suno sa pulong sang Dios nga nasulat.

12 Kag karon, parte sining haring Benjamin—may yara man sing pila ka mga pagbinaisay sa tunga sang iya kaugalingon nga katawhan.

13 Kag natabo man ini nga ang mga kasoldadohan sang mga Lamanhon nagdulhog halin sa duta sang Nefi, sa pagpakig-away batok sa iya katawhan. Apang tan-awa, ginpanipon ni haring Benjamin ang iya mga kasoldadohan, kag nagtindog sia batok sa ila; kag nakig-away sia sa kusog sang iya kaugalingon nga butkon paagi sa espada ni Laban.

14 Kag sa kusog sang Ginuo nakig-away sila batok sa ila mga kaaway tubtob nga nakapatay sila sing madamo nga linibo ka mga Lamanhon. Kag natabo ini nga nakig-away sila sa mga Lamanhon tubtob nga natabog nila ang mga ini pagwa sa tanan nga kadutaan nga ila palanublion.

15 Kag natabo ini nga pagkatapos nga may nangin di-matuod nga mga Cristo, kag ang ila mga baba napakipot, kag napangsilotan sila suno sa ila mga krimen;

16 Kag pagkatapos nga may nangin di-matuod nga mga propeta, kag di-matuod nga mga manugwali kag mga manunudlo sa tunga sang katawhan, kag tanan sang mga ini napangsilotan suno sa ila mga krimen; kag pagkatapos nga may madamo nga pagbinaisay kag madamo nga mga pag-ilinaway sa mga Lamanhon, tan-awa, natabo ini nga si haring Benjamin, upod ang bulig sang balaan nga mga propeta nga yara sa tunga sang iya katawhan—

17 Kay tan-awa, si haring Benjamin isa ka balaan nga tawo, kag naggahum sia sa iya katawhan sa pagkamatarong; kag may madamo nga balaan nga mga tawo sa duta, kag naghambal sila sang pulong sang Dios nga may gahum kag awtoridad; kag naggamit sila sing tuman nga katalom tungod sang kabatinggilan sang katawhan—

18 Gani, sa bulig sang mga ini, si haring Benjamin, paagi sa pagpangabudlay sa bug-os nga kusog sang iya lawas kag sa ikasarang sang iya bug-os nga kalag, kag amo man ang mga propeta, nagpaluntad liwat sang paghidaet sa duta.