15. O le Malumalu o Navu

O lenei faatusa fuaina o le Malumalu o Navu o loo tu i le tulaga o le uluai malumalu. Sa fausia le malumalu i maa lanu ʼefuʼefu paʼepaʼe mai le eria. Sa fua le fale e 39 mita le umi ae e 27 mita le lautele. E 48 mita i luga o le laueleele sa tu ai le tumutumu o le olo. Sa faia e tagata o le Ekalesia taulaga e tele ina ia fausia ai lenei malumalu matagofie, sa amata le galuega i le 1841. O ni isi sa galulue mo masina i le fale; o isi sa faataulagaina a latou tupe. E ui ina le fausia atoa, sa faatumuina le malumalu ina ua le toe ofi se isi, e tagata o le Ekalesia o e sa o ane i ai mo sauniga i masina ae lei oo i la latou solaaga i Sisifo. Ina o o ese le toatele o le Au Paia ai Navu i uluai aso o le tau totogo o le 1846 ona o upu faamataʼu ma fuafuaga faasaua o le au fatuiese, sa faamuli ai se auvaega faapitoa ina ia faauma le malumalu. I le aso 30 o Aperila 1846, O Elder Orson Hyde ma Wilford Woodruff ma isi e tusa ma le 20 sa faapaiaina lenei maota o le Alii. Sa tuufua le malumalu ia Setema ina ua tuliesea le toe vaega o tagata o le Ekalesai mai Navu; sa solia ma faaeleeleaina e le mau tagata le fale paia. Sa faaleagaina i le afi ia Oketopa 1848.

O Mea Taua sa Tutupu: Sa faia le konafesi aoao i totonu o le potu faapotopoto o le malumalu i le aso 5 o Oketopa 1845. Sa amataina le galuega o faaeega paia i le aso 10 o Tesema 1845 ma sa faaauau seia oo i le aso 7 o Fepuari 1846. E sili atu i le 5,500 papatisoga mo e ua maliliu ma faamauga sa faia.