Tasal 15
K’utb’esinb’il na’leb’ k’eeb’il rik’in xtz’uumal re laj Jose Smith li Profeet re laj John Whitmer, sa’ Fayette, Nueva York, Junio 1829 (chi’ilmanq xtiklajik li tasal 14). K’a’jo’ naq li esil a’in naxk’ut chanru naq li junjunq wan chi k’oxlanb’il, rik’in naq li Qaawa’ na’aatinak chirix li k’a’ru nawb’il ka’ajwi’ xb’aan laj John Whitmer ut xb’aan li Qaawa’. Laj John Whitmer moqon kiwan choq’ jun reheb’ li Waqxaqib’ chi aj Yehol Nawom chirix lix Hu laj Mormon.
1–2, Lix tel li Qaawa’ wan sa’ xb’een chixjunil li ruchich’och’; 3–6, Li k’a’ru q’axal nim xloq’al, a’an xjultikankil li evangelio ut xkolb’aleb’ li aamej.
1 Chat-ab’inq, at inmoos John, ut ab’i li raatin li Jesukristo, laa Qaawa’ ut laj Tojol aawix.
2 Xb’aan naq k’e reetal, nakatwaatina rik’in kawil aatin ut rik’in wankilal, xb’aan naq lin tel wan sa’ xb’een chixjunil li ruchich’och’.
3 Ut tinye aawe li k’a’ru maajun winq nanawok re, ka’ajwi’ laa’in ut laa’at qajunes—
4 Xb’aan naq k’iila sut kawaj wik’in xnawb’al k’a’ru li q’axalaq nim xloq’al choq’ aawe.
5 K’e reetal, osob’tesinb’ilat xb’aan li na’leb’ a’in, ut xb’aan xyeeb’al li aatin li kink’e aawe jo’ chanruheb’ lin taqlahom.
6 Ut anajwan, k’e reetal, ninye aawe, naq li k’a’ru q’axalaq nim xloq’al choq’ aawe, a’anaq xch’olob’ankil li jalb’a-k’a’uxlej chiru li tenamit a’in, re tatruuq chixk’amb’aleb’ chaq li aamej wik’in, re tatruuq chi hilank rochb’eeneb’ sa’ li rawa’b’ejihom lin Yuwa’. Amen.