Ime ka a mata

Ozizi na Ọgbụgba-ndụ nile bụ nchịkọta nke mkpughe dị nsọ nile na nkwụpụta nile nke nkwalite mụọ e nyere maka nhiwe na nhazi nke ala-eze nke Chineke n’elu ụwa n’ụbọchị ndị ikpe-azụ a. Ọ bụ ezie na ọtụtụ n’ime nkeji nile bụ ndị e chere iru na ndị-otu Nzukọ nke Jisus Kraịst nke Ndị-nsọ Ụbọchị-Ikpeazụ a, ozi ya nile, ịdọ-aka-na ntị ya nile, na ịgba-ume ya nile, bụ maka uru nke ụmụ mmadụ nile ma nwekwara n’ime ya ọkpụkpọ-oku nye mmadụ nile ebe nile ka ha nụrụ olu-okwu Onye-nwe Jisus Kraịst, na-ekwuru ha n’ ihi ọdị-mma nke ụwa ha na nzọpụta ha mgbe nile na-adigide.

Ọtụtụ n’ime mkpughe nile dị n’ime nchịkọta nkea bụ ndị a natara site n’aka Joseph Smith, Nta; onye-amụma nke mbụ na onye-isi nduzi nke Nzukọ-nsọ nke Jisus Kraịst Ndị-nsọ nke Ụbọchị-Ikpeazụ a. Ndị ọzọ bụ ndị e nyere site n’aka ụfọdụ ndị na-eso ya n’Otu ndị-isi nduzi (lee isi-ọkwu nile nke nkeji nile 135, 136 na 138 na Nkwụpụta nile nke Ụlọ-ọrụ nke 1 na nke 2.)

Akwụkwọ nke Ozizi na Ọgbụgba-ndụ nile bụ otu n’ime ọkọlọtọ-ọrụ nile nke Nzukọ-nsọ ya na Bible Nsọ, Akwụkwọ nke Mọmọn, na Ọla Pel nke Oke Ọnụ-ahịa. Otu o sila dị, Ozizi na Ọgbụgba-ndụ nile pụrụ iche n’ihi na ọ bụghị ntụgharị asụsụ nke dọkụmenti ochie, mana ọ bụ nke nwere mbido ọhụrụ nke Chineke nyere ndị-amụma ya ọ họpụtara maka mwetaghachi nke ọrụ ya dị nsọ na nhiwe nke ala-eze nke Chineke n’ụwa n’ụbọchị ndị a nile. N’ime mkpughe ndia nile a na-anụ olu dị nro mana na-ekwusi-ike nke Onye-nwe Jisus Kraịst, na-ekwu ọzọ n’ọgbọ ozuzu oge akara aka; ma n’ọrụ nke a malitere n’ebe a bụ nke njikere ọbịbịa nke ugboro abụọ ya, na mmezu nke na ndakọta ya na okwu nile nke ndị-amụma nsọ nile ke mgbe mmalite nke ụwa.

Joseph Smith, Nta, ka a mụrụ na 23 Disemba 1805, na Sharon, Ógbè Windsor, Vermont. N’oge ọ bụụrụ nwata, ọ kwagara ya na ezi na ụlọ ruo Manchester, nke nọ n’ọdịda anyanwụ New York. Ọ bụụrụ mgbe o biiri na-nso Manchester n’oge mmalite udummiri nke 1820, mgbe ọ gbara afọ iri na anọ, ka ọ hụrụ ọ́hụ̀ nke mbụ, n’ime ebe nke Chineke, Nna nke Mgbe Ebighi-ebi na Ọkpara ya Jisus Kraịst, bịakutere ya n’onwe ha. A gwara ya n’ime ọ́hụ̀ a na ezi Nzukọ-nsọ nke Jisus Kraịst bukwa nke ehiweworo n’oge Testament Ọhụrụ, na nke nyeworo uju nke ozi-ọma ahụ, a nọghịkwa n’elu ụwa. Ihe ngosipụta nile ndị ọzọ dị-nsọ sochiri ebe a kuziiri ya ihe site n’aka ọtụtụ ndị mụọ-ozi; e zikwara ya na Chineke nwere ọrụ pụrụ iche ọ ga-arụ n’ụwa na kwa site n’aka ya a ga-eweghachite Nzukọ nke Jisus Kraịst n’elu ụwa.

