Mwakoro 32
Kaotioti ae kaotaki rinanon Iotebwa Timiti te Burabeti nakon Parley P. Pratt ao Ziba Peterson, i Manchester ni moan Okitobwa 1830. E korakora te nano ao te kukurei ae e namakinaki irouia unimwaane ibukia Reimwanaite, ibukin te kakabwaia are e a kaman taekinaki are e a reiakinna te Ekaretia man Ana Boki Moomon. Ibukin aei, e karaoaki te bubuti bwa te Uea e na kaota Ana kantaninga ni kaineti ma kanakoaia unimwaane nakon taian baronga n Inria i Maeao ke a na aki. E rimwiiaki n te kaotioti.
1–3, A weteaki Parley P. Pratt ao Ziba Peterson bwa a na tataekinna nakoia Reimwanaite ao n raona Oliver Cowdery ao Peter Whitmer te Ataei; 4–5, A riai n tataro ibukin kaotaia ni koroboki aika tabu.
1 Ao ngkai ni kaineti ma au tia mwakuri ae Parley P. Pratt, nooria, I taku nakoina bwa ngkai I maiu I tangiria bwa e na taekina au euangkerio ao n reirei mai irou, ao ni bwaina te nimamannei ao te nanorinano i nanona.
2 Ao bwa I a tia n rineia bwa e na nako ma au tia mwakuri ae Oliver Cowdery ao Peter Whitmer, te Teei, i buakoia Reimwanaite i nanon te rereua.
3 Ao e na nako naba ma ngaiia Ziba Peterson; ao Ngai N na nako ma ngaia ao ni mena i buakoia; ao Ngai te tia tei ibukiia iroun te Tama; ao akea te bwai ae e na tokanikai ni kaaitaraia.
4 Ao a na ongo nakon are e koreaki, ao n aki manga bakaea karekean kaotioti tabeua; a na tataro n taai nako bwa I aonga ni kabwaranakoi bwaai aikai ni kaotaia.
5 Ao a na ongo nakon taeka aikai ao tai bakanreirei, ao N na kakabwaiaia. Amen.