Vahe 85
Ko e fakahā naʻe fai mai ʻia Siosefa Sāmita ko e Palōfitá, ʻi Ketilani, ʻi ʻOhaiō, ʻi he ʻaho 27 Nōvema, 1832. Ko e vahe ko ʻení ko e konga ia ʻo ha tohi naʻe fai ʻe he Palōfitá kia Uiliami W. Felipisi, ʻa ia naʻá ne lolotonga nofo ʻi Tauʻatāina, ʻi Mīsuli. Naʻe fai mai ia ko e tali ki ha ngaahi fehuʻi fekauʻaki mo e Kāingalotu naʻa nau hiki mai ki Saione ka naʻe ʻikai ke nau muimui ʻi he fekau ke fakatapui honau kelekelé pea kuo teʻeki ke nau maʻu honau tofiʻá ʻo fakatatau ki he founga kuo ʻosi fokotuʻu ʻi he Siasí.
1–5, Kuo pau ke maʻu ʻa e ngaahi tofiʻa ʻi Saioné ʻi he fakatapui; 6–12, ʻOku ʻi ai ha tokotaha māfimafi mo mālohi ke ne foaki ki he Kāingalotú ʻa honau tofiʻa ʻi Saioné.
1 Ko e fatongia ʻo e kalake ʻa e ʻEikí, ʻa ia kuó ne filí, ke ne tauhi ha hisitōlia, mo ha lekooti fakakātoa ʻo e siasí ki he ngaahi meʻa kotoa pē ʻoku hoko ʻi Saioné, pea mo kinautolu kotoa pē ʻoku nau fakatapui ha ngaahi koloa, mo maʻu ha ngaahi tofiʻa fakalao mei he pīsopé.
2 Kae ʻumaʻā foki mo e anga ʻo ʻenau moʻuí, mo ʻenau tuí mo e ngaahi ngāué; kae ʻumaʻā foki mo e kau tafoki ʻa ia ʻoku tafoki hili ʻenau maʻu hanau ngaahi tofiʻá.
3 ʻOku taʻehoa mo e finangalo mo e fekau ʻa e ʻOtuá ke tohi fakataha mo e kakai ʻo e ʻOtuá ʻa e ngaahi hingoa ʻo kinautolu ʻoku ʻikai te nau maʻu hanau tofiʻá ʻi he fakatapuí, ʻo fakatatau ki heʻene fonó, ʻa ia kuó ne foaki maí, koeʻuhí ke ne fakavahehongofuluʻí ʻa hono kakaí, ke teuteuʻi ʻa kinautolu ki he ʻaho ʻo e tauteá mo e tutú.
4 Pea ʻe ʻikai foki tauhi honau tohi hohokó, pe maʻu ia ʻi ha feituʻu ʻe lava ke ʻilo ai ia ʻi ha taha ʻo e ngaahi lekooti pe hisitōlia ʻo e siasí.
5 ʻE ʻikai ke maʻu ʻa honau ngaahi hingoá, pe ko e ngaahi hingoa ʻo e ngaahi tamaí, pe ko e ngaahi hingoa ʻo e fānaú kuo tohi ʻi he tohi ʻo e fono ʻa e ʻOtuá, ʻoku folofola ʻe he ʻEiki ʻo e Ngaahi Kau Taú.
6 ʻIo, ʻoku folofola pehē ʻe he kihiʻi leʻo siʻí, ʻa ia ʻoku fanafana ʻo ongoʻi pea mahuhuhuhu ʻi he ngaahi meʻa kotoa pē, pea ʻoku faʻa ngaohi ʻe ia ke tetetete ʻa hoku ngaahi huí lolotonga ʻene fakahā maí, ʻo pehē:
7 Pea ʻe hoko ʻo pehē ko au, ko e ʻEiki ko e ʻOtuá, te u fekauʻi atu ha taha ʻoku māfimafi mo mālohi, ʻoku ʻi hono nimá ʻa e tokotoko ʻo e mafaí, kuo fakakofuʻi ʻaki ʻa e maama ke ʻufiʻufi ia, ʻa ia ʻe lea ʻaki ʻe hono ngutú ʻa e ngaahi lea, ʻa e ngaahi lea taʻengata; pea ko hono lotó ko e matavai ʻo e moʻoni, ke fakamaau ʻa e fale ʻo e ʻOtuá, pea ke fakamāʻopoʻopo ʻo vahe ʻi he talotalo ʻa e ngaahi tofiʻa ʻo e kau māʻoniʻoni ʻa ia ʻoku ʻiloa honau ngaahi hingoá, pea mo e ngaahi hingoa ʻo ʻenau ngaahi tamaí, pea mo ʻenau fānaú, kuo tohi ia ʻi he tohi ʻo e fono ʻa e ʻOtuá;
8 Neongo ko e tangata ko iá, naʻe ui ʻe he ʻOtuá mo fili, pea mafao atu hono nimá ke taʻofi ʻa e ngaueue ʻa e puha tapu ʻo e ʻOtuá, ʻe tō ia ʻi he ngahau ʻo e maté, ʻo hangē ko e ʻakau ʻoku teʻia ʻaki ʻa e tapa mālohi ʻa e ʻuhilá.
9 Pea ko kinautolu kotoa pē ʻoku ʻikai ʻiloa kuo tohi ʻa kinautolu ʻi he tohi ʻo e manatú ʻe ʻikai te nau maʻu ha tofiʻa ʻi he ʻaho ko iá, ka ʻe motuhi atu ʻa kinautolu, pea ʻe vaheʻi honau ʻinasi kiate kinautolu ʻi he lotolotonga ʻo e kau taʻetuí, ʻa ia ʻoku ʻi ai ʻa e tangilāulau mo e fengaiʻitaki ʻo e nifo.
10 ʻOku ʻikai te u leaʻaki ʻa e ngaahi meʻá ni ʻiate au pē; ko ia, ʻo hangē ko e folofola ʻa e ʻEikí, ʻe pehē pē foki ʻa ʻene fakahokó.
11 Pea ko kinautolu ʻoku kau ki he Lakanga Fakataulaʻeiki Māʻolungá, ʻa ia ʻoku ʻikai ʻiloa kuo tohi honau ngaahi hingoá ʻi he tohi ʻo e fonó, pe kuo ʻilo kuo nau tafoki, pe kuo motuhi atu mei he siasí, kae ʻumaʻā foki ʻa e lakanga fakataulaʻeiki siʻí, pe ko e kāingalotú, ʻe ʻikai te nau maʻu ha tofiʻa ʻi he ʻaho ko iá ʻi he lotolotonga ʻo e kau māʻoniʻoni ʻa e Fungani Māʻolungá;
12 Ko ia, ʻe fai kiate kinautolu ʻo hangē ko ia naʻe fai ki he fānau ʻa e taulaʻeikí, ʻo hangē ko ia ʻoku hā kuo tohi ʻi he vahe hono ua mo e veesi hono onongofulu mā taha mo e onongofulu mā ua ʻo e Tohi ʻa ʻĒselá.