Mgbe oge na-aga, e mere ka Joseph Smith nwee ike site n’enyem-aka dị nsọ tụgharịa ma bipụta Akwụkwọ nke Mọmọn. N’oge a ya na Oliver Cowdery nwetara echichi Ọkwa Nchụ-aja Erọn site n’aka Jọn O Me Baptism n’ọnwa Mee 1829 (lee OznỌd. 13), ma ngwa ngwa mgbe nke a gasịrị e chikwara ha echichi baa n’Ọkwa Nchụ-aja Melkizedek site n’aka Ndị-ozi ochie Pịta, Jemes, na Jọn (lee OznỌd. 27:12). Echichi ndị ọzọ nile sochikwara n’ime nke e nyefere ha ọtụghe-ụzọ nile site n’aka Moses, Elaịja, Elaias, nakwa ọtụtụ ndị-amụma ochie (lee OznỌd. 110; 128:18, 21). Echichi nile ndị a bụ, n’ezie, mwetaghachi nke ikike dị nsọ nye mmadụ n’ụwa. Na 6 Epril 1830, site na ntuzi-aka nke elu-igwe, Onye-amụma Joseph Smith haziri Nzukọ-nsọ ahụ, ma site otu a ezi Nzukọ-nsọ nke Jisus Kraịst ebidowo ọrụ ọzọ dịka ewumewu n’etiti mmadụ, ikike ikuzi ozi-ọma ma lekọta emume-nsọ nile maka nzọpụta. (Lee Ọla Pel nke Oke Ọnụ-ahịa, Akụkọ—Joseph Smith 1:1–75 na OznỌd. 20.)

Mkpughe nile ndị a dị-nsọ ka a natara n’ịza ekpere, n’oge mkpa, ma pụtara dika ihe mere na-ndụ ma gbasakwa ndị mmadụ. Onye-amụma na ndị-otu ya chọrọ odudu dị-nsọ, ma mkpughe ndị a nile gosịrị na ha nwetara ya. N’ime mkpughe nile a ga-ahụ mwetaghachi na mpụta-ìhè nke ozi-ọma nke Jisus Kraịst na ndubata nke ọgbọ ozuzu oge akara aka. Ịga njem e lewere anya n’ọdịda anyanwụ nke Nzukọ-nsọ site na New York na Pennsylvania ruo Ohio, ruo Missouri, ruo Illinois, ma n’ikpeazụ ruo Nnukwu Basin nke ọdịda anyanwụ Amerika na ndọlị ukwu nile nke Ndị-nsọ n’iji chọọ iwu Zaịọn n’ụwa n’oge ugbụ a bụkwa ihe egosipụtara na mkpughe nile ndịa.

Ọtụtụ n’ime nkeji ndị mbụ metụtara okwu nile gbasara ntụgharị-asụsụ na mbipụta nke Akwụkwọ nke Mọmọn (lee nkeji 3, 5, 10, 17 na 19). Ụfọdụ nkeji ndị ikpe-azụ na-egosi ọrụ nke Onye-amụma Joseph Smith na-ime ntụgharị-asụsụ nke Bible site na nkwalite nke mụọ, n’ọge mgbe a natara ọtụtụ n’ime nnukwu nkeji nile nke ozizi (n’iji maa atụ, nkeji 37, 45, 73, 76, 77, 86, 91 na 132 nke ọbụla n’ime ha nwere mmekọrịta doro-anya na ntụgharị-asụsụ Bible).

