1 Rahilal sa’ xb’een Ariel, sa’ xb’een Ariel, li tenamit b’ar wi’ kiwan laj David! Tiqomaq li junjunq chihab’; che’xkamsiheb’ li mayej.

2 A’b’anan laa’in tinrahob’tesi Ariel, ut taawanq li aalalil ut rahil ch’oolej; xb’aan naq chi jo’ka’in kixye li Qaawa’ we, Taawanq choq’ re Ariel;

3 Naq laa’in li Qaawa’ tinsut rix rik’in teep aj pleet, ut tinram rix rik’in tuub’anb’il ch’och’, ut tinwaklesi li kawil na’ajej chiru.

4 Ut taakub’siiq taq’a, ut taa’atinaq chalen chaq sa’ li ch’och’, ut taa’ab’imanq chaq taq’a sa’ poqs li raatin; ut lix yaab’ xkux taawanq chanchan junaq li wan xmuhel li kamenaq rik’in; chalen chaq sa’ li ch’och’, ut sa’ poqs taahasb’aq chaq li raatin.

5 Jo’kan ajwi’ lix k’ihaleb’ laj jalanil tenamit sa’ a’an te’wanq chanchan ch’ina poks, ut lix k’ihaleb’ li ani xuwajel te’wanq chanchan lix mulel q’olom li na’oso’; relik chi yaal, sa’ junpaat naq taawanq chi seeb’.

6 Xb’aan naq te’ula’aniiq xb’aan li Qaawa’ reheb’ li teepal rik’in raq’ kaaq, ut rik’in hiik, ut nimla choqink, rik’in kawil hab’ ut kaq-sut-iq’, ut xxamlel li xam aj sachonel.

7 Ut lix k’ihaleb’ chixjunileb’ li tenamit li neke’pleetink re Ariel, chixjunileb’ ajwi’ li neke’pleetink re a’an ut re lix k’anjeleb’aal re pleet, ut li neke’rahob’tesink re, te’wanq chanchan jun li matk’ li namatk’iman chi q’eq.

8 Relik chi yaal, taawanq reheb’ jo’ chanru re jun li winq taatz’okaaq li namatk’ek, ut k’ehomaq reetal naq yoo chi wa’ak, a’ut na’aj ru ut toj wan xtz’okajik li raam; malaj jo’ re junaq winq taachaqiq re li namatk’ek, ut k’ehomaq reetal naq na’uk’ak, a’ut na’aj ru, ut k’ehomaq reetal naq tawajenaq, ut toj wan k’a’ru naxsik’ li raam. Relik chi yaal, jo’ka’in ajwi’ naq te’wanq lix k’ihaleb’ chixjunil li tenamit li te’pleetinq re li tzuul Sion.