Mwakoro 37
Kaotioti ae kaotaki nakon Iotebwa Timiti te Burabeti ao Sidney Rigdon, i rarikin Fayette, New York, n Ritembwa 1830. Ikai are e anganaki te moan tua ni kaineti ma te ikoikotaki n te mwioko n tararua aei.
1–4, A weteaki Aomata aika Itiaki bwa a na ikotaki i Ohio.
1 Nooria, I tuangkami bwa e aki riai irou bwa kam na manga rairairi ni karokoa kam nako Ohio, ao aio ibukin ami kairiribai ao bon ibukin kabwaiami.
2 Ao I a manga tuangkami bwa kam na aki nako ni karokoa kam tia n tataekina au euangkerio n taabo akanne, ao ni kakorakora te ekaretia n taabo are e kuneaki iai, ao moarara riki i Colesville; bwa, nooria, a tataro nakoiu ma te onimaki ae korakora.
3 Ao teuana riki, te tua are I anga nakon te ekaretia, bwa e riai irou bwa a riai n ikotaki i Ohio, ni katauraoi ibukin te tai are e na oki iai nakoia au tia mwakuri ae Oliver Cowdery.
4 Nooria, aio te wanawana, ao a na rineia aomata i bon ibukiia ni karokoa I roko. Eng. Amen.