Mwakoro 65
Kaotioti i aon te tataro ae kaotaki rinanon Iotebwa Timiti te Burabeti, i Hiram, Ohio, n Okitobwa 30, 1831.
1–2, A anganaki kiingin uean te Atua aomata n te aonaba, ao e na tokanikai te euangkerio; 3–6, Abanuean karawa n tain te tenga n ririki e na roko ao e na ikotaki ma uean te Atua n te aonaba.
1 Ongora, ao taraia, te bwanaa are e ruo mai eta, are e korakora ao ni mwaaka, are e waaki nako tabotabon aonaba, eng, are bwanaana nakoia aomata—Katauraoa kawain te Uea, ao kaeta kawaina.
2 A anganaki kiingin uean te Atua aomata n te aonaba, ao mai ikanne e na rabino nako te euangkerio nako tabotabon te aonaba, n aron te atibu are e koreaki man te maunga n akea baai e na rabino nako, ni karokoa e kaonrakea te aonaba ae bwanin.
3 Eng, e takarua te bwanaa—Katauraoa kawain te Uea, katauraoa ana amwarake te Tibu te Teei, katauraoi ibukin te Tia Iein.
4 Tataro nakon te Uea, wetea arana ae tabu, kaoti ana mwakuri aika raraoi i buakoia aomata.
5 Wetea te Uea, bwa e aonga abanueana ni waaki nako i aon te aonaba, bwa aonga kaaina ni karekea, ao n tauraoi ibukin boong aika a na roko, are e na roko iai Natin te Aomata mai karawa, ni kunikaiaki n ootan mimitongina, ni kaitibo ma uean te Atua are e kateaki n te aonaba.
6 Mangaia are, e na waaki nako uean te Atua, bwa e aonga n roko abanuean karawa, bwa ngkoe, O te Atua, ko na kamimitongiaki i karawa ao n te aonaba, bwa aonga am kairiribai ni konaaki; bwa am bwai te karineaki, te mwaaka ao te mimitong, n aki tootoki. Amen.