Mwakoro 119
Kaotioti ae kaotaki rinanon Iotebwa Timiti te Burabeti, i Far West, Missouri, n Turai 8, 1838, ni kaeka nakon ana tataro: “O te Uea! Kaotia nakoia am taan mwakuri mwaitira ae ko tangiria man aia bwai am aomata ibukin te kabwianibwai.” Tuan te kabwianibwai, n aron ae ataaki iai ngkai, e tuai kaotaki nakon te Ekaretia i mwaain te kaotioti aei. Te taeka ae kabwianibwai n te tataro ae a tibwa taekinaki ao ni kaotioti ake mai i mwaaina (64:23, 85:3, 97:11) e aki ti nanonaki te katebwiina, ma ami anganano ni kabane, ke ami angabwai, nakon ana mwane te Ekaretia. Te Uea e a kaman kaota nakon te Ekaretia tuan te anganano ao mwioko n tararua ibukin bwaai, ake kaaina (riki unimwaane ake taan kairiiri) ake a rin i nanon te berita ae tabu are riai n akea tokina. Ibukin kabwakaia aika a mwaiti ni kawakina te berita ae tabu aei, te Uea e anaia n te tai ae uarereke ao e anga n onea mwiina n tuan te kabwianibwai nakon te Ekaretia ae bwanin. Te Burabeti e titirakina te Uea bwa mwaitira aia bwai ae E kainanoia ibukin bwaai aika tabu. Te kaeka bon te kaotioti aei.
1–5, Aomata aika Itiaki a riai ni kabwaka rakan aia bwai ao ngkanne n anga, bwa te kabwianibwai, te katebwiina man aia raka n te ririki; 6–7, Te mwakuri anne e na katabua aban Tion.
1 E koaua, ae taku te Uea, I kainnanoa rakan aia bwai ni kabane ni katukaki i nanon bain te bitiobi n au ekaretia i Tion,
2 Ibukin katean au auti, ao ibukin katean aan Tion ao ibukin te nakoanibonga, ao ibukin aia taarau kaain te Beretitentii n au Ekaretia.
3 Ao aio e na riki bwa moan kabwianibwaia au aomata.
4 Ao i mwin anne, naake a na kabwianibwai a na kabwaka te katebwina ni mwakoro man aia kareke mwane ni kabane ni katoa ririki; ao aio e na riki bwa te tua ae teimatoa nakoia n aki toki, ibukin au nakoanibonga ae tabu, e taku te Uea.
5 E koaua, I tuangkami, e na koro bukina bwa ni kabane naake a ikotiia nakon aban Tion a na kabwaka aia kabwianibwai man rakan aia bwai, ao a na kawakina te tua aei, ke a na aki kuneaki n tau n tiku i buakomi.
6 Ao I tuangkami, ngkana au aomata a aki kawakina te tua aei, n tabuia, ao man te tua aei a na katabua aban Tion nakoiu, bwa au tua ao au motikitaeaka aonga ni kawakinaki i aona, bwa e aonga n rangi n tabu, nooria, e koaua ae I tuangkami, e na aki riki bwa aban Tion nakoimi.
7 Ao e na riki aei bwa te banna nakoia ni kabane titeikin Tion. Eng. Amen.