16 Ut ke’xye re, Wan qik’in li chaq’rab’, ut eb’ li profeet; a’b’an li winq a’in, a’an ink’a’ taqak’ul chi wank choq’ aj taqlahom qe; xb’aan naq naxk’e rib’ jo’ aj raqol aatin sa’ qab’een.

17 Toja’ naq li Jesus kixye reheb’, Li chaq’rab’ ut eb’ li profeet ke’xch’olob’ xyaalal chiwix; relik chi yaal, ut chixjunileb’ li profeet li ke’tz’iib’ak, toj reetal ajwi’ laj Jwan, ke’xye chi rub’elaj resil li kutan a’in.

18 Chalen chaq sa’ li kutan a’an, najultikaman resil lix awa’b’ejihom li Dios, ut li junjunq chi winq li nasik’ok re li yaal naxtiikisi rib’ chi ok.

19 Ut ink’a’ ch’a’aj naq taa’oso’q li choxa ut li ch’och’, chiru naq taasachq junaq xtz’uqil li chaq’rab’.

20 Ut k’a’ naq nekek’ut li chaq’rab’, ut neketz’eqtaana xyaalal li k’a’ru tz’iib’anb’il; ut nekejit li ani kixtaqla li Yuwa’b’ej chixtz’aqob’resinkil ru li chaq’rab’, re raj naq tojb’ilaq eerix chejunilex?

21 Ex maak’a’ eena’leb’! xb’aan naq xeye sa’ eech’ool, Maajun Dios wan. Ut nekepo’ li tiikil b’e; ut li awa’b’ejihom re choxa naxk’ul li rahob’tesiik eeb’aan; ut nekerahob’tesiheb’ li tuulan, ut sa’ eejosq’il nekesik’ xsachb’al li awa’b’ejihom; ut nekechapeb’ li ralal xk’ajol li awa’b’ejihom chi minb’il. Rahilal sa’ eeb’een, ex aj muxul sumsu!

22 Ut ke’xhob’ wi’chik, rik’in naq yoo xjosq’ileb’ xb’aan lix yehom, naq a’aneb’ aj muxul sumsu.

23 A’b’an toj ki’aatinak, ut kixye, Ani nakanab’ank re li rixaqil, ut nasumla rik’in jalan, naxmux xsumlajik; ut ani nasumla rik’in li kanab’anb’il xb’aan xb’eelom, naxmux xsumlajik. Chi yaal ninye eere, texinjuntaq’eeta rik’in li winq b’ihom.