20 Ket bayat ti pannanganda, nangala ni Jesus iti tinapay ken binendisionanna, ket pinirsapirsayna, ken intedna kadakuada, sana kinuna, Mangalakayo, ken mangankayo.

21 Adtoy, aramidenyo daytoy a panglagip iti bagik; ta iti kasansan ti panangaramidyo iti daytoy ti pannakalagipyo iti oras a kaaddak kadakayo.

22 Ket nangala iti kopa, ket idi nakapagyamanen, intedna kadakuada; ket imminumda amin iti daytoy.

23 Ket kinunana kadakuada, Daytoy ti panglagip iti darak a nagsayasay para iti adu, ken iti baro a tulag nga itedko kadakayo; ta paneknekandakto iti intero a lubong.

24 Ket iti kasansan ti panangaramidyo iti daytoy nga ordinansa, malagipdakto iti daytoy nga oras a kaaddak kadakayo ken pannakiinninumko iti daytoy a kopa, nga isu ti maudi a kanito iti panagserbik.

25 Pudno kunak kadakayo, Iti daytoy mamaneknekkayonto; ta saanakon a makiinninum kadakayo iti bunga ti ubas, agingga iti dayta nga aldaw nga uminumak manen iti pagarian ti Dios.

36 Ket nakadanonda iti lugar a managan iti Getsemani, nga isu ti minuyongan; ket nalaus ti panagsiddaaw dagiti disipulo, ket nadagsenanda unay, ket nagpangngaduada iti un-unegda, a masmasdaaw no isu daytoy ti Mesias.

37 Ket ni Jesus iti pannakaammona iti adda iti kaungganda, kinunana kadagiti disipulona, Agtugawkayo ditoy, bayat ti panagkararagkonto.

38 Ket inkuyogna da Pedro, Santiago, ken Juan, ket inungtanna ida, ket kinunana kadakuada, Nalaus ti sakit ti nakemko, a kurang la a matayak; aguraykayo ditoy ket agbuyakayo.