Mwakoro 4
Kaotioti nakon Iotebwa Timiti te Ikawai, ae kaotaki rinanon natina ae Iotebwa Timiti te Burabeti, i Harmony, Pennsylvania, ni Beberuare 1829.
1–4, Te ninikoria ni beku e kamaiuiia ana minita te Uea; 5–6, Anua n ai aron te Atua e bon katauraoiia ibukin nakoaia ni minita; 7, Ana bwai nako te Atua a riai n ukoukoraki.
1 Ngkai nooria, e a kan roko te mwakuri ae kamiimi i buakoia natiia aomata.
2 Mangaia, O ngkami ake kam rin i nanon te beku ibukin te Atua, taraia bwa kam beku irouna ma nanomi, marurungimi, ami iango ao korakorami ni kabane, bwa kam aonga n tei ao n akea kabuakakakimi imatan te Atua n te kabanea ni bong.
3 Mangaia, ngkana iai nanomi ni kan beku iroun te Atua kam a weteaki nakon te mwakuri;
4 Bwa nooria e a mainaina n tawa ngkai te nne n aroka nakon te taiaki; ao nooria, ane e karina ana biti ni koro wiita ma korakorana, ao teuanne e kaikoi bwa e aonga n aki mate, ma ni karekea te kamaiuaki nakon tamneina;
5 Ao te onimaki, te kantaninga, te tangira ae kororaoi ao te tangira, ma ni mata teuana nakon mimitongin te Atua, e katauraoia bwa e na kona ni karaoa te mwakuri.
6 Uringa te onimaki, te raoiroi, te atatai, te taubaang, te taotaonakin nano, te akoi imarenami, te aro n Atua, te tangira ae kororaoi, te karinanoia, te nanomatoa.
7 Bubuti, ao kam na anganaki; karebwerebwe, ao e na kaukaki nakoimi. Amen.