FIS, Kenese 9:10–15 (faatusatusa i le Kenese 9:3–9)
(E faamasinoina le tagata mo le fasioti-tagata ma le faataugaina o le ola o meaola.)
10 Ae peitai, o le toto o aano uma na ʼOu tuu atu ia te outou mo meaʼai, ia faamasaaina i luga o le eleele, e aveese ai le ola, ma o le toto ia outou lē ʼaia lava.
11 Ma e moni lava, ia lē faamasaaina lava le toto, vagana mo meaʼai, ina ia faasao ai o outou ola; ma o le toto foi o manu vaefa taitasi ʼOu manaomia mai i o outou lima.
12 Ma ai se tasi e faamasaaina le toto o le tagata, ia faamasaaina lona toto e le tagata; aua e lē tatau i le tagata ona faamasaaina le toto o le tagata.
13 Aua ʼOu te tuu atu se poloaiga, i uso o tagata taitoatasi e tatau ona ia faasaoina le ola o le tagata, aua na ou faia le tagata i loʼu lava faatusa.
14 Ma o le poloaiga ou te tuu atu ia te outou, Ia outou fanafanau ma uluuluola; ia outou faatuputupulaʼia i luga o le fogaeleele, ma ia uluola ai.
15 Ma sa fetalai atu le Atua ia Noa, ma ona atalii faatasi ma ia, ua faapea mai, Ma faauta, o Aʼu, ou te faatuina laʼu feagaiga ma outou, lea na ou faia i lo outou tamā o Enoka, e uiga ia outou fanau pe a mavae atu outou.
FIS, Kenese 9:21–25 (faatusatusa i le Kenese 9:16–17)
(Na tuuina le nuanua i le lagi e fai ma faamanatu o le feagaiga a le Atua ia Enoka ma Noa foi. I aso e gata ai, o le faapotopotoga aoao a le ekalesia a le Ulumatua [le Siona a le Alii i le taimi o Enoka; tagai i le Mose 7] o le a faatasi ai ma e amiotonu i le lalolagi.)
21 Ma o le a i ai le nuanua i le ao; ma o le a ou vaai atu i ai, ina ia ou manatua ai le feagaiga tumau-faavavau, lea na ou faia i lo outou tamā o Enoka; e faapea, pe a tausia e tagata aʼu poloaiga uma, e tatau ona toe aumai Siona i le lalolagi, le aai o Enoka lea na ou segia aʼe ia te aʼu lava.
22 Ma o laʼu lava feagaiga tumau-faavavau lenei, pe a talia e au fanau le upumoni, ma vāai aʼe i luga, ona vaai ifo ai lea o Siona i lalo, ma e lūlūina ai lagi uma lava i le fiafia, ma e gatete foi le fogaeleele i le ʼoliʼoli;
23 Ma e sau i lalo mai le lagi le faapotopotoga aoao a le ekalesia a le ulumatua, ma nonofo ai i le lalolagi, ma e mautofi ai seia oo mai le iuga. Ma o laʼu lava feagaiga tumau-faavavau lenei, lea na ou faia ma lo outou tamā o Enoka.
24 Ma o le a i ai le nuanua i le ao, ma o le a ou faatuina laʼu feagaiga ia te oe, lea ua ou faia i le va o aʼu ma oe, mo mea ola uma lava o le a i ai i luga o le fogaeleele.
25 Ma sa fetalai atu le Atua ia Noa, O le faailoga lenei o le feagaiga lea ua ou faatuina i le va o aʼu ma oe; mo mea ola uma o le a i ai i luga o le fogaeleele.