Mwakoro 62
Kaotioti ae kaotaki rinanon Iotebwa Timiti te Burabeti, i etan te Karaanga are Missouri i Chariton, Missouri, n Aokati 13, 1831. N te bong aei, te Burabeti ma ana koraki, ake i aon kawaia mai Independence nako Kirtland, a kaitibo ma unimwaane ake i aon kawaia nakon aban Tion, ao, i mwin te kaitibo ma te kimwareirei, e karekea te kaotioti aei.
1–3, A tauaki mwiin taian koaua i karawa; 4–9, A riai unimwaane ni mwananga ao n tataekin ni kaineti ma aia baire ao n aron ana kairiiri te Tamnei.
1 Nooria, ao ongora, O ngkami unimwaanen au ekaretia, e taku te Uea ae Atuami, ae Iesu Kristo, te tia tei ibukimi, are e atai mamaran te aomata ao bwa e na kanga ni buokiia naake a kariiriaki.
2 Ao e koaua e mena matau i aoia naake a tuai mwananga nakon aban Tion; mangaia are e tuai tia ami mition.
3 E ngae n anne, kam a kakabwaiaki, bwa ami koaua are kam kaotia e tauaki mwiina i karawa ibukiia anera bwa a na nooria; ao a kimwareirei iroumi, ao a kabwaraaki ami bure.
4 Ao ngkai reitaa nako mwanangami. Bootingkami i aon aban Tion; ao tewea te botaki ao kimwareirei ni kabane, ao karaoa te toa nakon are Moan te Rietata.
5 Ao i mwina kam kona n oki ni kaota koauana, eng, ni kabane, ke ni kakauoman, n aron nooran raoiroina iroumi, e aki akaaka irou; ma tii kakaonimaki, ao n taekina te rongorongo ae kakukurei nakoia kaain te aonaba, ke i buakon aia botaki naake a buakaka.
6 Nooria, Ngai, te Uea, I tia ni ikoti ni kabane bwa e aonga ni koro bukin te berita, bwa naake a kakaonimaki i buakomi a na kaawakinaki ao ni kimwareirei ni kabane n te aba ae Missouri. Ngai, te Uea, I berita nakoia naake a kakaonimaki ao I aki kona ni kewe.
7 Ngai, te Uea, I rangi n tauraoi, ngkana iai i buakomi ae tangiria n toka i aon te aoti, ke i aon te miure, ke te kaa are e katikaki irouia aoti, e na karekea te kakabwaia aei, ngkana e karekea mani bain te Uea, ma te karabwarabwa i nanoia ni bwaai ni kabane.
8 Bwaai aikai bon oin tabemi ni karaoi ni kaineti nakon ami baire ao ana kairiiri te Tamnei.
9 Nooria, ami bwai te abanuea. Ao nooria, ao taraia, I mena irouia taan kakaonimaki n taai nako. Eng. Amen.