Mwakoro 99
Kaotioti ae kaotaki rinanon Iotebwa Timiti te Burabeti nakon John Murdock, n Aokati 29, 1832, i Hiram, Ohio. E riaon teuana te ririki are e tataekina iai te euangkerio John Murdock ao natina—akea tinaia i mwin maten buuna, ae Julia Clapp, n Eberi 1831—a maeka ma utu tabeua i Ohio.
1–8, E weteaki John Murdock bwa e na katanoata te euangkerio, ao naake a butimwaia a butimwaea te Uea ao a na karekea te nanoanga.
1 Nooria, e taku te Uea nakon au tia mwakuri ae John Murdock—ko weteaki bwa ko na nako nakon aaba ake i mainiku man te auti teuana nakon te auti teuana, man te kaawa teuana nakon te kaawa teuana, ao man te kaawa ae bubura teuana nakon te kaawa ae bubura teuana, ni katanoata au euangkerio ae akea tokina nakoia kaaina, i buakon te bwainikirinaki ao te buakaka.
2 Ao ane e butimwaiko e butimwaeai; ao e na iai te mwaaka iroum n taekin au taeka ma ni kaotiotan Tamneiu ae Tabu.
3 Ao ane e butimwaiko n aron te ataei ae uarereke, e butimwaea abanueau; ao a kakabwaiaaki, bwa a na karekea te nanoanga.
4 Ao ane e aki butimwaiko e na aki butimwaeaki iroun Tamau ao kaain ana auti; ao ko na kaitiaka waem n taabo aika raba i nanon kawaim bwa te kakoaua ni kaaitaraia.
5 Ao nooria, ao taraia, e tawe rokou ni motikitaeka, ni kamatoai ni kabane aia mwakuri aika buakaka ake a tia ni karaoia ni kaaitaraai, n aron ae e koreaki ibukiu n te boki i buakon taian boki.
6 Ao ngkai, e koaua ae I tuangko, bwa e aki riai bwa ko na nako ni karokoa e katauraoaki bwaai ni kabane ibukiia natim, ao ni kanakoia ma te akoi nakon te bitiobi i Tion.
7 Ao i mwin tabeua te ririki, ngkana ko tangiria mai irou, ko kona n nako naba nakon te aba ae raoiroi, ni karekea are ko na bwaibwai iai;
8 Ngkana tiaki ko na reitinako ni katanoata au euangkerio ni karokoa ko anaaki. Amen.