5 Ma lenei, e faatatau i ou atalii e toalua, o Efaraima ma Manase, ia na fananau mai ia te oe i le laueleele o Aikupito, ae ou te lei sau ia te oe i Aikupito; faauta, e fai moʼu i laua, ma e faamanuiaina i laua e le Atua o oʼu tamā; e faamanuiaina i laua e pei lava o Reupena ma Simeona, aua e ā aʼu i laua; o le mea lea e taʼua ai i laua i loʼu igoa. (O le mea lea na taʼua ai i laua ia Isaraelu.)

6 Ma o lau fanau foi e te fanauina e mulimuli ane i laua, e fai mo oe, ma e taʼua foi i le igoa o o latou uso i o latou tofi, i ituaīga; o lea na taʼua ai i latou o ituaīga o Manase ma Efaraima.

7 Ma sa fai atu Iakopo ia Iosefa, Ina ua faaali mai le Atua o oʼu tamā i Lusa, i le laueleele o Kanana; na ia tauto mai ia te aʼu, na te tuuina mai ia te aʼu, ma aʼu fanau, le laueleele e fai ma tofi tumau-faavavau.

8 O lea, Loʼu atalii e, ua ia faamanuiaina aʼu i le tausiga o oe ina ia avea o se auauna mo aʼu, i le laveaiina o loʼu aīga mai le oti.

9 I le laveaiina o loʼu nuu, o ou uso, mai le oge lea na matuā matautia i le laueleele; o le mea lea o le a faamanuiaina ai oe e le Atua o ou tamā, ma le fua o ou sulugatiti, ina ia faamanuiaina i latou e sili atu i ou uso, ma e sili atu foi i le aīga o lou tamā;

10 Aua ua e manumālō, ma ua ifo le aīga o lou tamā ia te oe, e pei lava ona sa faaali ia te oe, aʼo lei faatauina atu oe i Aikupito i lima o ou uso; o le mea lea e ifo ai ou uso ia te oe, mai lea tupulaga i lea tupulaga, i le fua o ou sulugatiti e faavavau;

11 Aua e avea oe ma malamalama mo loʼu nuu, e laveaiina i latou i aso o lo latou faatagataotauaina, mai le nofopologa; ma aumaia le faaolataga ia i latou, ao latou ifo uma i lalo o le agasala.