ປຈສ, ປະຖົມມະການ 17:3–12. ປຽບທຽບໃສ່ກັບ ປະຖົມມະການ 17:3–12
ຜູ້ຄົນບໍ່ສາມາດຮັກສາພິທີການຂອງພຣະກິດຕິຄຸນ, ລວມທັງການບັບຕິສະມາ. ພຣະເຈົ້າອະທິບາຍເລື່ອງພັນທະສັນຍາຂອງພິທີຕັດ ແລະ ອາຍຸທີ່ຮູ້ຈັກຮັບຜິດຊອບຂອງເດັກ ແກ່ອັບຣາຮາມ.
3 ແລະ ເຫດການໄດ້ບັງເກີດຂຶ້ນ, ຄືອັບຣາມໄດ້ກົ້ມຂາບລົງຈົນເຖິງພື້ນດິນ, ແລະ ໄດ້ເອີ້ນຫາພຣະນາມຂອງພຣະຜູ້ເປັນເຈົ້າ.
4 ແລະ ພຣະເຈົ້າໄດ້ກ່າວກັບເພິ່ນວ່າ, ຜູ້ຄົນຂອງເຮົາໄດ້ຫັນໜີຈາກກົດເກນຂອງເຮົາ, ແລະ ບໍ່ໄດ້ຮັກສາພິທີການຂອງເຮົາ, ຊຶ່ງເຮົາໄດ້ປະທານໃຫ້ບັນພະບຸລຸດຂອງພວກເຂົາ;
5 ແລະ ພວກເຂົາບໍ່ໄດ້ຮັກສາການເຈີມຂອງເຮົາ, ແລະ ການຝັງ, ຫລື ການບັບຕິສະມາ ຊຶ່ງໃນເລື່ອງນີ້ ເຮົາໄດ້ບັນຊາພວກເຂົາ;
6 ແຕ່ໄດ້ຫັນໜີຈາກພຣະບັນຍັດ, ແລະ ດຳເນີນການດ້ວຍຕົນເອງ ໂດຍການຊຳລະລ້າງເດັກນ້ອຍໆ, ແລະ ການພົມເລືອດ;
7 ແລະ ໄດ້ກ່າວວ່າ ເລືອດຂອງອາເບັນທີ່ຊອບທຳ ໄດ້ຫລັ່ງເພື່ອບາບ; ແລະ ບໍ່ຮູ້ວ່າພວກເຂົາມີຄວາມຮັບຜິດຊອບຕໍ່ເຮົາແນວໃດ.
8 ແຕ່ ສຳລັບເຈົ້າ, ຈົ່ງເບິ່ງ, ເຮົາຈະເຮັດພັນທະສັນຍາກັບເຈົ້າ, ແລະ ວ່າເຈົ້າຈະເປັນບັນພະບຸລຸດຂອງຊົນຊາດທັງຫລາຍ.
9 ແລະ ເຮົາເຮັດພັນທະສັນຍານີ້, ວ່າທຸກປະຊາຊາດຈະຮູ້ຈັກລູກຫລານຂອງເຈົ້າ. ຊື່ເຈົ້າຈະບໍ່ແມ່ນອັບຣາມອີກຕໍ່ໄປ, ແຕ່ເຈົ້າຈະມີຊື່ໃໝ່ວ່າ ອັບຣາຮາມ; ເພາະເຮົາໄດ້ໃຫ້ເຈົ້າເປັນບັນພະບຸລຸດຂອງຫລາຍໆຊົນຊາດ.
10 ແລະ ເຮົາຈະໃຫ້ເຈົ້າມີເຊື້ອສາຍຢ່າງຫລວງຫລາຍ ແລະ ບາງຄົນໃນເຊື້ອສາຍນັ້ນ, ແລະ ຈາກລູກຫລານຂອງເຈົ້າ ຈະເປັນເຖິງກະສັດ.
11 ແລະ ເຮົາຈະສະຖາປະນາພັນທະສັນຍາຂອງພິທີຕັດໄວ້ກັບເຈົ້າ, ແລະ ມັນຈະເປັນພັນທະສັນຍາລະຫວ່າງເຮົາ ແລະ ເຈົ້າ, ແລະ ລູກຫລານຂອງເຈົ້າ ນັບຈາກເຈົ້າ, ໃນລຸ້ນຂອງພວກເຂົາ; ເພື່ອເຈົ້າຈະຮູ້ໄປຕະຫລອດການວ່າ ເດັກນ້ອຍບໍ່ຕ້ອງຮັບຜິດຊອບຕໍ່ໜ້າເຮົາ ຈົນກວ່າເຂົາເຖິງແປດປີ.
12 ແລະ ເຈົ້າຕ້ອງຍຶດຖືທີ່ຈະຮັກສາພັນທະສັນຍາທັງໝົດຂອງເຮົາ ຊຶ່ງພັນທະສັນຍາເຫລົ່ານັ້ນ ເຮົາໄດ້ເຮັດໄວ້ກັບບັນພະບຸລຸດຂອງເຈົ້າ; ແລະ ເຈົ້າຕ້ອງຮັກສາພຣະບັນຍັດ ທີ່ເຮົາໄດ້ປະທານໃຫ້ແກ່ເຈົ້າ ດ້ວຍປາກຂອງເຮົາເອງ, ແລະ ເຮົາຈະເປັນພຣະເຈົ້າຂອງເຈົ້າ ແລະ ເປັນພຣະເຈົ້າຂອງລູກຫລານຂອງເຈົ້າ ນັບຈາກເຈົ້າ.
ປຈສ, ປະຖົມມະການ 17:23–24. ປຽບທຽບໃສ່ກັບ ປະຖົມມະການ 17:17–18
ອັບຣາຮາມປິຕິຍິນດີກັບຄຳທຳນາຍກ່ຽວກັບການເກີດຂອງອີຊາກ ແລະ ອະທິຖານເພື່ອອິດຊະມາເອນ.
23 ຈາກນັ້ນອັບຣາຮາມໄດ້ກົ້ມຂາບລົງຈົນເຖິງພື້ນດິນ ແລະ ປິຕິຍິນດີ, ແລະ ໄດ້ກ່າວຢູ່ໃນໃຈວ່າ, ຈະມີເດັກມາເກີດນຳຄົນທີ່ມີອາຍຸໜຶ່ງຮ້ອຍປີ, ແລະ ນາງຊາຣາ ຜູ້ມີອາຍຸເກົ້າສິບປີ ຈະເປັນຄົນໃຫ້ກຳເນີດ.
24 ແລະ ອັບຣາຮາມ ໄດ້ກ່າວຕໍ່ພຣະເຈົ້າວ່າ, ໂອ້ ຂ້າແດ່ພຣະອົງເຈົ້າ ເປັນຫຍັງບໍ່ໃຫ້ອິດຊະມາເອນ ເປັນຜູ້ສືບແທນມໍລະດົກຂອງຂ້ານ້ອຍຢ່າງພາກພູມໃຈ!