Mwakoro 85
Kaotioti ae kaotaki rinanon Iotebwa Timiti te Burabeti, i Kirtland, Ohio, n Nobembwa 27, 1832. Te mwakoro aei e anaaki man ana reta te Burabeti nakon William W. Phelps, are e maeka i Independence, Missouri. E kaekai titiraki ibukiia Aomata aika Itiaki ake a tia ni mwaing nako Tion ma a aki ira nanon tuan katabuan aia bwai ao ibukin aei a tuai karekea abaia ni bwaibwai ni kaineti ma te babaire are e a tia ni karaoaki n te Ekaretia.
1–5, Te bwaibwai i Tion a riai ni karekeaki rinanon katabuan bwaai; 6–12, Temanna ae korakora ae aintoa ae na anganiia Aomata aika Itiaki aia bwaibwai i Tion.
1 Bon taben ana kiraka te Uea, are e a tia n rineia, bwa e na kawakina te rongorongo, ao n tau mwiin rongorongon te ekaretia ni kabuta ibukin bwaai ni kabane ake a riki i Tion, ao ni kabane naake a katabui aia bwai, ao ni karekea aia bwaibwai ni kaineti ma ana tua te Uea mai iroun te Bitiobi;
2 Ao aron naba maiuia, aia onimaki, ao mwakuri; ao taan kiitana te koaua ake a kiitana te koaua i mwin karekean aia bwaibwai.
3 E bon kaitaraa ana kantaninga ao ana tua te Atua bwa naake a aki karekea aia bwaibwai man bwaai ake a katabuaki, ni kaineti ma ana tua, ake e a tia n anga, bwa e aonga n anga tuan te kabwianibwai nakoia ana aomata, ni katauraoia ibukin bongin te kabomwi ao te kabuekaki, a na koreaki araia ma ana aomata te Atua.
4 Ao aia kateiriki e na aki kawakinaki, ke ni mena n te tabo ae e na kona ni kuneaki n taian rongorongo nako ke rongorongon te ekaretia.
5 E na aki kuneaki araia, ao araia aia bakatibu naba, ke araia natiia ni koreaki ni bokin ana tua te Atua, e taku aia Uea Taanga ni Buaka.
6 Eng, e taku te bwana ae maraara n rau, are e wiirikiriki rinanon ao n ninianako bwaai ni kabane, ao n taai nako e karika riiu bwa a na ruru ngkana e kaotia, ni kangai:
7 Ao e na koro bukina bwa Ngai, te Uea ae te Atua, N na kanakoa temanna ae korakora ae aintoa, are e taua kainuean te mwaaka ni baina, ae kunnikainna n te oota ibukin rabunana, are wiina e na taekin taeka, taeka aika akea tokiia; ao nanona e na riki bwa te koburake n ran n te koaua, bwa e na bairea ana auti te Atua, ao ni bairei mwakorokoro n aba bwa abaia ni bwaibwai aomata aika itiaki are a kuneaki araia, ao araia aia bakatibu, ao natiia, are a koreaki ni bokin ana tua te Atua;
8 Ma te aomata anne, are e weteaki iroun te Atua ao n rineaki, are e arora baina ni kaeta ana ati te Atua, e na bwaka man ana kai ni kamate, n ai aron te aroka are e bwakaraki n te iti ae e rangi n oota mwaaka.
9 Ao ni kabane naake aki kuneaki ni koreaki n te boki n kaururing a na aki kunea aia bwaibwai n te bong anne, ma a na kamaenakoaki, ao tibwaia a na anganaki ibuokoia taan aki kakoauaa, ike a tatakarua ao a kangengei wiia.
10 Bwaai aikai ake I taekin tiaki mai irou; ngaia are, ngkai e taetae te Uea, e na bon kakoroi bukiia naba.
11 Ao naake man te Nakoanibonga ae Rietata, are araia e aki kuneaki ni koreaki ni bokin te tua, ke ake a kuneaki n tia ni kiitana te koaua, ke n tia ni kabaneaki man te ekaretia, ni ikotaki naba ma te nakoanibonga are rinano, ke kaain te Ekaretia, n te bong anne a na aki kunea aia bwaibwai i buakoia ana aomata Are Moan te Rietata aika itiaki;
12 Ngaia are, e na karaoaki nakoia n aron are e karaoaki nakoia natiia ibonga, n aron are e kuneaki ni koreaki n te kauoua ni mwakoro ao te kaonobwi ma teuana ao uoua ni kibu n Etira.