Seksyon 17
Revelasyon Joseph Smith, Pwofèt la te resevwa pou Oliver Cowdery, David Whitmer, ak Martin Harris nan Fayette, New York, Jen 1829, anvan yo te wè plak grave yo ki te genyen rejis Liv Mòmon an. Joseph ak grefye li a, Oliver Cowdery te aprann nan tradiksyon plak Liv Mòmon yo, twa temwen espesyal ta pral chwazi (gade nan Etè 5:2–4; 2 Nefi 11:3; 27:12). Oliver Cowdery, David Whitmer, ak Martin Harris te anime avèk yon dezi enspire pou yo vin tounen twa temwen espesyal yo. Pwofèt la te mande Senyè a, epi li te resevwa revelasyon sa a kòm repons atravè Ourim ak Toumim nan.
1–4, Avèk lafwa, twa temwen yo pral wè plak yo ak lòt materyèl sakre yo; 5–9, Kris la bay temwayaj konsènan divinite Liv Mòmon an.
1 Gade, m di nou, nou dwe konfie nou nan pawòl mwen, si nou fè sa avèk yon kè ki sensè, nou va wè plak yo, ak kiras la, ak epe Laban an, ak Ourim ak Toumim nan, frè Jarèd la te resevwa yo sou mòn nan lè l te pale avèk Senyè a fasafas la, ak bouldirektè yo ki kapab fè mirak Leyi te resevwa pandan li te nan dezè a, bò Lanmè Wouj la.
2 Epi se avèk lafwa nou, nou pral wè yo, avèk menm lafwa sa a ansyen pwofèt yo te genyen an.
3 Epi apre nou fin gen lafwa, epi nou fin wè yo avèk je nou, bay temwaye konsènan yo, avèk pouvwa Bondye;
4 Epi n ap dwe fè sa pou sèvitè m nan, Joseph Smith, pitit la, pa detwi, pou m kapab reyalize objektif ki jis mwen yo pou pitit lèzòm yo nan travay sa a.
5 Epi nou pral temwaye pou fè konnen nou te wè yo, menm jan sèvitè m nan, Joseph Smith, pitit la, te wè yo a; paske se avèk pouvwa m li te wè yo, epi se paske li te gen lafwa.
6 Epi li te tradui liv la, pati sa a menm m te kòmande l la, epi menm jan Senyè Bondye nou an vivan, bagay sa a se verite.
7 Se poutèt sa, nou te resevwa menm pouvwa a, menm lafwa, ak menm don an tankou l;
8 Epi si nou respekte dènye kòmandman m sa yo, sila m te ba nou yo, pòt lanfè yo p ap gen pouvwa sou nou; paske lagras mwen an ase pou nou epi m ap leve nou anlè nan dènye jou a.
9 Epi mwen menm, Jezikri, Senyè nou an ak Bondye nou an te pale avèk nou, pou m kapab reyalize objektif ki jis mwen yo pou pitit lèzòm yo. Amèn.