N’ime mkpughe ahụ nile, ozizi nile nke ozi-ọma pụtara ìhè ya na nkọwa nile gbasara isi-ọkwu ndị dị mkpa dịka ụdị nke Chukwu, mmalite nke mmadụ, nke bu ezi-okwu maka Setan, ebum n’obi nke ọnọdụ pụrụ ịnwụ anwụ, ịdị mkpa nke irube-isi, mkpa enwere maka nchegharị, ọrụ nile nke Mụọ Nsọ; emume-nsọ nile na emume ngosi nile nke gbasara nzọpụta, akàràkà nke ụwa, ọnọdụ ọdịn’iru nile nke mmadụ mgbe Mbilite n’Ọnwụ gasịrị na Ikpe, ịdị ruo mgbe ebighi-ebi nke mmekọrịta nke ọlụlụ di na nwunye, ebighi-ebi nke ezi na ụlọ. N’otu aka ahụ, mpụta-ìhè ntakịrị-ntakịrị nke usoro nlekọta nke Nzukọ-nsọ ka e gosịrị ya na ọkpụkpọ-oku nke ndị ụkọchukwu, Otu Ndị-isi Nduzi Mbụ, Kansụl nke Iri na Abụọ, na ndị Iri Asaa ahụ na nhiwe nke ọkwa ndị nọ n’isi ndị-ọzọ na ọnụ-ọgụgụ juru aka nile. N’ikpeazụ, ịgba-ama nke e nyere maka Jisus Kraịst—ịdị-nsọ ya, ụdị eze ya, izu-oke ya, ịhụ n’anya ya, na ike mgbapụta ya—mere akwụkwọ a ihe oke uru nye ezi na ụlọ nke mmadụ nile na oke ọnụ-ahịa karịa akụ nile nke elu ụwa dum.

Ọtụtụ n’ime mkpụghe nile ka e bipụtara na Zaịọn (Independence), Missouri, na 1833, n’okpuru aha a kpọrọ A Book of Commandments for the Government of the Church of Christ (Akwụkwọ nke Iwu-nsọ nile maka Ọchịchị nke Nzukọ-nsọ nke Kraịst.) Gbasara mbipụta nke a ndị-okenye nke Nzukọ-nsọ nyere ịgba-ama dị mkpa na Onye-nwe gbaworo ama n’ime mkpuru-obi ha nile na mkpughe nile ndị a bụ ezi-okwu. Dịka Onye-nwe na-aga n’iru n’ịgwa ndị odibo ya okwu, otu nchịkọta nke e mere ka o buo ibu ka e bipụtara mgbe afọ abụọ gasịrị na Kirtland, Ohio, nke a kpọrọ Doctrine and Covenants of the Church of Jesus Christ of Latter-day Saints (Ozizi na Ọgbụgba-ndụ nile nke Nzụkọ nke Jisus Kraịst nke Ndị-nsọ Ụbọchị-Ikpeazụ a). Nye mbipụta a na 1835, ọgbụgba-ama e derede nke Ndị-ozi Iri na-abụọ ka anyapadọrọ si otu a:

Ịgba-ama nke
Ndị-ozi iri na Abụọ Nye Ezi-okwu nke Akwụkwọ
Nke Ozizi Na Ọgbụgba-Ndụ Nile

Ịgba-ama nke ndị Aka-ebe nye Akwụkwọ nke Iwu-nsọ nile nke Onye-nwe, iwu-nsọ nke O nyere Nzukọ-nsọ Ya site n’aka Joseph Smith, Nta, onye olu Nzukọ-nsọ họpụtara nye ọkwa maka nke a:

Anyị, ya mere , nwere mmasị ịgba-ama nye ụwa nile nke ụmụ mmadụ, nye ihe ọbụla e kere eke nọ n’elu iru nke ụwa, na Onye-nwe agbawo-ama n’ime mkpụrụ-obi anyị nile, site na Mụọ Nsọ nke a wụkwasiworo n’elu anyị, sị na iwu-nsọ nile ndia ka enyeworo site na nkwalite-mụọ nke Chineke, na ha bara uru nye ndị mmadụ nile, na ha bụ ezi-okwu n’ezie.

