Mwakoro 108
Kaotioti ae kaotaki rinanon Iotebwa Timiti te Burabeti, i Kirtland, i Ohio, n Ritembwa 26, 1835. Te mwakoro aei e karekeaki n ana bubuti Lyman Sherman, are e a kaman tia ni katabuaki bwa te itingaun ao are e a tia n roko nakon te Burabeti ma te bubuti ibukin te kaotioti bwa e na kaotaki tabena.
1–3, E kabwaraaki ana bure Lyman Sherman; 4–5, E na warekaki naba ma unimwaane ake taan kairiiri n te Ekaretia; 6–8, E weteaki bwa e na tataekina te euangkerio ao ni kakorakoraia tarina.
1 E koaua ae taku te Uea nakoim, au tia mwakuri ae Lyman: A kabwaraaki am bure, bukina ko a tia n ongeaba nakon bwanaau n roko ikai n te ingabong aei ni karekea te reirei mai iroun are I a tia n rineia.
2 Mangaia are, e riai n rau tamneim ni kaineti ma aron tamneim, ao n aki manga kaitaraa bwanaau.
3 Ao teirake ao tarataraiko raoi ma ngkai ni kawakinan am berita, are ko a tia ni karaoi ao ni karaoia ngkai, ao ko na kakabwaiaki n taian kakabwaia aika rangi ni mwaiti.
4 Tataninga ma te tataonakin nano ni karokoa te botaki n taromauri e na weteia au taan mwakuri, ngkanne ko na uringaki ma au moan unimwaane, ao ni karekea te kariaiakaki man te katabuaki ma nikiraia au unimwaane ake I a tia n rineia.
5 Nooria, aio ana berita te Tama nakoim ngkana ko reitinako ni kakaonimaki.
6 Ao e na koro bukina iaom n te bong anne bwa ko na karekea te kariaiakaki n tataekina au euangkerio n taabo nako are N na kanakoko nako iai, man te tai anne.
7 Mangaia are, kakorakoraia tarim n am kakaraki ni kabane, n am tataro ni kabane, n am kaunganano ni kabane, ao n am mwakuri ni kabane.
8 Ao nooria, ao taraia, I mena iroum ni kakabwaiako ao ni kamaiuko n aki toki. Amen.