24 Ma sa fai atu Iosefa i ona uso, ou te oti, ma ou alu atu ai i oʼu tamā; ma ou te alu ifo i loʼu tuugamau ma le ʼoliʼoli. Ia faatasi ma outou le Atua o loʼu tamā o Iakopo, e laveaiina outou mai le puapuagā i aso o lo outou nofopologa; aua na asiasi mai le Alii ia te aʼu, ma sa ou maua ai le folafolaga mai le Alii, e faapea o le fua o oʼu sulugatiti, e faatuina mai ai e le Alii le Atua se lālā amiotonu i oʼu sulugatiti; ma e mo outou, e na faaigoaina e loʼu tamā o Iakopo ia Isaraelu, perofeta; (e lē o le Mesia lē ua igoa ia Sailo;) ma o le perofeta lenei e laveaiina loʼu nuu mai Aikupito i aso o lo outou nofopologa.

25 Ma o le a oo mai, o le a toe faataapeapeina i latou; ma e mafai fai ese ai se lālā, ma e aveina atu i se atunuu mamao; ae ui i lea e manatuaina i latou i feagaiga a le Alii, pe a afio mai le Mesia; aua e faaali atu o ia ia te i latou i aso e gata ai, i le Agaga o le mana; ma e aumaia i latou mai le pogisā i le malamalama; mai le pogisā natia, ma mai le faatagataotauaina i le saolotoga.

26 E faatuina e le Alii loʼu Atua le tagatavāai, o lē e avea ma tagatavāai filifilia i le fua o oʼu sulugatiti.

27 Sa faapea ona fetalai mai ai le Alii le Atua o oʼu tamā ia te aʼu, O le tagatavāai filifilia e ou te faatuina mai i le fua o ou sulugatiti, ma e matuā faatāuaina lava o ia i totonu o le fua o ou sulugatiti; ma ou te tuu atu ia te ia poloaiga na te faia le galuega mo le fua o ou sulugatiti, o ona uso ia.

28 Ma na te ia aumaia i latou i le malamalama o feagaiga ia na ou faia ma ou tamā; ma na te faia soo se galuega ou te poloaiina ai o ia.

29 Ma ou te faia o ia ia sili i oʼu lava mata, aua na te ia faia laʼu galuega; ma e sili o ia e pei lava o lē na ou fai atu ai ou te faatuina aʼe mo outou, e laveaiina loʼu nuu, le aīga o Isaraelu, mai Aikupito; aua ou te faatuina aʼe le tagatavāai e laveaiina loʼu nuu mai le laueleele o Aikupito; ma e taʼua o ia o Mose. Ma o lenei igoa e iloa ai e ia e tupuga o ia mai lou āiga; aua e tausia o ia e le afafine o le tupu, ma e taʼua o ia o lana tama.

30 Ma le tasi, o le tagatavāai ou te faatuina aʼe mai le fua o ou sulugatiti, ma ou te tuuina atu ia te ia le mana e aumai ai laʼu upu i le fua o ou sulugatiti; ma e lē naʼo le aumaia foi o laʼu upu, ua fetalai mai ai le Alii, aʼo le faatalitonuina foi o i latou i laʼu upu, lea faapea ona oo atu ia te i latou i aso e gata ai;

31 O le mea lea o le ʼa tusi le fua o ou sulugatiti, ma o le a tusi foi le fua o sulugatiti o Iuta; ma o mea o le a tusia e le fua o ou sulugatiti, ma mea foi o le a tusia foi e le fua o sulugatiti o Iuta, o le a tutupu faatasi e faatoilaloina ai mataupu sesē, ma tuu ai i lalo finauga, ma faatu i le filemu i totonu o le fua o ou sulugatiti, ma aumai ai i latou i le malamalama e uiga i o latou tamā i aso e gata ai; ma i le malamalama foʼi o aʼu feagaiga, ua fetalai mai ai le Alii.

32 Ma o le a faamalosia o ia mai le vaivai, i lena aso e alu atu ai laʼu galuega i totonu o oʼu tagata uma, lea e toe fuataiina ai i latou, o e o le aiga o Isaraelu, i aso mulimuli.

33 Ma ou te faamanuiaina lena tagatavāai, ma o i latou o e saili e faaumatia o ia e faafememeaiina; aua o lenei folafolaga ou te tuu atu ia te oe; aua ou te manatua oe mai lea tupulaga i lea tupulaga; ma o lona igoa e taʼua o Iosefa, ma e faaigoa i le igoa o lona tamā; ma e faapei oe o ia; aua o le mea e aumaia e le Alii i lona lima e aumaia ai loʼu nuu i le faaolataga.

34 Ma sa tauto atu le Alii ia Iosefa na te ia faasaoina lana fanau e faavavau, ua faapea mai, ou te faatuina mai Mose, ma e i ai le tootoo i lona lima, ma na te ia faapotopotoina faatasi loʼu nuu, ma na te ia taitaia i latou e pei o le lafu mamoe, ma na te taina le suāvai o le Sami Ulaula i lona tootoo.

35 E maua e ia le faamasinoga, ma e tusia e ia le afioga a le Alii. Ma e le tautala o ia i ni upu e tele, aua ou te tusia mo ia laʼu tulafono i le tamatamailima o loʼu lava lima. Ma ou te faia foi le failauga mo ia, ma o lona igoa e taʼua o Arona.

36 Ma e faia foi lea mea ia te oe i aso e gata ai, e pei lava ona ou tauto ai. O lea, na fai atu ai Iosefa i ona uso, E asiasi mai moni lava le Atua ia te outou, ma aveeseina outou mai lenei laueleele, i le laueleele lea na ia tauto ai ia Aperaamo, ma Isaako, ma Iakopo.

37 Ma sa faamaonia atu e Iosefa isi mea e tele i ona uso, ma sa ia faia le tautoga i le fanauga a Isaraelu, ua faapea atu ia te i latou, E asiasi mai moni lava le Atua ia te outou, ma tou te aveina ai o oʼu ivi ai inei.

38 Ona maliu lea o Iosefa ina ua selau ma le sefulu o ona tausaga; ma sa latou atualalaina ai o ia, ma sa latou tuuina ai o ia i totonu o se pusa oti i Aikupito; ma sa lē tanumia ai o ia e le fanauga a Isaraelu, ina ia mafai ai ona aveina atu o ia ma tuuina ai i totonu o le tuugamau faatasi ma lona tamā. Ma sa faapea ona latou manatua ai le tautoga na latou faia ia te ia.