3 Yufala i mas save hemia, se long ol las dei, bambae i gat ol man we oli wantem bos, we oli wantem wokbaot folem rabis tingting blong olgeta.

4 Oli no wantem save long Lod Jisas Kraes, mo oli stap talem: “?Wehem nao promes blong hem se bae hem i kam? From we, stat long taem we ol papa oli bin slip, evri samting oli mas gohed blong stap olsem we oli stap, mo oli bin gohed blong stap olsem we oli stap stat long taem we oli mekem wol ia.”

5 Oli no save wantem save long hemia, se long taem bifo olgeta, ol heven, mo graon we i kam wol ia i stanap insaed long wota mo i kamaot long wota ia, olgeta samting ia, tok blong God nao i bin mekem;

6 Mo tru long tok blong God, wol ia we i bin stap bifo, wota i bin kavremap mo i bin lus;

7 Be ol heven mo graon we i wol we i stap naoia, semfala tok ia nomo i holemtaet i stap, hem i holem i stap blong i bon long faea long dei ia blong jajmen mo dei ia we ol man nogud bae oli lus evriwan long tudak.

8 Be long saed blong taem ia we Lod bae i kam, yufala we mi lavem yufala tumas, bae mi no livim yufala i no save wan samting ia, se wan dei, long Lod i olsem wan taosen yia, mo wan taosen yia i olsem wan dei.

9 Lod i no stap tektaem blong hem long saed blong promes blong hem, mo long saed blong taem we bae hem i kam, olsem samfala man oli talem se hem i tektaem; be hem i stap mekem tingting blong hem i longfala blong wet long yumi, hem i no wantem se wan long yumi i go lus, be blong evriwan i kam blong sakem sin.

10 Be dei blong Lod bae i kam olsem wan man stil long naet, long wan taem we ol heven bae oli seksek, mo graon tu bae i seksek, mo ol bigfala hil bae oli tanem i kam wota mo oli lus long wan bigfala noes, mo ol samting we oli mekem wol ia bae oli fulap long wan strong hot mo ful wol ia tu, bae i fulap long strong hot, mo ol rabis samting we oli stap long wol ia, bae oli bon long faea.

11 Sapos, long tetaem ia, evri samting ia bae oli prapa lus evriwan, nao ?wanem kaen man nao yufala i mas kam, long fasin blong yufala mo long fasin blong kam olsem wan god,

12 we yufala i lukluk i go long, mo stap rere from dei ia we Lod i stap kam, we long tetaem ia ol nogud samting blong ol heven bae oli fulap long faea, bae oli lus evriwan, mo ol bigfala hil oli tanem i kam wota from strongfala hot?

13 Be, sapos yumi stap strong, bambae Lod i holemtaet yumi folem promes blong hem. Mo bae yumi lukluk long wan niu heven, mo wan niu wol we stret mo gud fasin i stastap long hem.