N Tebetembwa 30, 1978, n te Ka-tebubua Abwi ma Waniua ni Maungatabu ni Kabuta n Ana Ekaretia Iesu Kristo ibukiia Aika Itiaki ni Boong aika Kaitira ae Uatai Taina n te Ririki, e uotakirake ae kaotaki ikai iroun Beretitenti N. Eldon Tanner, Moan Kauntira n te Moan Beretitentii n te Ekaretia:

Ni moan Tuun n te ririki aei, te Moan Beretitentii e katanoataa bwa iai te kaotioti ae kaotaki nakon Beretitenti Spencer W. Kimball are kona n reke iai te nakoanibonga ao kakabwaia n te tembora nakoia ni kabane mwaane aika tau aika kaain te Ekaretia. Beretitenti Kimball e tia n tua bwa N na tuanga te maungatabu bwa i mwin kaotakin te kaotioti aei, are reke irouna i mwin iangoana ao te tataro i nanon te tai ae maan i nanon ruu aika tabu n te tembora ae tabu, e uotiarake nakoia ana taan ibuobuoki, ake a butimwaia ao a kariaia. E a manga uotakirake nakon te Koram n Abotoro n te Tengaun ma Uoman, ake a nano teuana iai ni kariaia, ao i mwina e uotakirake nakoia ni kabane Mataniwi ni Kabuta ake tabeman, ake a nano teuana ni kariaia n te aro naba aei.

Beretitenti Kimball e tua bwa N na wareka ngkai te reta aio:

Ngkai ti a tia ni kakoaua butanakon ana mwakuri te Uea i aon te aonaba, ti bon kakaitau bwa aomata n aaba aika mwaiti a tia ni kaeka nakon rongorongon te euangkerio ae tia ni kaokaki, ao a kaaina te Ekaretia n te mwaiti ae tabe n rikirake. Man mwiin aei, e a tia ni kaungai nanora ni kan anga nakoia ni kabane kaain te Ekaretia aika tau kabwaiaia ao kakabwaia ni kabane ake a kona n reke n te euangkerio.

Man ataakin taian berita ake a karaoaki irouia burabeti ao beretitenti n te Ekaretia ake mai mwaaira bwa n te tai teuana, n ana babaire te Atua ae akea tokina, ni kabane taari ake a tau a na kona ni karekea te nakoanibonga, ao ni kakoauaan aia kakaonimaki naake e tauaki mai irouia te nakoanibonga, ti a tia ni bubuti n te tai ae maan ma nanora ibukiia naakai, tarira aika kakaonimaki, ni kabanei aoa aika mwaiti n te Ruu are i Eta n te Tembora n onnonia te Uea ibukin kairara mai iroun te Atua.

E a tia n ongo ara tataro, ao man te kaotioti e a tia ni kamatoaaki bwa te bong are e a kaman berita e a roko ngkai are ni kabane mwaane aika kakaonimaki man tau n te Ekaretia a kona ni karekea te nakoanibonga ae tabu, ma te mwaaka ni kamwakura te kariaia mai iroun te Atua are iai, ao ni kimwareirei ma ake a tangiriia n taian kakabwaia nako ake a reke mai iai, ni ikotaki ma kakabwaia n te tembora. Ni kaineti ma aio, ni kabane mwaane aika tau aika kaain te Ekaretia a kona ni katabuaki nakon te nakoanibonga ni aki tabe ma te reeti ke matan kuniia. Taan kairiiri n te nakoanibonga a reiakinaki bwa a na karaua n ira raoi te tua ibukin te marooro ma taan katabuaki ni kabane nakon te Nakoanibonga ae te Aaron ke te Merekitereka ni kakoaua bwa a ira nanon katei n aroaro ake a kateaki ibukin te kororaoi.

Ti taekinna ma nanora ni koaua bwa te Uea e a tia ngkai ni kaota nanona ibukin kakabwaiakiia natina ni kabane n te aonaba ni kabutaa ake a na ongo ni bwanaaia ana taan mwakuri aika kariaiakaki, ao ni katauraoia ni butimwaai kakabwaia ni kabane n te euangkerio.

Ibukina bwa ti butimwaea Spencer W. Kimball bwa te burabeti, te tia mamata, ao te tia kaotioti, ao te beretitenti n Ana Ekaretia Iesu Kristo ibukiia Aika Itiaki ni Boong aika Kaitira, e uotakirake bwa ngaira aika kaain te botaki ti na butimwaea te kaotioti aei bwa ana taeka ao nanon te Uea. Ake a nano iai taiaoka ni kaotia ni katean baimi te angaatai. Ake a kaitara kaotia n te kanikina naba anne.

Te kateibai ni boutoka te kaoti are kaotaki e bon nano teuana ni boutokaaki.