25 Ma sa sii aʼe e Mekisateko lona leo ma sa faamanuia atu ia Aperamo.

26 O lenei o Mekisateko o le alii o le faatuatua, o lē na faia le amiotonu; ma aʼo itiiti lava na ia mataʼu i le Atua, ma sa ia tapunia gutu o leona, ma sa ia tineia le mumū o le afi.

27 Ma o lea, ina ua faamaonia e le Atua, na faauuina ai o ia o le faitaulaga sili e tusa ma le faatulagaga o le feagaiga lea na faia e le Atua ma Enoka,

28 Sa mulimuli lava i le faatulagaga a le Alo o le Atua; le faatulagaga lea na oo mai, e lei ala mai i le tagata, e le o le loto foi o le tagata; e lei ala mai foi i le tamā po o le tinā; e lei ala mai foi i le amataga o aso po o le iuga o tausaga; aʼo le Atua;

29 Ma sa tuuina atu ai le perisitua i tagata e ala i le valaauina i lona lava siufofoga, e tusa ai ma lona lava finagalo, i le toatele o e na talitonu i lona suafa.

30 Aua ina ua tauto le Atua ia Enoka ma ana fanau i le tautoga na faia e ia lava; o tagata uma lava ua faauuina e tusa ma i lenei faatulagaga ma valaauga e tatau ona maua le mana, e ala i le faatuatua, e soloia ai mauga, e vaevaeina ai le sami, e faapaʼumātuina ai vai, e faaliliuese ai vai i o latou alatafe;

31 E faafememeaiina ai autau a atunuu, e vaevaeina ai le fogaeleele, e lepetia ai soo se noataga, e tu atu i luma o le Atua; e faia ai mea uma e tusa ma lona finagalo, e tusa ma lana poloaiga, e faatoilalo ai itumālō ma mana; ma o lenei mea e ala i le finagalo o le Alo o le Atua lea na i ai aʼo lei faavaeina le lalolagi.

32 Ma o tagata na mauaina lenei faatuatua, ua oo mai ai i lenei faatulagaga a le Atua, na liua ai i latou ma sa aveina aʼe i le lagi.

33 Ma lenei, o Mekisateko o le faitaulaga o lenei faatulagaga; o lea na ia maua ai le filemu i Salema, ma sa taʼua ai o ia o le Aloalii o le filemu.

34 Ma sa faia e lona nuu le amiotonu, ma sa maua ai le lagi, ma sa saili i le aai o Enoka lea na aveina aʼe e le Atua, ua vavaeese ai lea aai mai le fogaeleele, ua faapolopolo ai lea aai seia oo i aso e gata ai, po o le iuga o le lalolagi;

35 Ma sa fetalai mai, ma sa tauto ai i se tautoga, e tatau ona toe faatasia le lagi ma le fogaeleele; ma o atalii o le Atua e tatau ona tofotofoina i latou e pei na ui mai i le afi.

36 Ma o lenei Mekisateko, ina ua faatuina e ia le amiotonu, sa taʼua ai o ia o le tupu o le lagi e lona nuu, po o lona uiga, o le Tupu o le filemu.

37 Ma sa ia sii aʼe lona leo, ma sa ia faamanuia atu ai ia Aperamo, i le avea ma faitaulaga sili, ma lē tausia le faleteuoloa o le Atua;

38 O lē na tofia e le Atua e talia sefuluai mo e matitiva.

39 O le mea lea, na totogi atu ai e Aperamo ia te ia sefuluai o mea uma na ia te ia, o ʼoa uma na ia mauaina, o mea na tuuina atu e le Atua ia te ia e sili atu nai lo mea na ia manaomia.

40 Ma sa oo ina faamanuiaina e le Atua Aperamo, ma sa tuuina atu ia te ia ʼoa, ma le mamalu, ma laueleele e avea o le tofi tumau-faavavau; e tusa ai ma le feagaiga na ia osia, ma tusa ai ma le faamanuiaga lea na faamanuiaina ai o ia e Mekisateko.