6. O le Fale Ogalaau o Peter Uitimera Matua

O le fale ogalaau toe fauina o Peter Uitimera Matua, sa fausia i le tulaga o le faavae o le uluai fale i Feiete, Niu Ioka.

O Mea Taua sa Tutupu: Sa faaiu e Iosefa Samita le faaliliuga o le Tusi a Mamona iinei i le faaiuga o Iuni 1829. I le togavao e latalata i lenei fale, o Molimau e Toatolu sa vaaia le agelu o Moronae ma papatusi auro. O la latou molimau o loo lomia nei i kopi uma o le Tusi a Mamona. O le aso 6 o Aperila 1830, sa faapotopoto tagata e tusa ma le 60 i le fale o Peter Uitimera e molimau le faatulagaga tatau o le Ekalesia a Iesu Keriso. O uluai fonotaga ma konafesi o le Ekalesia fou sa faia iinei. O faaaliga e 20 o loo maua i le Mataupu Faavae ma Feagaiga sa maua i le fale o Peter Uitimera.