Anyị na-agba-ama nke a nye ụwa, ebe Onye-nwe bụ onye enyem-aka anyị; ma ọ bụ site n’amara Chineke Nna, na Ọkpara Ya, Jisus Kraịst ka e nyere anyị ikike inwe ohere nkea nke ịgbara ụwa nile ama nke a, n’ime nke anyị na-an̄ụrị ọn̄ụ karịrị akarị, na-ekpere Onye-nwe mgbe nile ka ụmụ nke ndị mmadụ nweta uru site n’ebe ahụ.

Aha mmadụ Ịri-na-abuo ahụ bụ:

Na mbịpụta ndị ọzọ na-esota Ozizi na Ọgbụgba-ndụ nile, a gbakwụnyere mkpughe nile ndị-ọzọ ma-ọbụ okwu ndị ọzọ kwesịrị ndekọta ka agbakwu nyerewo, dịka anatara ya, ma-ọbụ ka e si nabata ha n’ọgbakọ nile nke ndị kwesịrị ma-ọbụ nzukọ zuru-ọha-nile nke Nzukọ-nsọ.

N’ịbido na mbipụta nke 1835, ndokọ usoro ihe-ọmụmụ okpukpe-chi asaa ka e tinyekwara; ndia ka a kpọrọ aha ha Lectures on Faith (Nkuzi nile n’Okwukwe). Ndị a ka a kwadobeworo ịba uru n’Ụlọ-Akwụkwọ nke ndị Amụma, na Kirtland, Ohio, site n’afọ 1834 ruo 1835. Ọ bụ ezie na ha bara uru maka ozizi na nkuzi, e wepụrụ nkuzi ndia site n’Ozizi na Ọgbụgba-ndụ ke mgbe mbipụta nke 1921 n’ihi na e nyeghị ha ma-ọbụ gosi ha dịka mkpụghe nye Nzukọ-nsọ dum.

O doro anya na e meworo ka ụfọdụ amaghị-eme dịgịde na mbipụta nile gara aga, nke ka nke n’ebe a na-akọ akụkọ maka isi-ọkwu nkeji nile. N’ihi nke a, mbịpụta nke a nwere ndezi nile nke akara-oge na aha-ebe nile nakwa ndezi ntakịrị ole na ole ndị ọzọ mgbe o kwesịrị. Mgbanwe ndị a bụ ndị e mere iji mee ka akwụkwọ a na dọkụmenti nile nke akụkọ kwekọrịta. Ụdị ndị ọzọ puru iche nke mbịpụta nke a tinyere ime ka nrụtụ-aka si n’otu ebe gaa ebe ọzọ dị mma karịa, isi-ọkwụ nkeji nile, na nchikọta isi-ọkwu nile, ihe nile bụ nke e mere iji nyere ndị na-agụ aka ịghọta ma n̄urịa ọn̄ụ n’ime ozi nke Onye-nwe otu esi nye ya n’Ozizi na Ọgbụgba-ndụ nile.

Ime ka a mata nile nke nkeji nile nke Ozizi na Ọgbụgba-ndụ nile nwere nrụtụaka nile nye History of the Church (Akụkọ nke Nzukọ-nsọ). History of the Church bụ akwụkwọ dị ukwu-akwụkwọ asaa nke nkọwasị ndepụta Nzukọ-nsọ nke Jisus Kraịst nke Ndị-nsọ Ụbọchị-Ikpeazụ a sịte na 1820 ruo 1848. N’ihi na a tụgharịbeghị-asụsụ akwụkwọ ndị a ma ha dị nanị n’asụsụ Bekee, ebe-mnweta nye History of the Church dị na ime ka a mata nke nkeji nile nke mbịpụta nkea a kpọrọ ahụ nke Ozizi na Ọgbụgba-ndụ nile na-arụtụ aka n’ukwu- akwụkwọ ndị nke nọ n’asụsụ Bekee nke akụkọ a.