Mwakoro 87
Kaotioti ao taeka ni burabeti ibukin te buaka, a kaotaki rinanon Iotebwa Timiti te Burabeti, i Kirtland, Ohio, ke i rarikina, n Ritembwa 25, 1832. N te tai aei kauntaeka n te United States i aon te tautoronaki ao kaakean rikoan ao kabwaka roo n te aba ae South Carolina a bon tanoata. E taekinaki n rongorongon Iotebwa Timiti bwa “kaotin kaangaanga i marenaia aba” a moanna n “otara riki” iroun te Burabeti “nakon are mai i mwaaina ma ngke e moana mwanangana te Ekaretia n otinako man te rereua.”
1–4, E a kaman taekinaki te buaka imarenan Mwakoro n Aba ake i Meang ao Mwakoro n Aba ake i Maiaki; 5–8, E korakora te kangaanga ae e na bwaka i aoia kaain te aonaba ni kabane.
1 E koaua, e taku te Uea ni kaineti ma te buaka are e nang koro bukina, ni moanaki man aia kakaitara kaain South Carolina, are e na karika te mate ao te nanokawaki irouia aomata aika a mwaiti;
2 Ao e na roko te tai are e na bwaro te buaka nako aon aaba ni kabane, ni moanaki man te tabo aei.
3 Bwa nooria, e na bwenauaaki Mwakoro n Aba ake i Maiaki ma Mwakoro n Aba ake i Meang ni kaitaraia, ao Mwakoro n Aba ake i Maiaki a na wetei aaba tabeua, are te aba ae ataaki bwa Great Buritan, ao a na wetei naba aaba tabeua, bwa aonga ni kamaiuiia ni kaitaraia aaba tabeua; ao ngkanne e na bwaro te buaka nako aon aaba ni kabane.
4 Ao e na koro bukina, i mwin boong aika a mwaiti, a na teiraki tooro ni kaitaraia aia toka, ake a baireaki ao man kataneiaaki ibukin te buaka.
5 Ao e na koro bukina naba bwa nikiraia ake a tiku n te aba a na baireia i bon irouia, ao e na korakora uniia, ao a na karawawataia Tientaire ma te karawawata ae korakora.
6 Ao, ma te kabaang ao man waanakon te rara a na tang n nanokawaki kaain te aonaba; ao ma te rongo, ao kabuanibwai, ao mwaeiei, ao te baa i karawa, ao te iti naba ae korakora ae oota mwaaka, kaain te aonaba a na namakina unin, ao aki kukureina, ao bain te Atua ae Moan te Mwaaka ni katuaa, ni karokoa te urubwai are e baireaki e na kamaunai aaba ni kabane;
7 Bwa tangiia aomata aika itiaki, ao raraaia aomata aika itiaki, e na toki ni waerake nakon taningan te Uea ae Tabaota, man te aonaba, bwa a na kataeaki kaia irouia aia kairiribai.
8 Mangaia are, teei n taabo aika tabu, ao n aki mwaing, ni karokoa bongin rokon te Uea; bwa nooria, e tawe rokona, e taku te Uea. Amen.