ປຈສ, ເຮັບເຣີ 6:1–10. ປຽບທຽບໃສ່ກັບ ເຮັບເຣີ 6:1–10
ຫລັກທຳຂອງຄຳສອນຂອງພຣະຄຣິດ ນຳໄປສູ່ຄວາມດີພ້ອມ.
1 ສະນັ້ນ ໂດຍທີ່ບໍ່ປະຫລັກທຳແຫ່ງຄຳສອນຂອງພຣະຄຣິດ, ຂໍໃຫ້ເຮົາຈົ່ງກ້າວໄປສູ່ຄວາມດີພ້ອມທຸກຢ່າງ; ໂດຍບໍ່ວາງຮາກຖານອີກໃນເລື່ອງການກັບໃຈຈາກວຽກງານທີ່ຕາຍແລ້ວ, ແລະ ໃນເລື່ອງສັດທາທີ່ມີຕໍ່ພຣະເຈົ້າ.
2 ຄຳສັ່ງສອນເຖິງເລື່ອງບັບຕິສະມາ, ພິທີວາງມື, ແລະ ການຟື້ນຄືນຊີວິດຂອງຄົນຕາຍ, ແລະ ການພິພາກສາລົງໂທດອັນເປັນນິດ.
3 ແລະ ພວກເຮົາຈະກ້າວໄປສູ່ຄວາມດີພ້ອມທຸກຢ່າງ ຖ້າພຣະເຈົ້າອະນຸຍາດ.
4 ເພາະພຣະອົງໄດ້ເຮັດໃຫ້ມັນເປັນໄປບໍ່ໄດ້ສຳລັບຄົນເຫລົ່ານັ້ນ ທີ່ໄດ້ຮັບຄວາມສະຫວ່າງມາເທື່ອໜຶ່ງແລ້ວ ແລະ ຊີມລົດຂອງປະທານຈາກສະຫວັນ, ແລະ ໄດ້ຮັບພຣະວິນຍານບໍລິສຸດ,
5 ແລະ ໄດ້ຊີມລົດອັນດີແຫ່ງພຣະຄຳຂອງພຣະເຈົ້າ ກັບລິດເດດແຫ່ງຄາວທີ່ຈະມາເຖິງນັ້ນ,
6 ຖ້າພວກເຂົາເຫລົ່ານັ້ນໄດ້ຕົກເສຍໄປແລ້ວ, ກໍເຫລືອວິໄສທີ່ຈະນຳພວກເຂົາກັບຄືນມາສູ່ການກັບໃຈອີກໄດ້; ເພາະພວກເຂົາເອງຄຶງພຣະບຸດຂອງພຣະເຈົ້າເສຍ ແລະ ເຮັດໃຫ້ພຣະອົງໄດ້ຮັບການປະຈານຂາຍໜ້າ.
7 ເພາະມື້ນັ້ນຈະມາເຖິງ ເມື່ອພື້ນດິນຕອນໃດດູດຮັບເອົານ້ຳຝົນທີ່ຕົກໃສ່ຢູ່ເລື້ອຍ, ແລະ ເກີດພືດຜົນງອກຂຶ້ນໃຫ້ປະໂຫຍດແກ່ຄົນທີ່ອາໄສຢູ່ໃນນັ້ນ, ຜູ້ຊຶ່ງບັດນີ້ໄດ້ຮັບພຣະພອນຈາກພຣະເຈົ້າ, ຈະຖືກເຮັດໃຫ້ສະອາດດ້ວຍໄຟ.
8 ເພາະພື້ນດິນທີ່ເກີດສ້ຽນໜາມ ກໍນັບວ່າບໍ່ມີຄ່າ, ແລະ ເກືອບຈະຖືກປ້ອຍດ່າແລ້ວ; ສະນັ້ນພືດຜົນໃດທີ່ບໍ່ເກີດຜົນດີ, ມັນຈະຖືກໂຍນເຂົ້າກອງໄຟ; ຊຶ່ງໃນທີ່ສຸດກໍຈະຖືກເຜົາໄຟເສຍ.
9 ແຕ່ພວກພີ່ນ້ອງເອີຍ, ເຖິງແມ່ນວ່າເຮົາເວົ້າດັ່ງນັ້ນ ເຮົາກໍຍັງເຊື່ອແນ່ວ່າ ທ່າທີຂອງພວກເຈົ້າ ມີສິ່ງທີ່ດີກວ່າທີ່ໄດ້ກ່າວມານັ້ນ ຄືສິ່ງທີ່ກ່ຽວກັບຄວາມລອດ.
10 ເພາະວ່າພຣະເຈົ້າບໍ່ໄດ້ອະຍຸດຕິທຳ, ສະນັ້ນ ພຣະອົງຈະບໍ່ລືມການງານທີ່ພວກເຈົ້າໄດ້ເຮັດ ແລະ ຄວາມຮັກທີ່ພວກເຈົ້າໄດ້ສະແດງຕໍ່ພຣະນາມຂອງພຣະອົງ, ຄືການຮັບໃຊ້ໄພ່ພົນຂອງພຣະອົງ ເໝືອນດັ່ງທີ່ພວກເຈົ້າຍັງຮັບໃຊ້ຢູ່.