Seksyon 21
Revelasyon Joseph Smith, Pwofèt la te resevwa, nan Fayette, New York, 6 Avril 1830. Li te resevwa revelasyon sa a nan moman òganizasyon Legliz la, nan menm dat la, lakay Peter Whitmer, papa a. Sis gason, ki te deja batize, te patisipe. Avèk yon vòt jeneral, moun sa yo te eksprime volonte yo ak detèminasyon yo pou yo òganize yo, daprè kòmandman Bondye yo (gade nan seksyon 20). Konsa tou yo te vote pou yo aksepte epi pou yo soutni Joseph Smith, pitit la ak Oliver Cowdery kòm ofisye pou prezide sou Legliz la. Apre sa, Joseph te fè enpozisyon men, pou l te òdone Oliver kòm yon ansyen nan Legliz la, epi Oliver te òdone Joseph menm jan an tou. Apre administrasyon sentsèn nan, Joseph ak Oliver te enpoze men sou chak patisipan pou ba yo Sentespri a epi pou konfimasyon yo chak kòm manm Legliz la.
1–3, Joseph Smith te resevwa apèl kòm vwayan, tradiktè, pwofèt, apot, ak ansyen; 4–8, Pawòl li gide kòz Siyon an; 9–12, Sen yo pral kwè nan pawòl li yo lè l pale pa lantremiz Konsolatè a.
1 Gade, yo dwe kenbe yon rejis pami nou epi ladan l, yo dwe rele w vwayan, tradiktè, pwofèt, apot Jezikri, ansyen nan legliz la daprè volonte Papa Bondye, ak lagras Senyè w la, Jezikri.
2 Paske Sentespri a te enspire l pou l tabli fondasyon legliz la, epi pou l bati l sou lafwa ki pi sen an.
3 Legliz sa a ki te òganize epi ki te tabli nan lane Senyè w la, mil uisantrant, nan katriyèm mwa, epi nan sizyèm jou mwa ki rele Avril la.
4 Se poutèt sa, ki vle di legliz la, ou dwe koute tout pawòl ak kòmandman li ba ou, lè l resevwa yo, lè l mache nan tout sentete devan m;
5 Paske, nou pral resevwa pawòl li, tankou l te soti nan pwòp bouch pa m, nan tout pasyans ak lafwa.
6 Paske, lè nou fè sa, pòt lanfè yo p ap gen viktwa sou nou; wi, epi Senyè Bondye a ap dispèse pouvwa tenèb yo devan nou, epi l ap fè syèl yo souke pou byen nou, ak pou laglwa non li.
7 Paske Senyè Bondye a di konsa: Se limenm m te enspire pou aktive kòz Siyon an avèk gwo pouvwa pou sa ki byen, epi m konnen dilijans li, epi m te koute priyè l yo.
8 Wi, m te wè dlo nan je l pou Siyon, epi m p ap kite l kriye pou li ankò; paske jou rejwisans li yo rive poutèt padon peche li yo, ak manifestasyon benediksyon m yo sou travay li yo.
9 Paske, gade, m ap beni tout sila yo ki travay nan jaden m nan avèk yon gwo benediksyon, epi y ap kwè nan pawòl mwen yo, pawòl sa a yo li te resevwa yo nan menm konsolatè a, ki pa mwayen te manifeste pou fè konnen Jezi te krisifye anba men moun ki te plen pechè mond lan pou padon peche moun ki gen kè kontri.
10 Se poutèt sa, m te jije l nesesè pou l ta òdone anba men ou, Oliver Cowdery, apot mwen an;
11 Sa se yon òdonans pou ou, ki fè konnen ou se yon ansyen anba men l, li se premye pou ou, pou ou kapab yon ansyen pou legliz Kris sa a, ki pote non m—
12 Epi premye predikatè legliz sa a, pou legliz lan, epi devan mond lan, wi, devan Janti yo; wi, epi se sa Senyè Bondye a te di, malè, malè pou Juif yo tou! Amèn.