Mwakoro 16
Kaotioti ae kaotaki rinanon Iotebwa Timiti te Burabeti nakon Peter Whitmer te Ataei, i Fayette, New York, n Tuun 1829 (taraa te kabwarabwara n mwakoro 14). E riki Peter Whitmer te Ataei, i mwina bwa temanna mai buakoia Taan Kakoaua aika Waniman nakon Ana Boki Moomon.
1–2, Bain te Uea e kabutaa te aonaba ni kabane; 3–6, Tataekinan te euangkerio ao kamaiuaia aomata bon ngaia te bwai ae moan te kakawaki.
1 Ongora, au tia mwakuri ae Betero, ao kakauongo nakon ana taeka Iesu Kristo, am Uea ao am Tia Kaboko.
2 Bwa nooria, I taetae nakoim ma te kakang ao te mwaaka, bwa baiu e kabutaa te aonaba ni kabane.
3 Ao N na tuangko bwa akea te aomata ae e ataia bwa tii ngai ao ngkoe—
4 Bwa e mwaiti te tai ae ko bubutiai ni kan ataia bwa tera ae e rang moan te kakawaki nakoim.
5 Nooria, ko na kakabwaiaaki ibukin te bwai aio, ao ibukin tataekinan au taeka are I a tia n anganiko ni kaineti ma au tua.
6 Ao ngkai, nooria, I tuangko, bwa te bwai ae moan te kakawaki nakoim bon taekinan te rairannano nakoia aomata aikai, bwa ko aonga ni uotia aomata nakoiu, bwa ko aonga ni motirawa ma ngaiia n abanuean Tamau. Amen.