Mwakoro 26
Kaotioti ae kaotaki nakon Iotebwa Timiti te Burabeti, Oliver Cowdery, ao John Whitmer, i Harmony, Pennsylvania, n Turai 1830 (taraa te kabwarabwaraan mwakoro 24).
1, A reireinaki ni kamatebwaii taian koroboki aika tabu ao n tataekin; 2, E kamatoaki tuan te boutoka ae tabangaki.
1 Nooria, I tuangkami bwa kam na riai ni kabanei ami tai ni kamatebwaii koroboki aika tabu, ao n tataekin, ao ni kamatoaia nakon te ekaretia i Colesville, ao ni karaoi mwakuri n te aba, n aron ae e kainnanoaki, ni karokoa mwiin nakom nako maeao ni karaoa te maungatabu are i mwina; ao ngkanne e na kaotaki nakoim bwa tera ae ko na riai ni karaoia.
2 Ao ni kabane bwaai a na karaoaki man te boutoka ae tabangaki n te ekaretia, man te tataro ae korakora ao te onimaki, bwa ko na karekei bwaai ni kabane man te onimaki. Amen.