Mwakoro 70
Kaotioti ae kaotaki rinanon Iotebwa Timiti te Burabeti, i Hiram, Ohio, n Nobembwa 12, 1831. E taekinaki n rongorongon te Burabeti bwa aua maungatabu aika onoti aika a karaoaki i marenan 1 nakon 12 n Nobembwa, ao n taai akanne. N te kabanea ni maungatabu mai buakon aikai, e rinanoaki korakoran kakawakin kaotioti ake a na boretiaki i mwina bwa te Book of Commandments (Boki n Tua) ao i mwina e a rinanoaki bwa Reirei ao Berita aika Tabu. Te kaotioti aei e kaotaki i mwin are e rineia te maungatabu bwa kaotioti aikai a bon “kakawaki nakon te Ekaretia n aron kaubwain te aonaba ae bwanin.” E taekinaki n rongorongon Iotebwa Timiti bwa “aan te Ekaretia ni boong aika kaitira aikai, ao te kabwaia nakon te aonaba, are kaotia bwa kiingin bwaai aika raba n uean ara Tia Kamaiu a manga onimakinaki iai aomata.”
1–5, A rineaki taan tararua bwa a na boretii taian kaotioti; 6–13, Naake a mwakuri ma bwain te tamnei a bon tau ni karekea booia; 14–18, Aomata aika Itiaki a riai ni booraoi ni bwain te maiu n rabwata.
1 Noria, ao ongora, O ngkami kaain Tion, ao ni kabane ngkami aomata ake kaain au ekaretia ake kam raroa nako, ao kakauongo n ana taeka te Uea are I angan au tia mwakuri ae Iotebwa Timiti te Ataei, ao nakon naba au tia mwakuri ae Martin Harris, ao nakon naba au tia mwakuri ae Oliver Cowdery, ao nakon naba au tia mwakuri ae John Whitmer, ao nakon naba au tia mwakuri ae Sidney Rigdon, ao nakon naba au tia mwakuri ae William W. Phelps, bwa te tua nakoia.
2 Bwa I angania te tua; mangaia are ongora ao kakauongo, bwa e taku te Uea nakoia—
3 Ngai, te Uea, I a tia n rineia, ao ni katabuia bwa taan tararua i aon tenaan kaotioti ao tuua ake I a tia n angania, ao ake N na angania rimwi;
4 Ao rongorongon te mwakuri n tararua aei I kainanoia mai irouia ni bongin te motikitaeka.
5 Mangaia are, I a tia n rineia, ao aio tabeia n ana ekaretia te Atua, bwa a na baireia ao bwai aika irekereke ma ngaia, eng, bwai aika reke mai iai.
6 Mangaia are, te tua are I anganiia, bwa a na aki anga bwaai aikai nakon te ekaretia, ke nakon te aonaba;
7 E ngae n anne, ngkana a teimatoa ni karekea ae raka riki nakon are a kainnanoia ibukin bwaai aika a kainanoi ao ake akea irouia, e na nakon au bata ni kaikobwai;
8 Ao bwaai aika reke a na katabuaki nakoia kaain Tion, ao nakoia aia kariki, ngkana a teimatoa n riki bwa aan bwaibwai ni kaineti ma tuan te abanuea.
9 Nooria, aio te bwai ae e kainnanoia te Uea mai irouia aomata nako n nakoaia n tararua, n aron ae Ngai, te Uea, I a tia n rineia ke N na rineia rimwi nakoia aomata nako.
10 Ao nooria, akea ae inaomata man te tua aei ake kaain ana ekaretia te Atua ae maiu;
11 Eng, tiaki te bitiobi, ke te tia tei are e kawakina ana bata ni kaikobwai te Uea, ke teuare e rineaki nakon te nakoa n tararua i aon bwain te maiu n rabwata.
12 Ane e rineaki bwa e na bairei bwaai n te maiu n tamnei, e bon tau ni karekea boona, n ai aroia naake a rineaki naba nakon te nakoa n tararua bwa a na bairei bwaai n te maiu n rabwata;
13 Eng, ae mwaiti riki, are te mwaiti ae kamwaitaki nakoia rinanon ana kaotioti te Tamnei.
14 E ngae n anne, n ami bwai n te maiu n rabwata kam na booraoi, ao aio tiaki n te ngurengure, bwa mwiina e na tauaki mwaitin ana kaotioti te Tamnei.
15 Ngkai, te tua aei I anganiia au taan mwakuri ibukin kabwaiaia ngkai a maiu, ibukin kaotan au kakabwaia i aon atuia, ao ibukin kanuangaia n aia nanomatoa ao ibukin kamanoaia.
16 Ibukin te amwarake ao ibukin te kunnikai; ibukin te bwaibwai; ibukin aia auti ao ibukin abaia, bwa tera nako aron maiuia are Ngai, te Uea, N na katikuia iai, ao n taabo nako are Ngai, te Uea, N na kanakoia nako iai.
17 Bwa a tia n kakaonimaki i aon bwaai aika mwaiti, ao n tia ni karaoa ae raoiroi ngkana a teimatoa n aki bure.
18 Nooria, Ngai, te Uea, I nanoanga ao N na kakabwaiaia, ao a na rin i nanon kimwareirein bwaai aikai. Eng. Amen.